ترجومه: روسلان کؤچرلی
کؤچورن: میلاد بالسینی
دؤوروموزده یالان و جهالته قارشی موباریزه آپارماغی، حقیقتی یازماغی قطع ائتمیش هر کس ان آزی بئش چتینلییین عؤهده‌سیندن گلمه‌لی‌دیر. هر یئرده بوغولان حقیقتی قلمه آلماق اوچون ایلک نؤوبه‌ده جسارت؛ هر یئرده اوستو باسدیریلمیش حقیقتی اوزه چیخارماق اوچون عاغیل؛ حقیقتی سیلاحا چئویره بیلمک اوچون باجاریق؛ بو سیلاحی تطبیق ائده بیله‌جک آداملاری دوزگون سئچمک قابیلیتی، و نهایت؛ حقیقتی اینسانلار آراسیندا یایماغا اوستالیق طلب اولونور. حقیقتی یازماق دئسپوتیک اؤلکه ساکین‌لری اولان یازیچی‌لار اوچون چوخ تهلوکه‌‌لی‌دیر. هرچند دوغما وطنیندن قووولموش و یا اونو کؤنوللو ترک ائتمیش، حتی بورژوازییا آزادلیقلاری اولان اؤلکه‌لرین یازارلاری اوچون ده حیس اولوناندیر.
۱. حقیقتی یازماغا گرک اولان جسارت
آیدین‌دیر کی، صؤحبت حقیقتی یازماقدان گئدیرسه اونون هر هانسی شکیلده بوغولماسی و یا تحریف ائدیلمه‌سی مؤوضوع اولا بیلمز. حقیقتی یازان آدام ایسته‌نیلن نؤوع یالانی رد ائدیر. او، نه گوجلولر قارشیسیندا باش أییر نه ده ضعیف‌لری آلدادیر .گوجلولره باش أیمه‌مک البته چوخ چتین‌دیر. هرچند ضعیف‌لری آلداتماق آسان و صرفه‌لی‌دیر. گوجلولرین گؤزونده دوشمنه چئوریلمک شخصی ریفاهی بیر دفعه‌لیک اونوتماق دئمکدیر. چونکی اللرینه دوشن ایسته‌نیلن ایمکاندا حقیقت جارچی‌سینی هر شئیدن محروم ائدیب، ازمه‌یه، حتی اؤلدورمه‌یه چالیشاجاقلار. گوجلولرین ماراقلارینا قنیم اولان حقیقتی یازماق نه اینکی مادی موکافات، عکسینه، مرحومییت‌لر وعد ائتدیییندن، بیر چوخلاری تضییق‌لره تاب گتیرمه‌ییب گئری چکیلیر، مئیداندا یالنیز سارسیلماز ديانت صاحیب‌لری قالیر. شؤهرتی گوجلولرین چتیری آلتیندا آختارمایانلار اکثر حاللاردا اونو همیشه‌لیک ایتیرمه‌لی اولورلار.
اسارتین سرت‌لشدییی زامانلاردا گوجلولر عادتا یوکسک ایدئاللاردان دم وورور، خالقین ایراده‌سینی زورلایانلار کلمه باشی خالقین ایراده‌سیندن دانیشیرلار. آرخاسیندا گوجولولرین منافع‌لری گیزله‌نن چاغیریشلار جمعيتی باشینا گؤتوردویو زامان کوتله‌نی بوروموش ائیفورییا قارشیسینا چیخماق، حیاتین بسیط حقیقت‌لرینی یادا سالماق، قوندارما ایدئالاری پرن-پرن ائتمک جسارت ایسته‌ییر ساده اینسانلاری هدفه آلان اییرنج تبلیغات اونلاری اصل حیاتی، ریفاهی، فراوانلیغی اونودوب، ظولمه خیدمت ائدن جفنگ ایدئالار اوغروندا فداکارلیق ائتمه‌یه سسله‌ینده یئگانه اومید یئری حقیقت جارچیلاری اولور. اونلار کوتله‌لرین گؤزونه اوفورولموش کولو تمیزله‌مه‌لی تبلیغات اویوشدوروجوسونون تأثیریندن آییلتمالی‌دیلار. گوجلولرین رادیولاری، قزئت‌لری جهالت توخومو سپنده، آیدینلیغا قارشی حیله‌‌گر اوصوللارلا موباریزه آپاراندا، دونیوی تحصیلی مؤوهومات‌لا عوض ائتمه‌یه بشری ده‌یرلری گؤزدن سالماغا چالیشاندا ایره‌لی چیخیب! «دایانین» دئمک چوخلارینین جورتی چاتان ایش دئییل. آمما بونو موطلق ائتمک لازیمدیر و یاخشی کی، آز سایدا اولسا دا، حقیقت جارچیلاری واردیر.
