اوکتیابرین ۲۶-دا آذربایجان رئسپوبلیکاسی پرئزیدئنتی ایله تورکیه پرئزیدئنتی فضولی بین‌الخالق هاوا لیمانینین آچیلیشینی ائتدیلر. بو لاییحه آذربایجان قاراباغی ایشغالدان آزاد ائتدیکدن سونرا باشلادی و ۸ آی هاوا لیمانینین بوتون ایش‌لری بیتیب ایستفاده‌یه حاضیر اولدو. لاییحه‌لر هر زامان بئله سورعتله اولمور. قونشو اؤلکه ایران‌دا ایسه اردبیل-میانا دمیریولو ۱۶ ایلدیر کی تاماملانمیر.
میانادان گلیب موغانی آشاجاق اولان دمیریولو اردبیلی آشا بیلمیر
کئچمیش حکومتین دؤنه-دؤنه وئردیی وعده‌لره اساساً ایندییه اردبیل-میانا دمیریولو ایستیفاده‌یه وئریلمه‌لی ایدی. اردبیل-میانا دمیریولو لاییحه‌سینین ایجراسینا ۱۳۸۴-جو ایلده باشلاسالار دا، بو تاریخدن ۱۶ ایل کئچسه ده، لاییحه موختلیف حکومت‌لری گؤرسه ده هله کی سونا چاتماییب. عمومی اوزونلوغو تقریباً ۱۷۵ کیلومتر اولان اردبیل-میانا دمیریولوندا عمومی اوزونلوغو جمعی ۲۳۸۱۰ متر اولان ۶۲ تونل و ۴ کیلومتر دره اوستو کؤرپو، ۳ کیلومتر ده سو اوستو کؤرپو تاماملانیب. اردبیل میللت وکیلی صدیف بدری‌نین دئدیینه اساساً قطعی‌لشمیش بیر باشقا لاییحه‌ده اردبیل-میانا دمیر یولو پارساآبادا و اورادان دا آذربایجان رئسپوبلیکاسینین دمیریولونا قوشولاجاقدیر.
اردبیل میللت وکیلی صدیف بدری‌نین دئدیینه اساساً قطعی‌لشمیش بیر باشقا لاییحه‌ده اردبیل-میانا دمیر یولو پارساآبادا و اورادان دا آذربایجان رئسپوبلیکاسینین دمیریولونا قوشولاجاقدیر.
ایرانین کئچمیش پرئزیدئنتی حسن روحانی ۱۲-جی پرئزیدئنت سئچکی‌لری عرفه‌سینده، داها دوغروسو ۲۷ مای ۲۰۱۷-جی ایلده اردبیلین تختی ایستادیوموندا «بیز ۱۲-جی حکومتده قاطار فیتینین سسینی اردبیل‌ده ائشیده‌جه‌ییک» دئدی. اوّلکی حکومتده یول و شهرسالما ناظرینین معاونی اولان محمود غفاری بو ایلین اییون آییندا لاییحه‌نی یوخلایاراق، لاییحه‌نین بو ایلین سونونادک قورتاراجاغی وعده وئریب.
گؤزله‌مکله تاماملانمایاجاق اولان لاییحه
بوندان اوّلکی وعده‌لرین بیرینده حتی دمیریولونون ایشه باشلایاجاغی تاریخی گؤسترمک اوچون اردبیل شهرینده بیر گون‌سایار مانیتور قویولموشدو. بو مانیتورا اساساً اردبیل-میانا دمیریولو، بو ایل سئنتیابرین ۵-ده ایستیفاده‌یه وئریلمه‌لی ایدی. آنجاق گؤسته‌ریلن تاریخده دمیریولو حاضیر اولمادیغی اوچون آچیلیشین تعیین ائدیلدیگی گونده مانیتور سؤندورولدو.
گؤسته‌ریلن تاریخده دمیریولو حاضیر اولمادیغی اوچون آچیلیشین تعیین ائدیلدیگی گونده مانیتور سؤندورولدو.
حاظیرکی یول و شهرسالما ناظری روستم قاسمی اردبیلین تسنیم خبر آژانسی موخبیرینه وئردیگی موصاحیبه‌ده بیلدیریب کی: «بو گونه قدر اردبیل-میانا دمیریولوندا ۸۲ کیلومتر ریل چکیلیب و بو خطین ۸۷ فایزی حاضیر اولدوغو اوچون یولون ۲۰۲۲-جی ایلده بوتونلوکله تاماملاناجاغی گؤزله‌نیلیر.». داها سونرا ایسه او علاوه ائدیب کی: “ایندییه قدر بو لاییحه‌یه ۲۸۰۰ میلیارد تومن پول آیریلیب. بو ایسه بو گونه اولان مزه‌ننه ایله ۹۰۰۰ میلیارد تومن ائدیر. لاییحه‌نی تاماملاماق اوچون علاوه ۱۸۰۰ میلیارد تومن ده لازیم‌دیر.”
یئنی پرئزیدئنت ابراهیم رئیسی‌نین اردبیل سفری
ایران رئسپوبلیکاسینین پرئزیدئنتی آیت‌الله رئیسی اردبیله سون سفرینده اردبیل-میانا دمیریولو لاییحه‌سی حاقیندا بونلاری دئییب: «اردبیل دمیریولو گرک بوندان داها چوخ اول سونا چاتاردی. آنجاق تأسف کی بو لاییحه ایکی اون‌ایللیک‌دیر کی داوام ائدیر.» داها سونرا سؤزونون داوامیندا علاوه ائدیب: تخمین ائتدییمیزه گؤره اوزاغی بیر ایل یاریما لاییحه باشا چاتاجاق و اردبیل دمیریولونون آچیلیشی باش توتاجاق. دمیریولونون اینشاسی دئدیگیم واختدان تئز بیتمه‌لیدیر. من ساده‌جه دقیقلیک اولسون دئیه بیر‌آز اوزون واخت دئییرم.»
تخمین ائتدییمیزه گؤره اوزاغی بیر ایل یاریما لاییحه باشا چاتاجاق و اردبیل دمیریولونون آچیلیشی باش توتاجاق.
