بیر نئچه گون اوّل گنج و پئشه‌کار بیر صنعتکار حیاتلا ویداعلاشدی. صحبت توحید نوروزی-دن گئدیر. آغاج‌لارین، قوش‌لارین و سازلارین عمیسی، توحید عمی. او دئیردی کی «سنین بیلدیگین قدر دئییل عمی، چوخ اذیتی وار، اینسان اولماغی دئییرم.»
تحصیل و موسیقی حیاتی
توحید نوروزی ۱۳۶۵-جی ایل آبان آیی‌نین ۱۰-دا مشکینده دونیایا گؤز آچیب. ایلک و اورتا تحصیلینی مشکینده بیتیردیکدن سونرا عایله‌سی ایله بیرگه تبریزه کؤچور و مرند اونیوئرسیته‌سینده عمران مهندیسلیگی ایختیصاصینا ییه‌له‌نیب. همین ایل‌لرده (تخمیناً ۱۳۸۲-جی ایلده) اوستاد چنگیز مهدی‌پورون یانیندا موسیقی تحصیلی آلیر. بونونلا دا ایبتیدایی موسیقی تحصیلینی الده ائدیر. سونرادان اوستاد نوید موثمیرله تانیش اولور و موسیقی حیاتینا باغلاما سازی ایله داوام ائدیر. چوخ سایدا طلبه یئتیشدیرمیش اولان نوید موثمیر اؤز طلبه‌لریندن تورکمان موسیقی قروپو یارادیب. حاضیردا بو قروپونون عضولری آذربایجانین موختلیف شهرلرینده طلبه‌لر یئتیشدیریرلر. توحید ایسه ایستعداد و چالیشقانلیغی‌نین نتیجه‌سینده آز زاماندا سازین سحرینه ال تاپیر، اوستادی نوید موثمیرین تورکمان موسیقی قروپونا قوشولور و باغلاماچی کیمی کونسئرت‌لرده ایشتیراک ائدیر.
گنج توحید داها دا ایره‌‌لی گئده‌رک عالی موسیقی تحصیلی آلماق اوچون آذربایجان میللی کونسئرواتورییاسینا داخیل اولور و قیسا بیر زاماندا آذربایجانین قوزئیینده ده اؤزونو بسته‌کار و موسیقیچی کیمی ثبوت ائدیر. او، قوزئیده تانینمیش و پئشه‌کار بیر چوخ موسیقیچی و موغننی‌لره بسته‌لر یازیر و بونونلا دا ائلین کؤنلونده اؤزونه مخصوص یئر قازانیر. آنجاق بو هله یولون اوّلی ایدی. اونون پلان‌لاریندا بیر چوخ بسته و موسیقی‌لری ده یازماق وار ایدی.
باغلاما سازی تورکیه‌نین میللی سازی کیمی تانینماسینا باخمایاراق یازدیغی اثرلرین بیر چوخو آذربایجان موسیقی‌سینه عایید ایدی. هابئله سئچدیگی شعرلر ده آذربایجانین چاغداش و کلاسیک شاعیرلری، او جمله‌دن شاه ایسماعیل ختایی، نسیمی، نادیر ایلاهی، رامیز رؤوشن، موغان‌اوغلو و دیگرلرینه عایید ایدی. او، کلاسیک شاعیرلرین اثرلرینی یئنی اؤلچوده و اؤزونه‌مخصوص بیر اوسلوبلا ایفا ائدیردی. اؤز صنعتی ایله یاناشی اؤز اینسانلیغی ایله ده هر کسه نومونه ایدی.
وطن اوچون بیر آغاج اک
توحید نوروزی تکجه موسیقی ایله دئییل، اجتماعی، مدنی و اطراف موحیط مسئله‌لری ایله ده ماراقلانیردی و فرقلی یول‌لارلا اینسان‌لاری طبیعت و حیوان‌لارلا باریشدیرماغا چالیشیردی. او ییه‌سیز حیوان‌لارا ییه دورور، اونلارا یئمک وئریردی. هئچ بیر شخص و یا تشکیلاتا باغلی اولمادان تک جانینا آذربایجاندا ۳۰ مینه یاخین آغاج اکیب. «وطن اوچون بیر آغاج اک» اونون شوعارلاریندان بیری اولوب.
میللی روح
توحید نوروزی پئشه‌کار فعالیتی ایله یاناشی وطنپرورلیگی ایله ده تانینیردی. یازیب یاراتدیغی بسته‌لر وطنه، آذربایجانا دؤیونن اوره‌ییندن خبر وئریردی. یولداش‌لاریندان الده ائدیلن معلوماتا گؤره ۲۰۲۰-جی ایلده تبریزده کئچیریلمیش قاراباغا دستک آکسییالاریندا دا ایشتیراک ائدیب. تراختور فوتبول کلوبو حاقیندا اوخودوغو ماهنی، اویدورما آذری تئزیسینه قارشی پایلاشدیغی ویدئولار و بیر چوخ باشقا نومونه‌لر اونون میلی احوال-روحیه‌سیندن خبر وئریر.
تورکولرله دفن ائدیلدی
توحید نوروزی ۱۰ دی ۱۴۰۰-جی ایلده حیاتلا ویداعلاشدی. بیر گون سونرا آذربایجانین فرقلی یئرلریندن بیر چوخ اینسان دفن مراسیمینده ایشتیراک ائدیب، گنج موسیقیچینی تورکولرله تورپاغا تاپشیردیلار.
توحیدین اکدیگی فیدان‌لار هله بوی آتاجاق و اوندان سونرا گلن نسیل‌لر دئیه‌جک: «بیر توحید عمی وار ایدی و بو آغاج‌لاری بیزیم شرفیمیزه اکیب، بیز ایسه اونون شرفینه بیر مئشه‌لیک آغاج اکیریک. یولا داوام عمی.»