موباریزده مغلوب دوروما دوشنلرین مغلوبییتین گئرچک سبب‌لری باره‌ده حقیقتی سؤیله‌مه‌سی ده جسارت طلب ائدیر. تعقیب اولونان اینسانلار چوخ واخت اؤز سهولرینی گؤرمک، درک ائتمک قابیلیتینی ایتیریرلر. تعقیب اونلارین گؤزونده شرعین تظاهورو، تعقیب‌چی‌لر ایسه شرعین داشییی‌جی‌لاری کیمی گؤرونور. اؤزلرینی فضیلت‌لی سانیر و یالنیز بونا گؤره تعقیب اولوندوقلارینی دوشونورلر. آمما اونلارین خئییر اوغرونا موباریزه‌سی ایفلاسا اوغراییب، دئمه‌لی، ضعیف، یارارسیز، توتارسیز اولموشدور. حئساب ائتمک اولماز کی، نملیشلیک یاغیشین طبیعی خاصه‌سی اولدوغو کیمی، ضعیفلیک ده خئییرین عضوی خاصه‌سی‌دیر. بئله یئرده مردلیک طلب اولونور اعتراف ائتمه‌یی: «بیز اودوزدوق اونا گؤره یوخ کی، خئییر ایشی مودافعه ائدیردیک، اصلا، بیز اودوزدوق اونا گؤره کی، ضعیف ایدیک.»
حقیقتی یازان آدام شوبهه‌سیز کی یالانلا دایم موباریزه آپارمالی‌دیر، آمما حقیقتی، غلیظ، طمطراقلی موجرد اولمامالی‌دیر. چونکی بونلار یالانین خاصه‌لری‌دیر. حقیقتین دیلی ساده و آنلاشیق‌لی‌دیر. چونکی اونون یالنیز بیر قاپیسی وار– راسیونال دوشونجه! یالان ایسه اینستینکت‌لری حیس‌لری احتیراص‌لاری هدفه آلیر، اونلاری اسیر گؤتورمه‌یه یؤنلتمه‌یه چالیشیر. ائله بونا گؤره، یالان یالنیز جهالت اوزه‌ریندن بویلانا، یالنیز حقیقتی دفن ائتمک‌له اؤز مقصدینه وارا بیلر. دئینده کی، «بو آدام حقیقتی سؤیله‌ییر»، نظرده توتولور کی، بونا قدر بیر چوخلارینین دانیشدیقلاری یالان و یا آنلاشیلمازلیق ایدی، باخ بو آدام ایسه دوغرو دانیشیر، یعنی نسه بیر حقیقی، اینکار اولونماز، پراکتیک اهميتی اولان شئیدن دانیشیر. یالانی اساسلاندیرماق اوچون یوزلرله قوندارما دلیل ایره‌لی سوروله بیلر، فقط بیرجه آشکار ائمپیریک دلیل اونو آلت-اوست ائتمک اوچون کفایت‌دیر.
