*آشاغیدا یازدیغیم غزه فاجعه‌نامه‌سی دئییلدیر. غزه جنایتین اؤزودور. فاجعه‌نین اؤزودور. غزه هر بیر تراژدینی اوتاندیرا بیلن تراژدینین اؤزودور روایت اولدوغوندا. اینسان اولاراق منیم ده فاجعه‌م‌دیر. تورک و مسلمان اولاراق بیر داها دا منیم تاریخی تراژیک وضعیتیمدیر. آمما آشاغیداکی نئچه جومله جانلی اولاراق یاشادیغیمیز بیر انحطاطا اوغرایا بیلن وضعیتین آیاق‌اوستو روایتیدیر. غزه او وضعیتین پیسلیگینی منیم گؤزومده آرتیق دا درینلشدیردی.
زنگان شهرینده یاشیرام. زنگان اوستانینین مرکزی. بیزیم شهر و اوستان بوتونلوکله تورک یوردودور. تورکدن باشقا یئرلی اولاراق یالنیز بیر ایکی تات کندی وار. بوردا هر کس تورک دیلینی بیلیر و هر یئرده هر کس تورکجه دانیشیرسا آنلاشیلیر. ۱۳۶۰لاردا مکتبه گئتدیییمده ایکی اوچ معللیمدن باشقا قالان معللیملریم و بوتون مدرسه مودور و معاونلریم تورک ایدیلر. آمما بونلار هامیسی بیز محصللر ایله فارسجا دانیشاردیلار. کلاس و کلاس ائشیگی بوتون دانیشیقلاری فارسجایدی. البته بیز محصللر اؤز آرامیزدا یالنیز تورکجه‌نی ایشله‌دیردیک. ۱۳۲۰و ۳۰لاردا مکتبه گئدن آتام ایله ده اورادا فارسجا دانیشیبلار. ۱۳۴۰ و ۵۰لرده ده زنگان مدرسه‌لرینده اوشاقلار ایله فارس دیلیجه دانیشیلیردی. باخمایاراق اوشاقلارین بیر چوخو ۱۳۷۰لره قدر فارسجانی مدرسه‌ده اؤیره‌نیردیلر و بوتون مدرسه ایللرینده باجاردیقجا معللیم ایله دانیشماقدان چکینیردیلر. بو پرابلئم نئجه چؤزولدو؟ ۱۳۵۰ و ۱۳۶۰لاردا اوشاقلاریله فارسجا دانیشان عایله‌لرین هئچ گؤزه گلمه‌ین ساییسی ۱۳۷۰لرده چوخالدی و ۸۰لرده کندلره ده اوزاندی.
من بئله بیر شهرده یاشیرام. بعضی عایله‌لر دیللرینی -دئمک هامیمیزین دیلینی- ایسته‌مه‌د‌یلر. البته بونون بیر ندنی مدرسه ایدی. چوخلو اجتماعی، تاریخی و سیاسی ندن ده وار. آمما نتیجه‌ده بیر چوخ عایله اولسون-اولسون اوشاق بؤیوک بابا و ماماسی ایله دانیشا بیلمه‌سین ده اونلارلا فارسجا دانیشدیلار. ۱۳۷۰لر دوغوملو اوشاقلارین ایندی ۳۰ حدودوندا یاشلاری وار. بیر چوخونون اوشاقلاری وار آمما هله “بابا” و “مامان” ایله فارسجا دانیشیرلار. هامیسی دا تورکجه بیلیرلر. البته فارسجانی دا اؤنجه اؤیرنمیشلر. اصلینده اونلار ایله فارسجا دانیشماقدان قصد اونلارین فارسجا اؤیرنمه‌لری و مدرسه‌ده باجاریقلی و تحصیلاتدا “موفق” اولمالاری اعلان اولوردو. آمما بو گون اونلارین عائله دیلی فارسجادیر. البته اونلارین چوخو -هامیسینا یاخین چوخو- ایشده غالبن تورکجه دانیشیرلار. اؤزللیکله صنعت، عمران و بازار ایشینده اولانلار بئله‌دیرلر. بعضی خانیملار فارسجا دانیشماغا اصرارلی اولسالار دا بعضی ایشلرده تورکجه‌یه مجبوردورلار.
