رقیه کبیری ۱۳۴۱ ش. (۱۹۶۳م.) خوی شهرینده دونیایا گلمیش، تبریز اونیورسیته‌سینده پیراپزشکی فاکولته‌سی‌نین لابراتوار علم‌لر بؤلومونده (فوق دیپلم علوم آزمایشگاهی) تحصیل آلیب. ۱۳۹۲-جی ایلده علوم پزشکی اداره‌سیندن تقاعد اولوب.
بو گونه کیمی رقیه کبیری‌نین ایکی عنوان شعر کتابی، بیر عنوان ترجمه، یئددی عنوان حیکایه توپلوسو، آلتی عنوان رمان، اوچ عنوان سفرنامه، بیر عنوان اوشاق کتابی و بیر عنوان «آذربایجان روزنامه‌لرینده معاصر طب» آدلی تدقیقی کتابی یاییملانیب.
رقیه‌کبیری‌نین آلدیغی اؤدول‌لر:
۲۰۱۲ ده ماوایل آدلی حیکایه‌سی باکی‌دا آزادلیق رادیوسونون کئچیردییی حیکایه مسابیقه‌سینده بیرینجی مقامی قازانمیشدی.
تورکیه‌ده کئچیریلن کاشغارلی محمود مسابیقه‌سینده ۲۰۱۶ م. (۱۳۹۵ش.) و ۲۰۱۸ م. (۱۳۹۷)ایللرینده ایران قولوندا اوچونجو مقاما لاییق گؤرونموشدور.
۲۰۱۹م. (۱۳۹۸ش.)-جی ایلده تهرانین اوتوز آلتیجی بین‌المللی قیسا فیلم فستیوالی‌نین اقتباس اوچون حیکایه بؤلومونده «پاسبان‌های بطنم» آدلی فارسجا حیکایه‌سی ۶۵۰اثر ایچینده ایکینجی مقامی قازانمیشدی. آنجاق یازیچی قیسا آچیقلامادا اؤلکه‌ده اوز وئرن حادثه‌لره اشاره ائدرک بو مقام و اؤدولو آلماقدان امتناع ائتمیشدیر.
همان ایل (۲۰۱۹ م.)مهرگان ادب مسابقه‌سینین آنا دیلیندن فارسجایا ترجمه قولوندا، «قوشلار داها قورخمورلار» رمانی تقدیره لاییق گؤرونموشدو و ۲۰۲۲-جی ایلده مهرگانین آنا دیلیندن ترجمه بؤلومونده «مرّ آغاجی‌نین کهربا گؤزلری» رمانی بیرینجی مقامی قازانمیشدی.
اوسته‌لیک ۲۰۲۲-جی ایلده استرالیادا یاشایان آذربایجانلی‌لارین قوردوغو «وارلیق» درنه‌یی‌نین ادبی اؤدولونه لاییق گؤرونموشدور.
رقیه کبیری‌نین «قاریاغیر» حکایه‌سی اساسیندا قادر فریور رژیسورلوغویلا قیسا فیلیم چکیلمیشدی.
بو موصاحیبه‌دن دیل، ادبیاتیمیز و سوسیال سورونلار ایله یازیچی‌نین ایلیشکیسی رقیه کبیری ایله موذاکیره اولونوب.