سؤز آزادلیغی نیسبتا مؤحکم برقرار اولموش اؤلکه‌لرده دونیانین عئیبه‌جرلیک‌لرین قابا گوجون حاکیميتینه قارشی عومومی سؤزلرله شیکایت‌لنمک، ساغلام دوشونجه‌نین بیر گون موطلق قالیب گله‌جه‌یینی بیان ائتمک بؤیوک جسارت طلب ائتمیر. آمما بیر چوخلاری اؤزونو ائله آپاریر، سانکی، بونلارا قارشی توپ لوله‌لری توشلانمیشدی هرچند توشلانان ساده‌جه تئاتر دوربینی‌دیر. اونلار اوچون حقیقت گلیشی گؤزل سؤزدن باشقا بیر شئی دئییلدیر. رقملرده آز قالا دیل آچیب دانیشان، فاکتلاردا هارای سالان حقیقت‌لری اونلار نه ایسه گؤره بیلمیرلر، چونکی بونون اوچون چالیشماق، آراشدیرماق، اؤزونه زحمت وئرمک لازیمدیر. آمما بو، اونلاری جلب ائتمیر. ظاهرا بو آداملار حقیقت عاشقی کیمی گؤرونسه‌لر ده، اصلینده موهوم حقیقت‌لردن چوخ اوزاقدیلار. اونلار بوتون دونیایا قارشی طلب‌لر ایره‌لی سورور. عدالت طلب ائدیر، هرچند عدالتین تامینی اوچون عومومی سؤزلردن باشقا هئچ نه ائتمیرلر، عکسینه، دونیانین عدالت‌سیزلییی فونوندا یارانان قنیمت‌لردن اونلارا دا یاغلی تیکه‌لر چاتیر. بلکه، ائله بونا گؤره اونلارین فعالیتی قورو سؤزلردن او یانا کئچمیر.
۲. حقیقتی درک ائتمه‌یه گرک اولان عاغیل
حقیقت هر یئرده بوغولور، بو اوزدن حقیقتی یازماق چتین‌دیر. آداملارین اکثریتی بئله حساب ائدیر کی، حقیقتی-یازیب یازماماق بیر تک اینسانین کاراکتئریندن، یعنی جسارتلی اولوب-اولماماسیندان آسیلی‌دیر. بونونلا اینسانلار حقیقتی یازماغین ایکینجی موشکولونو – حقیقتی آختاریب تاپماغین چتین اولدوغونو نظره آلمیرلار. حقیقتی آختاریب تاپماق او قدر ده آسان مسئله دئییل.
هر شئیدن اول، محض هانسی حقیقت‌لردن دانیشماق گرکلییینی آیدینلاشدیرماق لازیمدیر. مثلا دونیانین بیر چوخ اؤلکه‌لرینده دئسپوتیک قوووه‌لر حاکیميت‌ده قالماق، اؤز ثروت‌لرینی آرتیرماق و قورویوب ساخلاماق اوچون هر جور حاق‌سیزلیق ائدیرلر. زامانی گلینجه بونون پارتلاییشا سبب اولاجاغی، اؤلکه‌نین عاقیبتینی سوال آلتینا دوشورجه‌یی بیر حقیقت‌دیر و تاریخا سای‌سیز دفعه‌لرجه ثبوتا ائتمیشدیر. بو حقیقتی درک ائتمک اوچون تاریخدن معلوماتلی اولماق، دئسپوتیک حاکیميت‌لرین قانلی ایمپئرییالارین نییه سوقوط ائتدییینی اؤیرنمک و گونوموزله موقایسه ائدیب نتیجه‌لر چیخارماق کیفایت‌دیر. بیر حقیقت داها وار کی، بوتون دئسپوتلار باشقالارینینی عاقیبتینی اؤیره‌نیب، اونلارین سوقوطونا آپاران سهولری تکرار ائتمه‌مه‌یه چالیشماقلا اؤزلرینی قورویا بیله‌جکلرینی ظن ائدیرلر. اونلار اونودورلار کی، یانلیش یول همیشه یئنی، اوللر گؤرونمه‌میش ایداره اولونماز وضعيت‌لر وعد ائدیر. هئچ کیم اؤزونو بوندان سیغورتا ائده بیلمز.
باشقا حقیقت‌لر ده وار، مثلا، «استول اوتورماق اوچوندور»، «یاغیش یئره گؤیدن یاغیر» و سایر بو قبیلدن. بیر چوخ یازیچی‌لار بیزه محض بئله حقیقت‌لردن دانیشیرلار. اونلار باتان گمی‌نین گؤیرته‌سینده دیوارلارا ناتورادان رسم چکن رساما بنزه‌ییرلر. بئله یازیچی‌لار اوچون بیزیم بوردا بحث ائتدیییمیز پروبلئم‌لر آکتوال دئییل، گومان ائله بونا گؤره اونلارین ویجدانی چوخ ساکیت گؤرونور. دونیانین عدالتسیزلیک‌لرینه اعتیناسیز اولان بو آداملار ظولمه معروض قالانلارین هارایینی ائشیتمزدن گله‌رک ساکیتجه دایانیب اؤز رسملرینی چکمک‌له مشغولدولار. اؤز داورانیشلارینین معناسیزلیغی اونلاردا «درین پئسسیمیزم» دوغورور کی، بو دا اونلارا هئچ ده منفعت‌سیز باشا گلمیر. بو پئسسیمیزمین اؤزونو ده دوغوران حقیقت یالنیز او آداملارا عیاندیر کی، کناردا دایانیب همین رساملاری و اونلارین ایشینی موشاهیده ائدیرلر. موشاهیده اونو گؤستریر کی، اونلارین گؤتور-قوی ائتدییی حقیقت‌لر استول و یاغیش حقیقت‌لریندن اوزاغا گئتمیر: «یاغیش یئره گؤیدن یاغیر، والسلام، بیز هئچ نه ائده بیلمریک.»
