تسنیم خبر آژانسی‌نین یایدیغی معلوماتا گؤره آتابای فیلمی باشقا ۹ فیلمله بیرلیکده آذرین 3-دن اعتباراً کینوتئاترلاردا نوماییش ائتدیریله‌جک. ایکی دیلده (تورکجه-فارسجا) چکیلن بو اثر تانینمیش آکتیور-رئژیسسور نیکی کریمی‌نین ان یاخشی فیلمی کیمی تانینیر.
فیلم اثرین سسئناری مؤلیفی اولان هادی حجازی‌فرین دوغولدو خوی شهرینین یاخینلیغیندا چکیلیب. فیلمین اساس سوژئت خطی رومانتیک موناسیبت‌لر حاقیندادیر. حجازی‌فر فیلمین سسئناریسینی یازماقلا یاناشی بورادا باش رولدا دا چیخیش ائدیب. اوغورسوز سئوگی حکایه‌سی و عائله داخیلی منفی حادثه‌لر نتیجه‌سینده تک قالان کاظیم یئنی بیر سئوگی حکایه‌سینه قدم قویور.
آتابای فیلمی ایلک دفعه ۳۸-جی فجر بین‌الخالق کینوفئستیوالیندا اکران‌لارا چیخیب و ۵ موختلیف جایزه‌یه نامزد ائدیلیب. بو فیلم هم ده نیکی کریمی‌نین ان یاخشی اثری کیمی تانینیر. آتابی فیلمی ایرانین ایلک کینو ژورنالی اولان و سئچیلن کینو تنقیدچی‌لرینین ژورنالی کیمی تانینان آیلیق «فیلم» ژورنالی طرفیندن ۳۸-جی فجر کینوفئستیوالی‌نین ان یاخشی اثری کیمی سئچیلیب.
تورک دیلینین فیلمده خصوصی یئر آلماسی مطبوعات کنفرانسیندا گرگین آن‌لارا سبب اولوب. بیر ژورنالیست اؤلکه‌نین رسمی دیلینین فارسجا اولدوغو حالدا فارسجا آلت‌یازی ایله نمایش ائدیلن اثرلر نه‌یه لازیم‌دیر دئیه‌رک، اثرین تورکجه چکیلیشینه اعتراض ائدیب. بونا ایلک رئاکسییانی ایسه رئژیسسور نیکی کریمی وئریب. او: «کیم دئییب کی بیز بوتون فیلم‌لری تکجه فارسجا چکمه‌لی‌ییک؟ اونسوز دا اؤلکه‌ده فیلم‌لرین ۹۰ فایزی فارسجا چکیلیر.» دئییب. ژورنالیسته ان کسکین جاوابی ایسه اؤزو ده تورک اولان سسئناری مؤلفی هادی حجازی‌فر وئریب. او: « من سیزه سسئناری مؤلفی و بیر تورک کیمی جاواب وئریرم. سیزین دوشونجه‌لرینیز فاشیست دوشونجه‌دیر. بونا تأسف ائدیرم.» دئییب.
کینو تنقیدچی‌لرینین دقتینی جلب ائد‌ن آتابای فیلمی مطبوعات کنفرانسیندا باش وئرن موباحیثه ایله ده گونده‌مه گلدی. فیلمده آذربایجان تورکجه‌سینین اؤنملی یئر آلماسی گونئی آذربایجانلی‌لار طرفیندن ده موثبت قارشیلاناراق دستکله‌نیب.
