فئورال آیی‌نین سون گون‌لرینده اورمو بلدییه والیبال کومانداسی‌نین لغو ائدیلمه‌سی حاقیندا خبر یاییلدی. گئنیش رئاکسییایا سبب اولان بو خبر اورمو شهر شوراسی‌نین عضولری طرفیندن رد ائدیلدی. یئرلی مئدیا ایستیفاده‌چی‌لری اورمو شهر شوراسی‌نین کوماندانی لغو ائتمک حاقیندا قرار وئردیگینی، آنجاق اعتراض‌لار نتیجه‌سینده گئری چکیله‌رک بونو داندیقلارینی دئییرلر.
سون دفعه اورمو بلدییه والیبال کومانداسی‌نین تهرانین پیکان کومانداسینا مغلوب اولدوقدان سونرا اؤلکه‌نین والیبال لیگی رقابت‌لریندن قیراقدا قالماسی آذربایجانلی والیبال‌سئورلر آراسیندا ناراضیلیق‌لارا سبب اولموشدو. بونونلا یاناشی بو واختا قدر آسیا والیبال موسابیقه‌لرینه ائو صاحبلیگی ائد‌ه‌جک اولان اورمونون بو حاقی دا الیندن آلیناراق تهرانا وئریلیب. اینسان‌لار ایسه دؤولتین بو آددیم‌لاریندان ناراضیدیرلار.
اورمو آسیانین والیبال پایتختی کیمی تانینیر. اورمو شهرینده بیر آز گزمکله بوتون اورمولولارین والیبالی سئودیگینی و مهارتله اویاندیغینی موشاهیده ائتمک مومکوندور. اؤلکه سوییه‌سینده ده ان چوخ والیبالچی دا محض بو شهرده یئتیشیر. بئله تاریخه و اوغورلارا باخمایاراق حاضیردا اورمونون والیبال کومانداسی‌نین طالعی سوال آلتیندادیر.
اورمو بلدییه والیبال کومانداسی ۱۱ لیگده ایشتیراک ائدیب و ۲ دفعه ایکینجیلیک، ۳ دفعه ایسه اوچونجولوک قازانیب. اورمودا والیبال کومانداسی بلدییه صاحیبلیگیندن ده اوّل اولوب. جمعی ۳ دفعه ایکینجی و ۸ دفعه اوچونجولوک الده ائد‌ن کوماندا هئچ واخت چئمپیون اولماییب. بعضی آذربایجانلی‌لار اورمو والیبال کومانداسی‌نین چئمپیون اولماماسینا حکومتین بیله‌رکدن مانع اولماسینا اینانیرلار. بونونلا دا تراختور فوتبول کومانداسی ایله عینی طالعی بؤلوشدوکلرینی دوشونورلر.
اورمو والیبالی لغو ائدیلیب یوخسا یوخ؟
اورمودا یئرلی مئدیا ایستیفاده‌چی‌لری 7 ایسفند تاریخینده باش توتموش اورمو شهر شوراسی‌نین ایجلاسیندا اورمو بلدییه والیبال کومانداسی‌نین لغو ائدیلمه‌سی قراری‌نین آلیندیغینی دئییبلر. لاکین همین گون اورمو شهر شوراسی‌نین صدری بو خبری یالانلاییب.
18 ایسفند تاریخینده کئچیریلمیش ایجلاسدا کوماندانین لغو ائدیلمه‌سی موذاکیره ائدیلیب. همین ایجلاسدا کوماندانین لغو ائدیلمه‌سی یوخ، صاحبلیگی باره‌ده موباحیثه یاراندیغی بللی اولوب. اورمو شهر شوراسی‌نین صدری حجت الاسلام محمد خلیلپور ویلایت والیلیگینه دؤولت قوروم‌لارینین کوماندا صاحبلیگی ائده بیلمه‌مه‌سی حاقیندا مراجعت ائدیلدیگینی دئییب. او، اورمو بلدییه والیبال کومانداسی‌نین بلدییه‌دن آلینماسی‌نین اصل موباحیثه موضوعسو اولدوغونو بیلدیریب.
الده اولان معلوماتا اساساً کوماندانین لغو اولونماسی حاقیندا ایجلاس اولاجاق. همین ایجلاسدا موخالیف کیمی چیخیش ائد‌ن مرتضی پیری‌نین دانیشیق‌لاری بونا ثبوت کیمی گؤرونور. مرتضی پیری بو قرارین اجتماعی بیرلییه زیان وئردیگینی و اونونلا قطعی شکیلده راضی اولمادیغینی بیلدیریب.
کوماندانین لغو ائدیلمه‌سینی ایسته‌ینلر ده بللی‌دیر. «Jarchi_urmu» اینستاگرام صحیفه‌سی‌نین وئردیگی معلوماتا اساساً اوصولگرالارا (اینقیلابی ایدئیالاری قورویان قوه‌لر و شخص‌لر) یاخین شخص‌لر کوماندانین لغو ائدیلمه‌سی اوچون لاییحه تقدیم ائدیبلر.