دیگر بیر کاتئقورییا یازیچی‌لار وار کی، اونلار موهوم حقیقت‌لری قلمه آلماق ایسته‌ییر و نه گوجلولرین غضبیندن، نه ده محرومییت‌لره دوچار اولماقدان چکینمیر، بونونلا بئله، موهوم حقیقت‌لره وارا بیلمیرلر، چونکی بونون اوچون ضروری بیلیک‌لره صاحب دئییللر. بو آداملار کؤهنه‌دن قالما بلاغت‌لی شوعارلارین، اؤن یارغی‌لارین اسیریدیر، اونلارین تأثیریندن هئچ جور چیخا بیلمیرلر. دونیادا باش وئرن پروسئس‌لر بئله آداملار اوچون چوخ قلیظ‌دیر. اونلار لازیمی فاکتلاری بیلمیر، حادثه‌‌لر آراسیندا سبب علاقه‌‌لرینی گؤرمورلر. بیر تک مردانه موحاکیمه‌لرله ایش بیتمیر. گرکدیر کی، بیلیک‌لر الده ائدیب، شرایطه اویغون مئتودلاردان ایستیفاده ائده‌سن. ایری میقیاس‌لی ده‌یشیکلیک‌لرین یاشاندیغی موعاصیر دؤورده یازی قلمه آلان هر کس دیالئکتیکایا، منطیقه، اقتصادی رئاللیقلارا، تاریخه گره‌یینجه بلد اولمالی‌دیر. عزم‌کارلیق گؤسترمک‌له لازیمی بیلیک‌لری کیتاب‌لاردان و رئال هاتدان اخذ ائتمک مومکوندور. داها ساده اوصوللارلا دا بیر چوخ حقیقت‌لری آشکار ائتمک نصیب اولور. بونلار عادتا بؤیوک حقیقت‌لرین «دئتاللاریدیر»، اونلاری توپلاییب، علمی مئتودلارلا تحلیل ائده‌رک پروسئس‌لره کؤکلو آیدین‌لیق گتیرمک اولار. آختاریشلارین محصولدار اولماسی اوچون مئتودلار دوزگون سئچیلمه‌لی‌دیر. بو، چوخ واجیبدیر. البته، ائله شئی‌لر وار کی، اونلارلا خوصوصی مئتودلار تطبیق ائتمه‌دن حتی آختارمادان دا قارشیلاشیریق. بعضی یازارلار محض بئله خوشبخت تصادوف‌لره اومود بسله‌ییر، گونده‌لیک خبرلری نظردن کئچیرمک‌له هانسیسا حقیقت‌لرین ماهیتینه واردیقلارینی دوشونورلر. لاکین نظره آلینمالی‌دیر کی، مطبوعات‌دا یئر آلان خبر و معلوماتلار یالانلا دولو اولور. بئله‌جه، خیردا فاکت‌لارین دالینجا دوشن آداملار بؤیوک حقیقت‌لره یاخین دوشه بیلمیر، بونا گؤره ده، اؤز پوبلیکاسینی کونکرئت تظاهورلرله باغلی دوغرو معلوماتلاندیرماق نئجه داورانمالی، اولدوقلارینی بیلدیرمک ایمکانیندا اولمور. آنجاق مسئله تک بونولا دا بیتمیر حقیقتی آشکارلاماق ایستعدادی و یازماق جسارتی اولان آداملار داها اوچ چتینلییین عهده‌سیندن گلمه‌لی‌دیلر.
