بو گون‌لرده غربی آذربایجان ایالتینده یوز مینلرله تون آلمانین یول‌لارین قیراغینا، اورمو گؤلونون ساحل‌لرینه تؤکولدویو موشاهیده ائدیلیر. خصوصی ایله اورمیه شهریندن یاییلان ویدئولار سوسیال مئدیادا رئاکسییالارا سبب اولوب. لاکین بو ایلک دئییل. بئله گؤرونتولر اساساً پاییزدا موختلیف ایل‌لرده ده یاییلیب. اینسان‌لار یئتیشدیردیکلری آلمانین هدر اولدوغونو، ساتا بیلمدیکلرینی، نتیجه‌ده آتمالی اولدوقلارینی گونده‌مه گتیریرلر.
اورمودا آلما باغی اولان بیر وطنداش دئییر کی «آلمانی دردیریب یئشیک‌لره(سبدلره) ییغیب بازارا آپاریب موفته‌یه ساتماقدانسا اؤزوم ال آغاجی ایله قیسا بیر واختدا آلمالاری تؤکوب میوه‌لردن باشقا محصول‌لار دوزلدن شیرکت‌لره اوجوز قیمته ساتیردیم. آنجاق ایندی بو دا گلیر گتیرمیر و ایندی من قوهوم‌لاردان خواهیش ائدیرم کی آغاجداکی آلمالاری دریب اؤز احتیاج‌لاری اوچون ائوه آپارسینلار.»
صنعتی آلمالاردان کومپوت، مربا و دیگر محصول‌لار ایستحصال ائدیلیر و بورا وئریلن آلما کئیفیتینه گؤره اوچونجو درجه‌لی ساییلیر. طبیعی و غیری طبیعی عامل‌لر نتیجه‌سینده اوچونجو درجه‌لی آلما ایستحصالی چوخالیب. سوروملو قوروم‌لار ایسه بو آلمالارین اویغون قیمته آلیناجاغینی وعد ائتسه‌لر ده وعده‌لرینی یئرینه یئتیرمه‌ییبلر.
آلمانین یئتیشمه‌سی اوچون بول سویا احتیاج وار. غربی آذربایجان ایالتی ایسه اؤلکه‌نین ان چوخ آلما ایستحصال اولونان یئر‌یدیر. عینی زاماندا اورمو گؤلونون قوروماسی دا بورادا سوسوزلوغون اولاجاغینا بیر ایشاره‌دیر. لاکین بونا باخمایاراق غربی آذربایجان ایالتینده آلما ایستحصالی هر ایل داها دا آرتیر. ایللیک آرتیشین اکینچی‌لره گلیر گتیردیگی تصور ائدیلسه ده اصلینده بو بئله دئییل. اورمودا اکینچیلیک ایله مشغول اولان بیر باشقا شخص دئییر کی «حاضیردا اورمونون نازلی بؤلگه‌سینده یئرلی اکینچی‌لر طرفیندن آلما آغاج‌لاری چیخاریلیر»، بو ایسه آلما ایستحصالینین، سو پروبلئمینی داها دا آرتیرماسی ایله برابر یئرلی اکینچی‌لرین گلیرینین دوشمه‌سینه ده سبب اولدوغونو گؤستریر.
یئتیشدیریلن ۱.۳ میلیون تن آلمانین آنجاق ۵.4 فایزی صادیر ائدیلیب
بو ایل ایران‌دا ۴.۲ میلیون تن آلمانین یئتیشدیریله‌جه‌یی پیش‌بینی ائدیلمیشدی. عمومیتله اؤلکه‌ده آلما ایستحصالینا گؤره ایلک یئری غربی آذربایجان ایالتی توتور. غربی آذربایجان والیسی‌نین اقتصادی مسئله‌لر اوزره معاوینی اولان نادر صادقی ایالتده بو ایل تخمیناً ۱.۵ میلیون تن آلمانین یئتیشدیریله‌جه‌یینی اؤن گؤرموشدو.
غربی آذربایجان ایالتی‌نین کئچمیش والیسی صنعتی آلمانین ۱۵۰۰ تومنه آلیناجاغینی وعد ائتمیشدی. اما تسنیم خبر آژانسی‌نین بیلدیردیگینه گؤره حاضیردا ایالت بازارلاریندا آلما سؤز وئریلن قیمتین یاریسینا ساتیلیر.
اکبر کرامتی غربی آذربایجان ایالتی‌نین کند تصروفاتی ناظیرلیگی‌نین باشچیسی حاضیردا ایستحصال اولونموش ۱.27 میلیون تن آلمانین ۹۰۰ مین تن‌ونون طبیعی یئمک اوچون بازاردا ساتیشا چیخدیغینی دئییب. بو ایسه ۴۰۰ مین تون آلمانین اوچونجو درجه‌لی آلما کیمی شیرکت‌لره ساتیلماسی دئمکدیر. بو ایستحصال ائدیلمیش آلمانین تخمینا ۲۷ فایزی ائدیر. یئتیشدیریلن ۱.۳ میلیون تن آلمانین یالنیز 6۵ مین تن-و خاریجی بازارلارا صادیر ائدیلیب کی بو دا ۵.4% دئمکدیر.
او هم ده بو ایل اوچونجو درجه‌لی آلمالارین یول قیراغینا ییغیلماسینین دا قاداغان ائدیلدیگینی دئمیشدی. آنجاق یاییلان فوتولار قاداغانین پوزولدوغونو گؤستریر.
قید ائتمک لازیمدیر کی غربی آذربایجان اؤلکه سوییه‌سینده ان چوخ آلما ایستحصالینا مالیک اولسا دا، کنسانتره کارخانالارینین آزلیغی نتیجه‌سینده اوچونجو درجه‌لی آلمالارین 13 مین تن-و مرکزی ایالت‌لره گؤنده‌ریلیب.
سو بحرانی‌نین اورتاسیندا هدر اولان سولو محصول‌لار
ایرنا خبر آژانسی‌نین غربی آذربایجان ایالتی‌نین یئرآلتی سو منبع‌لرینین جدی شکیلده آزالدیغینی، ایالت سوییه‌سینده تورپاغین گیزلی اؤلوم یاشادیغینی بیلدیریب. بیرلشمیش میللت‌لر تشکیلاتی‌نین ارزاق و کند تصروفاتی تشکیلاتی (فاو)-نین بیلدیردیگینه گؤره ۱ کیلوگرم آلمانین یئتیشمه‌سی اوچون ۷۰۰ لیتر سو ایستیفاده ائدیلیر. بونونلا برابر غربی آذربایجان ایالتینده بو ایل آلما ایستحصالی کئچن ایل ایله موقایسه‌ده چوخالیب. بو آددیم ایسه مؤوجود سو بحرانینا اویغون دئییل.
غربی آذربایجان ایالتینده اکینچیلیک عنعنوی یوللارلا آپاریلیر. ایران‌دا ایچمه‌لی سولارین مصرفینده اکینچیلیک ۹۰ فایزله ایلک پیلله‌ده دورور. بونون اساس سببی ایسه عنعنوی سووارما اصول‌لاری‌دیر. غربی آذربایجان ولایتینده سو ایله باغلی وضعیت آجیناجاقلی اولسا دا بورادا اکینچیلیک مئتودلاری معاصیرلشدیریلمیر، عکسینه هر اؤتن ایل داها چوخ محصولون ایستحصالی اوچون داها چوخ سو ایصراف ائدیلیر. یئتیشن محصولون دا بیر قیسمی آلینمیر دئیه آتیلیر.