حال-حاضیردا هانسی‌سا قطعی بیر قرار یوخدور. لاکین جاوابده شخص‌لر کوماندانین لغو ائدیلمه‌یه‌جه‌یینی دئیه‌رک کوماندانین صاحبلیگی ایله باغلی نوروز بایرامیندان سونرا لازیمی قوروم‌لارلا دانیشاراق قطعی قرار وئره‌جکلرینی بیلدیریبلر.
اورمو بلدییه والیبال کومانداسی‌نین کئچدیگی یول
5 ایسفند تاریخینده اورمو بلدییه والیبال کومانداسی تهرانین پیکان کومانداسینا قارشی ضعیف چیخیش ائدیب و ۳ ستی اودوزاراق یئکون حسابدا مغلوب اولوب. اورمو کومانداسی ائنیشلی یوخوشلو یول‌لاردان کئچسه ده هر دفعه فینال اویونلارینا قدر ایر‌ه‌لیله‌یه بیلیب. سون مغلوبیتیندن سونرا ایسه بئشینجی یئره دوشه‌رک فینال اویونلاریندا ایشتیراک ائده بیلمه‌ییب. بوندان سونرا ایسه کوماندانین لغو ائدیلمه‌سی مسئله‌سی گونده‌مه گلیب.
عمومیتله اورمودا والیبال یوکسک پوتئنسیالا صاحبدیر. اورمو کئچن ۵۰ ایل عرضینده اؤلکه سوییه‌سینده والیبالدا ان یاخشی نتیجه گؤسترن شهرلردن بیری اولوب. حاضیردا بلدییه‌نین بالانسیندا اولان اورمو کومانداسی اوّل‌لر باشقا ایسپونسورلارلا اؤلکه لیگینده چیخیش ائدیب.
ایراندا باشدا اورمو اولماقلا غربی آذربایجان و تورکمن‌لرین یاشادیقلاری گنبد شهری اؤلکه والیبالچی‌لارینین یئتیشدیگی ایکی اساس مرکزدیر. حاضیردا دا اولدوغو کیمی اؤلکه‌نین میللی والیبال کومانداسیندا تورک‌لر چوخونلوقدادیرلار. لاکین بونا باخمایاراق ان چوخ چئمپیون اولان کوماندا تهرانین پیکان کومانداسی‌دیر. اورمو و گنبد کوماندالاری ایسه هله ده بو پیلله‌یه یوکسه‌له بیلمه‌ییبلر.
بوتون بونلار ایسه تورک‌لری بیله‌رکدن چئمپیونلوقدان اوزاق توتماقلاری ایله باغلی اولان فرضیه‌لری گوجلندیریر.
والیبال سئوگیسی: چئمپیونلوق یولوندا دؤیولمک
29 ایسفند 1393-جو ایلده اورمو والیبال کومانداسی ایله تهرانین پیکان کومانداسی اؤلکه‌نین والیبال لیگی‌نین فینال اویونونو اوینادیلار. همین لیگده پیکان کومانداسی‌نین قایدا پوزونتولارینا گؤز یومولموشدو و فینال اویونونو دا تهراندا کئچیرمه‌یه راضیلیق وئرمیشدیلر.
تهراندا کئچیریلن فینال اویونوندا آذربایجانلی طرفدارلار «تورک دیلینده مدرسه اولمالیدیر هر کسه»، «گلین گئدک آغلایاق اورمو گؤلون دولدوراق»، «یاشاسین آذربایجان» کیمی میللی شوعارلار سسلندیریب، بو ایسه پولیس قوه‌لرینین موداخیله‌سینه سبب اولموشدو.
همین اویوندا اورمو کومانداسی مغلوب اولدو. اویون بیتدیکدن سونرا طرفدارلار دؤیوله‌رک چؤله آتیلدیلار. حاکمیت قوه‌لری ایسه بونو داناراق طرفدارلارین اویوندان چیخارمادیقلارینی دئییرلر. طرفدارلار ایسه بونو رد ائدیرلر. اونلار باش وئر‌نلری اویون اثناسیندا وئریلن میللی شوعارلارلا علاقه‌لندیریرلر.
اورمو والیبال تاریخینده خصوصیله قئید ائدیلن بو حادیثه آذربایجانلی والیبال‌سئونرلرله جاوابده ارگان‌لارین آراسیندا اولان موباحیثه‌نین چاتدیغی زیروه نقطه‌سی کیمی گؤرونور.
اورمونو والیبال تاریخی پارلاق اولدوزلارین آدی ایله دولودور. اوخشاری گؤرولمه‌میش والیبال سئوگیسی هله کی چئمپیونلوق سئوینجی ایله قوتلانماییب. والیبال سئوگیسی یولوندا دؤیولمه‌یی بئله گؤزه آلان آذربایجانلی والیبال طرفدارلاری حاضیردا اورمو بلدییه کومانداسی‌نین لغو ائدیلمه‌سی ایله سینانیرلار. اورمو شهر شوراسی عضوو مرتضی پیری‌نین ده دئدیگی کیمی بو کیمی آددیم‌لار اجتماعی بیرلییه زیان وورور و جاوابده قوروم‌لارلا ایجتیماعیتین آراسینی آچیر.