۳. حقیقتی دؤیوش سلاحینا چئویرمک باجاریغی
صؤحبت اینسان فلاکت‌لرینه یول آچان تظاهورلردن گئدیرسه، یاییلان فیکیرلرین پراکتیک اهميتی اولمالی‌دیر. پراکتیک نتیجه‌لر حاصیل ائتمه‌ین و یا یانلیش نتیجه‌لر دوغوران فیکیرلره میثال اولاراق، گئنیش یاییلمیش بو موحاکیمه‌نی گؤستره بیلریک کی، گویا، بعضی اؤلکه‌لرده مؤوجود اولان دؤزولمز رئژیملر باربارلیقدان ایره‌لی گلیر. بو قناعته گؤره، فاشیزم باربارلیق دالغاسی‌دیر سؤوق-طبیعی حادثه‌‌دیر. گویا، فاشیزم کاپیتالیزم و سوسیالیزم‌له یاناشی مؤوجود اولان(یاخود اونلاردان اوستون اولدوغونا ادعا ائدن) اوچونجو، فرقلی بیر سیستم‌دیر. آمما بونو یازانلار یا بیلمه‌دن یا دا غرضلی اولاراق واجیب بیر حقیقتی گیزله‌دیرلر. حقیقت بودور کی، فاشیزم گؤیدن دوشمه دئییل، انحصارچی کاپیتالیزمین سایه‌سینده مئیدانا گلمیشدیر؛ ماهیت اعتباری ایله کؤهنه ایله یئنینین اؤزونه مخصوص سنتزی‌دیر. بئله اولان حالدا، فاشیزمی لعنت‌له‌ین، لاکین اونو دوغورموش سببی انحصارچی‌لیق‌دا گؤرمه‌ین‌لرین یازدیقلاریندا پراکتیک تطبیق اوچون فایدالی نه اولا بیلر؟ بو آداملارین فاشیزمله باغلی فیکیرلری اونا بنزه‌ییر کی، بعضی آداملار کیمی، دانا اتینی ایشتاهایلا یئییر آمما دانالارین کسیلمه‌سینه قارشی باریشمازدیلار. اونلار اتی چوخ خوشلاییر، لاکین قان گؤرنده دیکسینیرلر. قوی، قصّاب اونلارا ات وئرمزدن اوّل اللرینین قانینی یاخشی-یاخشی یوسون، بو اونلاری تامامی‌له قانع ائدر. اونلار باربارلیغی دوغوران انحصارچی مولکیت موناسیبت‌لرینه قارشی دئییللر، ساده‌جه، باربارلیغا قارشی‌دیلار. اونلار باربارلیغی لعنت‌له‌ییر. حال‌بوکی اؤزلرینین یاشادیق‌لاری اؤلکه‌لرده ده باربارلیغا یول آچان انحصارچی‌لیق حؤکم سورور، یئگانه فرق بودور کی، هله‌لیک اونلارین قصابی اتی ترزییه قویمازدان اول اللرینین قانینی یویور.
باربار رئژیم‌لرینین گورولتولو ایفشالاری اولا بیلسین موعين دؤور عرضینده هانسیسا فایدا وئریر، فقط او زامانا قدر کی، بونو ائشیدنلر اؤز اؤلکه‌لرینده عینیسی‌نین باش وئرمه‌یه‌جه‌یینه امین اولورلار. ایندی بیر سیرا اؤلکه‌لر حاکم مولکیت موناسیبت‌لرینی نیسبتا دینج اوصوللارلا قورویوب ساخلاییر، دئسپوتیک رئژیملی اؤلکه‌لرده‌کی کیمی آچیق-آشکار زوراکیلیغا یول وئرمیرلر. بو معنادا دئموکراتییا اونلاری خلاص ائدیر. آمما بیر حده‌دک، زاوودلار، شاختالار، تورپاقلار اوزه‌رینده انحصارچی مولکیت حوقوقو هر یئرده باربارلیغا سبب اولور، هرچند دموکراتیک اؤلکه‌لرده بو، او قدر ده نظره چارپمیر. باربارلیق اؤزونون گئرچک سیماسینی او واخت گؤستریر کی، انحصارچی‌لاری مودافعه ائتمک اوچون بیر باشا زوراکیلیقدان غئیری یول قالمیر. نئجه کی، بونو حال-حاضردا بیر چوخ اؤکله‌لرین تیمثالیندا ایزله‌ییریک.
