اینکلوزیو توپلوم فوندو طرفیندن یاییم‌لانان سون راپورت ۲۰۲۴-جو ایلین ایول-سئنتیابر آی‌لاریندا ایراندا باش وئرن اینسان حاق‌لاری پوزونتولارینی سندلشدیریب. راپورت، خصوصیله آذربایجان تورک‌لرینه قارشی یؤنلمیش تضییق‌لری اؤنه چکیر و موختلیف حقوق پوزونتولارینی دقته چاتدیریر.
اعدام‌لار
حساباتا گؤره، بو دؤورده ان آزی ۱۵ نفر اعدام ائدیلیب. ایران حکومتی بو شخص‌لری آغیر جینایت‌لرده اتهام ائتسه ده، بین‌الخالق تشکیلات‌لار، خصوصیله عفو عمومی تشکیلاتی، اعدام جزاسی‌نین تطبیقینی کسکین شکیلده پیسله‌ییر. اعداما محکوم ائدیلنلردن بیری ده حال-حاضیردا رشت شهرینده‌کی لاکان حبس‌خاناسیندا ساخلانیلان ایشچی فعالی شریفه محمدی‌دیر.
حبس‌لر و محکمه‌لر
آذربایجانلی اینسان حاق‌لاری فعال‌لاری و وطنداش جمعیتی نماینده‌لری متمادی اولاراق ساخلانیلیر، چوخ واخت عدالتسیز محکمه پروسئس‌لرینه معروض قالیرلار. اوین حبس‌خاناسیندا ساخلانیلان مرتضی پروین کیمی فعال‌لار آلچالدیجی رفتارا و ایشگنجه‌لره معروض قالیب. عمومیلیکده، ۱۵ نفر حبس اولونوب و بعضی شخص‌لر موقتی آزادلیغا بوراخیلیب.
حبس جزالاری
بیر چوخ فعال سیویل و سیاسی فعالیت‌لرینه گؤره حبس جزاسینا محکوم ائدیلیب. بو جزالار، اونلارین موباریزه‌سینی بوغماق اوچون تطبیق اولونان سیستئماتیک تدبیرلردن بیریدیر.
ایشدن چیخاریلمالار
فعال‌لار، او جمله‌دن افشار محب ایمچه، ایش اعتصابینی دستکله‌دیکلرینه و آکتیو فعالیت‌لرینه گؤره ایشدن چیخاریلیبلار. بو آددیم‌لار ایقتیصادی تضییق یولو ایله فعال‌لاری سوسدورما ایستراتژیسی‌نین بیر حیصه‌سی کیمی قیمتلندیریلیر.
سورگون‌لر
تانینمیش فعال عباس لسانی زورلا اوزاق بیر بؤلگه‌یه، یزد شهرینه سورگون ائدیلیب.
غیر قانونی چاغیریش‌لار
گزاریشه اساساً، اینسان حاق‌لاری فعال‌لاری، او جمله‌دن امیر بدری و فاطمه قلی‌پور، غیررسمی یول‌لارلا – اساساً تلفن واسیطه‌سیله – ایران حاکمیتی طرفیندن چاغیریلیب و تضییق آلتینا آلینیبلار.
شخصیت وثیقه‌سی‌نین وئریلمه‌مه‌سی
آزلیق قروپ‌لارینا منسوب اوشاق‌لار اوچون شخصیت وثیقه‌سی‌نین وئریلمه‌مه‌سی ده جدی اینسان حقوق‌لاری پروبلئمی اولاراق اؤنه چیخیر. تبریزده‌کی بیر حادیثه بو چتینلیک‌لری نوماییش ائتدیریب. بئش آیلیق محکمه موباریزه‌سیندن سونرا آلپ آسلان آدلی کؤرپه‌نین عایله‌سی، ثبت احوال ایداره‌سینی دوغوم شهادتنامه‌سینی(شناسنامه) وئرمه‌یه مجبور ائد‌ن محکمه قراری الده ائدیب. بو حادیثه آزلیق‌لارین قارشیلاشدیغی سیستئماتیک مانع‌لری بیر داها اوزه چیخاریب.
گزاریش عمومیلیکده ۴۰ نفرین موختلیف دؤولت سوییه‌لی سرکوب هدفی اولدوغونو گؤسته‌ریر. آذربایجان تورک‌لرینه قارشی آپاریلان بو تضییق‌لر ایراندا اینسان حقوق‌لارینین سیستئماتیک شکیلده پوزولدوغونو بیر داها تصدیقله‌ییر.
