تبریزده ایران خودرو شیرکتینین ایشچی‌لری اعتصاب ائدیبلر. ایران‌کارگر سایتی‌نین وئردیگی معلوماتا گؤره اعتصابین اساس سببی آیری‌سئچکیلیک‌دیر. اعتراض ائد‌نلر ایران خودرو شیرکتینین تبریزده‌کی شعبه‌سینین ایشچیلرینه دیگر شعبه‌لردن فرقلی اولاراق داها آز معاش وئریلدیگینی دئییرلر.
اعتصابا باشلایان ایشچی‌لر نقلیات واسطه‌لرینین بوتون اؤلکه‌ده عینی حده باهالاشدیغینا باخمایاراق ایشچی‌لرین گلیرینین ده عینی حده آرتمادیغینی دئییرلر. اونلار ایران خودرونون تهران‌داکی ایشچی‌لرینین تبریزله مقایسه‌ده داها چوخ ایمتیازا مالیک اولدوقلارینی دا بیلدیریبلر.
15 آبان‌دا باشلایان اعتصاب گئجه واختلارینادک داوام ائدیب. ایش ساحه‌سینده باشلایان اعتصاب شیرکت رسمی‌لرینین ده رئاکسییا گؤسترمه‌لرینه سبب اولوب. اونلار حاضیردا ایشچی‌لرین معاش آزلیغی و عمومیتله هئچ بیر پروبلئمین اولمادیغینی دئییبلر.
یالانلاماقلا بیتمه‌ین ایشچی اعتصاب‌لاری
ایران خودرو اؤلکه میقیاسیندا نقلیات واسیطه‌لری ایستحصال ائد‌ن ایکی بؤیوک شیرکتدن بیریدیر. بو شیرکت تهران‌داکی مرکزی دفتریندن باشقا ۶ بؤیوک کارخانادان عبارت‌دیر. بو کارخانالار شرقی آذربایجان، کرمانشاه، سمنان، رضوی خراسان، مازانداران و فارس ولایتینده یئرلشیبلر.
1399-جی ایلدن ایشه باشلایان تبریز شعبه‌سینده اوخشار سبب‌لره گؤره داها اول ده ایش اعتصاب‌لاری کئچیریلیب. ان سونونجو اعتصاب کئچن ایلین اوکتیابر آیینین ۱۰-دا معاش پروبلئم‌لرینه اعتراض اولاراق باش توتموشدو. بورادا دقت ائدیله‌سی مقام بودور کی، شیرکتین مودیری اولان همین حاجی‌زاد منصور باش توتموش ایشچی اعتصابی‌نین اصلینده آکسییا اولمادیغینی، ساده‌جه ایشچی‌لرین استراحت ائتدیکلرینی ادعا ائتمیشدی. او بو دفعه ده تبریزده یئرلشن خبر آژانس‌لارینین دقتسیز داوراندیقلارینی، اصلینده معاش پروبلئمی‌نین اولمادیغینی قید ائدیب.
کئچیریلن اعتصاب شنبه گونو سحر ساعت ۷-دن باشلاییب. ۵۰۰ ایشچینین ایشتیراکی ایله باشلانان بو اعتصاب گئجه‌یه‌دک داوام ائدیب. اونلار کئچن ایلدن بو ایله‌دک نقلیات واسیطه‌لری‌نین ۵ قات باهالاشماسینا باخمایاراق، ایشچی‌لرین معاشینین آرتماماسینا اعتراض ائدیبلر.
ایشچی‌لر هم ده اورتادا آیری‌سئچکیلیک اولدوغونا اینانیرلار. اونلار ایران خودرو شیرکتینین تبریزده‌کی کارخاناسی‌نین ایشچی‌لرینین دیگر شهرده‌کی کارخانالارین ایشچیلرینه نظرن داها آز معاش آلماقلارینی آیری‌سئچکیلیک نمونه‌سی اولدوغونو قید ائدیبلر.
یاییلان ویدئولاردا ایشچی‌لر کارخانا رسمی‌لرینین سسینی اعتراض ائده‌‌رک کسیر، هانسی‌سا جاوابده شخصین استعفاسینی طلب ائدیرلر.
حاضیردا ایران خودرو شیرکتینین تبریزده‌کی کارخاناسیندا ۱۴۳۰ ایشچی ایشله‌ییر.