بعضی اؤلکلرده اهالینین مولکی حوقوق تأمیناتلارینی انحصارچی‌لیغا قوربان وئرمک ضرورتی یاشانمیر، بو اؤلکه‌لر علمین، اینجه‌صعنتین، فلسفه، ادبيات و دیگر ضروری ساحه‌‌لرین اینکیشافینا زمین یارادا بیلیب‌لر. اونلار دیگر اؤلکه‌لردن قاچیب گلمیش، اؤز وطنینی بئله ضرورت‌لرین اولمادیغینا گؤره گوناهلاندیران آداملاری خوصوصی هوسله دینله‌ییرلر آمما گئرچکدن ناراحات اولدوقلاری اوچون دئییل، بوندان همین اؤلکه‌لره قارشی ایستیفاده ائتمک فایدالانماق نيتی ایله یازیرلار کی، دئسپوتیزم باربارلیقدان دوغولور، اونون کؤکونو کسمک اوچون اخلاقی تکمیللشمه واجیبدیر. بونا ایسه یالنیز آیدینلانما[اینلایتمئنت] یولو ایله نایل اولماق مومکوندور. بوتون بونلار عوموم سؤزلردیر. اونلار اؤزونده هئچ بیر کونکرئت حرکت تعلیماتی عکس ائتدیرمیر. ماهیت اعتباری ایله هاوایا دئییلمیش سؤزلردیر. آیدینلانمانین بیر چوخ بلالاردان خوصوصاً جهالتدن قورتولوشون اساس یولو اولماسی باره‌ده یوز ایللردیر یازیلیر. لاکین ایداره اولونان کوتله‌لرین آیدینلانماسینا بوتون مومکون واسطه‌‌لرله مانع اولان دئسپوتیک باربار رئژیملره قارشی نئجه موباریزه آپارمالی آیدینلیغی عوام کوتله‌لر ایچری‌سینه نئجه سیزدیرمالی باخ، بو باره‌ده اونلارین تصوورو سانکی یوخدور یا دا بونو گئرچکدن آرزو ائتمیرلر.
اونلارین موحاکیمه‌لری سبب زنجیرینین یالنیز بیر قیسیم حلقه‌‌لریندن بحث ائدیر و بونو دا آپاریجی قوووه‌لرین سؤوق طبیعی لابود باربار ماهیتی ایله ایضاح ائدیرلر. بئله موحاکیمه‌لر موهوم حقیقت‌لرین اوزه‌رینه دومان کیمی، چؤکرک گئرچک‌ده اولانلاری گیزله‌دیر. آمما دقت‌لی بیر باخیش کیفیت‌دیر کی، دومانلیغین آرخاسیندا گیزله‌نن اینسانلاری – فلاکتین اصل سبکارلارینی گؤره بیله‌سن. بیزیم دؤوروموزده اینسان طالع‌لرینی حل ائدن یالنیز یوکسک منصب صاحبی اولان اینسانلاردیر. باربارلیغی تؤره‌دن ده اونلاردیر. اهالینین آیدینلانماسینین قارشیسینی آلماقلا بئیین‌لره تحصیل یئرینه جهالت یئریتمک‌له اونلار هم خالقی، هم ده سون نتیجه‌ده اؤزلرینی چیخیلماز وضعیته سالیرلار. اینسان اولدوغونو درک ائدن سؤزونو چکینمه‌دن دئین اینسانلاری تعقیب ائتمک‌له اونلار دونیوی ترقی‌نین قارشیسیندا مانعه چئوریلیرلر. بو، چایین قارشیسینی بندله تامام کسمک جهدینه بنزه‌ییر موعين زامان عرضینده باشاریلی اولا بیلرلر. او زامانا قدر کی، قارشیسینی کسدیک‌لری چای شیشیب دریایا دؤنه‌جک قورولموش بندلری اؤزلری قاریشیق سوپوروب آپاراجاقدیر. چای گئج-تئز دنیزه قوووشاجاق، بند قورماقلا پروسئسی ساده‌جه لنگیده بیلرلر. عینا، خالقلارین ترقی‌سینی ده یالنیز بیر مدته لنگیتمک مومکوندور. بونونلا دئسپوتلار هم خالقی دونیوی ترقیدن گئری سالیر، هم ده اؤز گله‌جه‌یینی سوال آلتینا قویورلار.
