آذربایجان مستقل سینماسینا عایید اولان «آتابای» فیلمی اکران‌لارا چیخیب. فیلم 3 آذرده فیلمین رئژیسسورو نیکی کریمی‌نین ایشتیراکی ایله تبریزده ایلک دفعه نوماییش ائتدیریلیب. تقدیمات گونو چکیلن ویدئو و شکیل‌لره اساساً فیلم بؤیوک ماراق دوغوروب و بؤیوک ایزله‌ییجی کوتله‌سی جلب ائدیب.
بونونلا یاناشی آذربایجانین دیگر کیچیک شهرلرینین ساکین‌لری اعتراض ائدیبلر. اونلار شهرلرینده سینماین اولماماسینا و یا اولان سینمالارین دا باغلی اولماسینا اعتراض ائدیبلر. بو شهرلردن بیری ده مرنددیر. مرندده آکتیو سینما اولمادیغی اوچون شهرین و اطراف بؤلگه‌لرین ساکین‌لری فیلمی ایزله‌مک اوچون تبریزه گئتمه‌یه مجبوردولار.
بو حادثه‌دن اول مهر خبر آژانسی‌نین حاضیرلادیغی خبره گؤره غربی آذربایجاندا یالنیز ۲ سینما فعالیت گؤستریر. سینمالارین هر ایکیسی اورمودا اولدوغو اوچون ویلایتین دیگر شهرلرینده سینمالارین اولمادیغی و یا فعالیت گؤسترمه‌دیگی معلوم اولور.
تورکجه چکیلن فیلم‌لرین آذربایجاندا یاخشی قارشیلانماسیندان سونرا بعضی باشقا آذربایجان شهرلرینده سینمالارین اولماماسی دا گونده‌مه گلیب.
تکجه اصفهاندا گونئی آذربایجانین ۴ ویلایتینده‌کی قدر سینما وار
ایران سینما سایینا گؤره دونیاداکی آمارا اساساً آشاغی یئرلردن بیرینی توتور. دونیا ایستانداردلارینا گؤره هر ۱۰ مین اینسانا بیر سینما اولمالیدیر. ایران‌دا ایسه 1392 آمارلارینا اساسا هر ۳۰۳ مین اینسانا بیر سینما دوشور. هر سینمادا ۱۰۰ اوتوراجاغین اولماغینی نظره آلساق هر ۳۰۳۰ نفره ۱ اوتوراجاق دوشور.
لاکین آمارلارین باشقا طرف‌لری ده وار. ایران‌دا اولان سینمالارین اکثریتی مرکزی ویلایت‌لرده یئرله‌شیر. اساساً فارس‌لارین جمعلشدیگی مرکزی ویلایت‌لرده آدامباشینا دوشن سینما اوتوراجاغی ائل‌جه ده سینما سایی دونیا ایستانداردلارینا یاخین سوییه‌ده‌دیر. فارس اولمایانلارین یاشادیغی اطراف بؤلگه‌لرده ایسه وضعیت داها آجیناجاقلیدیر.
1392 ایلی آمارلارینا گؤره تهراندا ۵۶ سینما و ۱۲۶ کینو سالونو فعالیت گؤستریر. کینو سالون‌لارینین ۵۱-ی اعلا، ۱۹-او بیرینجی درجه‌لی یئرده قالان ۵۶-ی ایسه ایکینجی و اوچونجو درجه‌لیدیر.
تهراندان سونرا عمومیلیکده ۷۸۰۸ اوتوراجاغی اولان، ۱۶ سینما و ۱۹ کینو سالونو اصفهان‌دیر. اوچونجو یئرده ایسه ۶۴۳۱ اوتوراجاغی اولان ۱۰ سینمالی رضوی خراسان ویلایتیدیر.
شرقی آذربایجاندا جمعی ۷ سینما و ۹ کینو سالونو، غربی آذربایجان، اردبیل و زنجاندا ایسه هر بیرینده ۳ سینما وار. بو ایسه اونو گؤستریر کی تکجه اصفهاندا اولان سینما و کینو سالون‌لارین سایی عمومیلیکده آذربایجانین ۴ ویلایتینده یئرله‌شن سینما و کینو سالون‌لاری ایله برابردیر. بوندان باشقا همدان‌دا جمعی 4 سینما و قزوین‌ده ایسه 3 سینما واردیر.
بو آمارلارا اساساً آذربایجان شهرلری دونیا ایستانداردلاری بیر یانا، تهران ایستانداردلاریندان بئله آشاغیدا یئرله‌شیرلر. بو حال تکجه آذربایجاندا یوخ ائله‌جه ده باشقا فارس اولمایانلارین یاشادیقلاری بؤلگه‌لرده ده وار. بو ایسه دؤولتین ایکیلی ایستانداردلارینین گؤستریجیسیدیر.
سونراکی ایل‌لرده سینمالارین سایی آرتیب. لاکین بو آرتیش دا اسکی نیسبتی جیددی شکیلده دییشمه‌میشدیر. 1398 ایلی آمارلارینا اساسن اردبیلده 6، شرقی آذربایجاندا 21، غربی آذربایجاندا 9، زنجاندا ایسه 9 کینو سالونو واردیر. همین ایلده تهراندا 79 و اصفهاندا ایسه 26 کینو سالونو اولوب.
ایران‌دا ایلک سینما تبریزده تیکیلسه ده تبریز ایندی اصفهان سوییه‌سینه بئله چاتا بیلمیر.