من بئله بیر شهرده یاشیرام. عایله تورک دیللی اولاراق ۲۰ ایل اونجه‌سینه اؤزگه‌له‌شن بیر شهرده. بلکه ده بونون اوچون غزه‌دن واز کئچه بیلمیرم. البته یئنه غزه‌یه دقت گؤسترمه‌مین بیر ندنی بو اولا بیلیر. دوغروسو غزه بیر انسان جنایتی تابلوسودور. بیر بؤلوک انسان بیر توپلوم انسانی اولدوقجا رحمسیز و ندنسیز شکیلده یالنیز اونو تورپاق اوزوندن سیلمک اوچون اؤلدورور. آمما من اؤز وضعیتیمیزی ده اونلار وضعیتی ایله توتوشدورورام. منیم شهریمده “موفقیت” دئییب جامعه‌سینی و اونا تعللقونو و باغلیلیغینی اونونموش بیر عایله وضعیتی وار. دیلینی اونوتماغا چالیشان بیر عایله وار. او بیری طرفده غزه‌ده عایله اوردو واحیدنه دونموش بوتون وارلیغینی و جانینی الینه آلیب ایللر محاصره‌ده قالاندان سونرا دوشمن قارشیسینا چیخان بیر عایله. بلکه بیزلر ده او وضعیتده اولسایدیق بو گون دیره‌نه‌جکدیک. آمما بو گونکو وضعیتیمیز دیره‌نیش وضعیتی دئییل. دیلیمیز معلوم، یازدیغیم وضعیتده‌دیر. توپلوموموزدا آیاق آچیب یئریین لمپنیزم هر بیر ائشیگه چیخدیغیندا زامان اوزاندیقجا او قدر ده چوخ یاخاندان یاپیشیر. (بو لمپنیزم بیر تمثیل اولونموش آددیر. بازاردا باشینا کئچن بؤرکون آدی. اوتوموبیل سوردوگونده جانینی قصد ائدن شوفورون هئیوه‌رجه سوروجولوگو. ایداره‌لرده ازیلن حؤرمتین. قیز مدرسه‌لرینین اؤنونده باغیریب موتورسیکلت‌لرینی اوینادیب خالقین اعصابی ایله جانی ایله اوینایان گنجلرین اذیتی‌دیر. و باشا گلمه‌ین بئله بیر سیاهه!) چئوره گون گله آرتیق فنالاشیر. بوتون معدنی تورپاقلار آز تعداددا شخصین الینده‌دیر. دؤولت توپلومون وار یوخونو خصوصیلشدیرمه‌یه چالیشیر. البته خصوصی و اصلینده قدرت ائشیگی خصوصی مئدیا هله یاساقدیر. یعنی سسین اوجالتماق یاساقدیر. بیز ده بو یاساغا باش اگمیشیک. دقیق یازسام یاساغی اؤیره‌نیریک. یاساغین بیر پارچاسی اولوروق. اونون اوچون ده بیزه غزه ماراقلی اولماز. بیزه یوخ، دونیادا بیر چوخ آداما آز دا دویموش اولسا قارنی دویموشا، غزه بیر قاخینج بیر اوتانج نشانه‌سی ده اولابیلر. بیز آرتیق دیره‌نمیریک. بیزلر ان چالیشقان اولدوغوموزدا موجود نظمین بیر پارچاسی اولماغا چالیشیریق. پاییمیزی آلماغا چالیشیریق. توپلوموموزو اونودوب دوزلتمه‌گینی هله یارادا بیلمه‌دیگیمیز گوج و سیاسته تاپیشیریریق.
دوغروسو غزه منی اوتاندیریر. بیر ایلدیر اوتانجلاریما بیری ده چوخالمیشدیر.
