اینکلوزیو توپلوم فوندونون اعدام جزاسی ایله باغلی یئنی ایللیک راپورتو یاییملانیب. ایراندا اعدام جزاسی دؤولت نظارتی‌نین گئنیش ایستیفاده اولونان بیر واسیطه‌سی اولاراق وارلیغینا داوام ائدیر. ۲۰۲۴-جو ایلده اؤلکه‌ده ۹۰۹ نفر اعدام ائدیلیب، اونلارین آراسیندا ۷۳ آذربایجان تورکو وار. ایران رئژیمی اعدام جزاسینی یالنیز حقوقی بیر واسیطه کیمی دئییل، عینی زاماندا سیاسی باسقی، سوسیال نظارت و قورخو یاراتما مقصدیله، خصوصاً کنارلاشدیریلمیش ایجماع‌لار، سیاسی موخالیف‌لر و میللی آزلیق‌لاری هدف آلاراق ایستیفاده ائدیر. ائتنیک و دینی آزلیق‌لارین، او جمله‌دن آذربایجان تورک‌لرینین، کوردلرین، بلوچ‌لارین و اهواز عرب‌لرینین غیرمتناسیب هدف آلینماسی، ایراندا حقوق و سیاسی سیستئم‌لرده درین کؤک‌لری اولان سیستئماتیک آیری‌سئچکیلیگی عکس ائتدیریر.
راپورتدا اعدام جزاسی آلانلار آراسیندا قادین‌لارین و خصوصیله آذربایجانلی قادین‌لارین پایینا دقت یئتیریلیب. ۲۰۲۴-جو ایلده اعدام ائدیلن ۳۰ قادیندان ۹-و آذربایجان تورکو اولوب کی، بو دا اعدام اولونان قادین‌لارین ۳۰%-ینی تشکیل ائدیر. بئله‌لیکله، آذربایجان تورکو قادین‌لاری، خصوصی ریسک آلتیندا اولان بیر قروپ کیمی اؤنه چیخیر. باشقا سؤزله عینی ایل عرضینده دوققوز آذربایجان تورکو قادی‌نین اعدام ائدیلمه‌سی— بو بوتون قادین اعدام‌لارینین اوچده بیرینی (۱/۳) تمثیل ائدیر — ایراندا ائتنیک و جینسیت اساسیندا باسقی‌نین کسیشمه‌سینی وورغولاییر. گزاریشه اساساً، رئال اعدام سایی رسمی رقم‌لردن داها یوکسک اولا بیلر، لاکین بورادا یالنیز تصدیقلنمیش حال‌لارا یئر وئریلیر.
۲۰۲۴-جو ایلین سون اوکتیابر و نویابر آی‌لاریندا ۴۵ آذربایجان تورکو، او جمله‌دن ۵ قادین اعدام ائدیلیب، بو دا سون ایل‌لرده‌کی ان اؤلومجول دؤورلردن بیری اولوب. اینکلوزیو توپلوم فوندو آذربایجان تورک‌لرینه و دیگر کنارلاشدیریلمیش ایجماع‌لارا قارشی اعدام جزاسی‌نین قارشیسینی آلماق اوچون تعجیلی تدبیرلرین گؤرولمه‌سی‌نین واجیبلیگینه دقت چکیر. بین‌الخالق اینسان حاق‌لاری تشکیلات‌لاری ایرانا سیاسی موتیولی (انگیزه‌لی) اعدام‌لاری دایاندیرماسی اوچون تضییق گؤسترمه‌لی، موستقیل بیر تشکیلات یاراداراق اعدام‌لارین ایزلنمه‌سینی تامین ائتمه‌لیدیر. ائتنیک قروپ‌لارین هدف آلینماسی تنقید ائدیلمه‌لی، بو ایجماع‌لارین حقوقی مودافیعه‌سی اولویتده اولمالیدیر. سون اولاراق فوند ایرانی اعدام جزاسینی تامامیله لغو ائتمه‌یه چاغیریر.