بیر تمایول داها وار، چوخ یازیلاردا بیز موهوم حقیقت‌لرین دئییل ده، ایکینجی درجه‌‌لی نسنه‌لرین تصویرینه شاهید اولوروق. بونلار یوخاریدا گؤستریلن یاغیش یا استول میثالی کیمی عملی ایشه یارامایان چرن-پرندیر. میثال اوچون توکیونو داغیدان گوجلو زلزله‌‌دن سونرا آمریکانین بیر چوخ ژورناللاری شهرین خارابالیقلارینی عکس ائتدیرن فورولار یئرلشدیرمیشدی. فوتولاردان بیرینین اوزه‌رینده بئله بیر یازی واردی: «پولاد داوام گتیردی!» محض بو یازینی اوخودوقدان سونرا همین فوتودا خارابالیقلار ایچینده اوچمامیش بیر نئچه هوندور بینا نظره چارپیر هرچند همین قئید اولمادان ایزله‌ییجی‌لر فوتولارداکی بیر-ایکی بینانین اوچمادیغینا خوصوصی دقت یئتیرمزدی. مسئله ده ائله بودور. بیر چوخ یازیچی‌لار محض بئله ایشلرله مشغولدور. زلزلهنین سبب‌لری، مینلرله اینسانین فاجعه‌‌سی پولادین داواملیلیغینا حئیرت قارشیسیندا آرخا پلانا کئچیر، سانکی بو فاجعه‌‌ده ان ماراقلی شئی بعضی بینالاردا پولاد-بئتون سوتون‌لارینین زلزله‌‌یه داوام گتیرمه‌سی اولموشدور. البته، زلزلهنین تصویری ایله باغلی یازیلارین چوخلوغونا رغما، گئرچک اهميت داشییان هانسیسا فرضيه‌لر دئییل، تورپاغین یئرده، ده‌ییشمه‌سینی یئرآلتی تکانلارین گوجونو و یارانان تئمپئراتورو حسابا آلماقلا، زلزله‌‌یه داواملی بینالار تیکن اینشعاتچی-موهندیس‌لرین فیکیرلری‌دیر. بشریتین عئینی فاجعه‌‌لرله بیر داها راستلاشماماسی یاخود راستلاشسا دا، اوردان داها آز زیانلا چیخماسی باخیمیندان، ژورنال یازیلاریندا پولادین داواملیلیغی ایله باغلی ایفاده اولونان حئیرت دئییل، گئرچک علمی بیلیک‌لر اهميت کسب ائدیر. عینی ایله، فاشیزم موحاریبه‌‌لر، دئسپوتیزم حاقیندا یازانلار دا چالیشمالی‌دیر کی، اونلارین فیکیرلرینین هانسیسا پراکتیک اهميتی اولسون. اونلار گؤسترمه‌لی‌دیلر کی، بیر چوخ فلاکت‌لر محض ایستحصال واسیطه‌لرینی انحصارا آلمیش قوووه‌لرین دویومسوز آمبیسیالاری اوجباتیندان مئیدانا گلیر، بوندان حیاتی باهاسینا زیان چکن‌لر ایسه یوز مینلرله ساده اینسانلار اولور.
خوصوصا، دئسپوتیک باربار رئژیملری باره‌ده یازانلار کئچمیشدن قالما حاضر و یانلیش موحاکیمه‌لردن ال چکمه‌لی باربارلیغا یول آچان سبب‌لری چؤزمه‌یه چالیشمالیدیرلار کی، اورتایا قویولان فیکیرلر سایه‌سینده بو جور قئیری-اینسانی رئژیملره قارشی موباریزه آپارماق مومکون اولسون. عادتا دئسپوتیک رئژیملر باره‌ده بهانه کیمی گتیریلن «هر بیر خالق اؤز حاکیميتینه لاییق‌دیر» کیمی موحاکیمه‌لر دئسپوتیک رئژیملره حاق قازاندیرماقدان، موباریز اینسانلاری روحدان سالماقدان باشقا هئچ نه‌یه یارامیر، اونا گؤره ده، کؤهنه ايامدان قالان، باربارلارین ایشینه یارایان بو جور فیکیرلری بیردفعه‌لیک سیلمک لازیمدیر.
آردی وار…
قایناق: کولتورا سایتی
