یازیچی علی حسن‌زاده‌نین «قان قایدا» رومانی گونئیده اردبیل شهرینده ایشیق اوزو گؤروب. «جنت سرا» نشریاتیندا آذربایجان تورکجهسینده نشر اولونان بو روماندا، قدیم حئکایه‌لردن و میفیک اوبرازلاردان ایستیفاده ائدیلیب. یازی شکلینده نشری ایله برابر بو اثر هم ده سسلندیریلیب و پادکست شکلینده ده حاضیرلانیب. اسفندین ۴-ده تبریزده کئچیریلن تانیتیم مراسیمینده بعضی آذربایجانلی یازیچی‌لار ایشتیراک ائد‌رک رومان حاقیندا دانیشیبلار.
یازیچی علی حسن‌زاده‌نین حوضورو ایله کئچیریلن بو تدبیرده رومان حاقیندا دانیشان‌لارین لیستینده یازیچی نیگار خیاوی، «آنا وارلیق» ژورنالی‌نین باش رئداکتورو آیدین سرداری‌نیا کیمی آدلار دا یئر آلیب و رومان حاقیندا فیکیر بیلدیریبلر. علی حسن‌زاده عینی زاماندا تئاتر و سینما ساحه‌سینده ایش‌لری ایله ده تانینیر. کیتابین چاپ اولونموش و ده پادکستینی الده ائتمک اوزون یازیچینین تلگرام آیدیسی (@ali_hasanzadeh_1350) ایله علاقه‌یه کئچیب سیفاریش ائتمک مومکوندور. قئید ائتمک لازیمدیر کی ایراندا اکبر عبدی و فاطمه شکری کیمی تانینمیش اویونجولار بو رومانی تانیتدیریبلار.
شاعیر و یازیچی نیگار خیاوی یازیچینی تبریک ائد‌رک اثرین دیلی‌نین صمیمیلیگیندن و شاعرانه اوسلوبوندان دانیشیب. نیگار خانیمین فیکرینه گؤره بو شاعرانه اوسلوب ساختا یوخ، صمیمی شکیلده سسله‌نیر. او گونئیده آذربایجان تورکجهسینده نثر یازانلاردا اکثر حال‌لاردا فارسجانین ایزی گؤروندویونو دئییب. اونون فیکریجه فارسجا تحصیل سایه‌سینده بعضی آذربایجانلی یازیچی‌لار فارسجا دوشونوب تورکجه یازیرلار. لاکین علی حسن‌زاده‌نین بو کیتابدا بو سهودن چوخ راحت شکیلده کئچدیگینی، تورکجه دوشونوب و تورکجه یازدیغینی دئییب. او گراماتیک آچیدان کیتابدا بعضی سهولرین اولدوغونو، لاکین آز اولدوغونو دئییب. او هم ده آرتیق گونئیده تورکجه نثرین باشلادیغینی قئید ائد‌رک، گله‌جکده بو دیلده شاه اثرلر ده یازیلاجاغینی دئییب.
آیدین سرداری‌نیا ایسه رومانین دیلی اوچون یازیچینی تبریک ائدیب. او «قان قایدا»-نین هم فورم هم ده ایچه‌ریک آچیسیندان رومان ایستانداردلاری ایله اویوشدوغونو بیلدیریب. او هم ده آرتیریب کی یازیچی عینی زاماندا رئژیسور (کارگردان) اولدوغو اوچون سانکی درام بیر کینو اثرینی رومان فورماسیندا یئرلشدیرمک ایسته‌ییب.
ادبیات و دراماتیک تئاتر استادی عبدالحسین لاله ده رومان حاقیندا فیکریلرینی بیلدیریب. او دئییب کی رومانی رومان ائد‌ن بیر دیلدیر بیر ده اونون اینجه‌لیک‌لری، «قان قایدا» رومانی‌نین یازیچیسی ایسه بونو باجاریب. او رومانین جادوئی رئالیزم چرچیوه‌ده یئرلشدیگینی، داها اوّل بئله اثرین آذربایجاندا یازیلمادیغینی لاکین بو رومانلا آرتیق باشلادیغینی دئییر. لاله‌نین فیکرینه گؤره یازیچی حسن‌زاده روماندا کئچمیشله گونوموز باریشیق شکیلده، بیر یئرده بیرلشدیریب و بو ساختا شکیلده یوخ، صمیمی و پئشه‌کار شکیلده گئرچکله‌شیب.
ایکی جیلدلی «فارس کینو مدنیتی» (فرهنگ سینمای فارسی) آدلی کیتابین یازیچیسی وحید علیرضایی ده بو کیتاب حاقیندا فیکیرلرینی پایلاشیب. وحید علیرضایی رومانی پولیسی ژانریندا موفق بیر اثر کیمی قیمتلندیریب. او حسن‌زاده‌نین کیتابدا تصویر ائتمه قابیلیتی‌نین چوخ یوکسک اولدوغونو دا قئید ائدیب. اونون فیکرینجه بیر کینو متخصصی کیمی صحنه‌لر، اوبرازلار، یئرلر دیققتله تصویر ائدیلیب.
آنتروپولوق و نشریاتچی عمار احمدی ده رومان حاقیندا فیکیرلرینی بیلدیریب. اونون فیکرینه گؤره بو روایت افسانه‌لری مدرن دونیایا داشیییر و او افساه‌نه‌لری گونوموز دونیاسیندا یئنیدن روایت ائدیر. او روماندا خرمی‌لر کولتورو و فلسفه‌سی‌نین باریز شکیلده اولدوغونو قئید ائد‌رک، اسکی دونیانین یاشاییش فلسفه‌لرینی معاصر حیاتا داشیماقدا باشاریلی اولدوغونو وورغولاییب.
