6 آذر ۱324-جی ایلده آذربایجان قزئتینده تهرانین یاخینلیغیندا یئرله‌شن شیمشک کؤمور معدنی‌نین آذربایجانلی ایشچی‌لری طرفیندن یازیلمیش بیر عریضه درج ائدیلیب. قزئتین ۶۴-جو ساییندا چاپ ائدیلمیش بو عریضه‌ده معدنده ایشله‌ین آذربایجانلی فهله‌لرین گوناهسیزکن بعضی‌لرینین اؤلدورولدویو، ۳۰ فهله‌نین حبس ائدیلدیگی و چوخ سایدا فهله‌لرین دؤیولوب، غارت اولوندوغو یازیلیب. قزئتین ۶۵-جی ساییندا ایسه میر جعفر پیشه‌وری آذربایجان دموکرات فیرقه‌سی طرفیندن بو عریضه‌یه موناسیبت بیلدیریلیب.
میر جعفر پیشه‌وری‌نین ۶۵-جی سایدا یازدیغی جاواب مقاله‌سینی اتک‌یازی اوخوجولارینا تقدیم ائدیریک.
آذربایجان قزئتی
سایی ۶۵، چرشنبه، ۷ آذر ۱۳۲۴-جو ایل
تهران بو معامله‌ده قازانا بیلمز
کئچن ساییمیزدا شیمشک فهله‌لرینین عریضه‌سینی درج ائتدیک. بو عریضه‌ده تهران حکومتینین آذربایجانلی‌لار ایله ائتدیگی وحشی رفتاردان فاجعه‌لی بیر پرده تصویر ائدیلمیش، بوتون ایران صنایعی و دمیر یول‌لارینی یارادان آذربایجان ایشچی‌لریندن بیر دسته همین عریضه واسطه‌سییله اؤز آنا یوردونا مراجعت ائدیب اؤز دوغما قارداش‌لاریندان کؤمک ایستمیشلردی.
کؤمور معدن‌لرینین قارانلیق و زهرله‌ییجی یئرآلتی دالان‌لاریندا قان تر تؤکن بو فهله‌لری آذربایجانلی اولدوقلارینا و آذربایجان دیلینده دانیشدیقلارینا گؤره تهران دؤولتی‌نین مأمورلاری دؤیوب، ازیب، اؤلدوروب، زیندان‌لارا دولدورماق ایله خالقیمیزدان اینتیقام چکمک ایسته‌ییر.
بونون اوخشاری تهرانین خیابان‌لاریندا و قهوه‌خانالاریندا دا نظری جلب ائتمکده‌دیر. پلیس و اوردو قرارگاهی طرفیندن تحریک و تجهیز ائدیلمیش بیچاق‌چکنلر و باش‌کسنلر ایندی تهرانین کوچه‌لرینده آذربایجانلی شیکارینا چیخیر، سلاحسیز و زحمتکش هموطن‌لریمیزین قانینی آخیتماقدان ذوق آلیرلار.
اینکار ائتمک اولماز کی، آذربایجانلی ۵۰ ایل فارسجا دانیشسا، یئنه ده میللی لهجه‌سینی دییشه بیلمز. مثلاً، دوکتور رضازاده شفق ۴۰ ایل فارس‌لارلا اونسییتده اولوب، عالی مدرسه‌لرده (مکتب‌لرده) فارس ادبیاتی معلمی اولدوغو حالدا، آغزینی آچان کیمی آذربایجانلی اولدوغو آشکارا چیخار. بو جهتدن هئچ بیر آذربایجانلی اؤز میللیت و دیلینی گیزلتمه‌یه قادیر اولا بیلمز. هله فلکه باش ایمک ایسته‌مه‌ییب، اؤز میللی غرورونا ماراغی اولان آذربایجانلی هئچ واخت دیل و میللتینی اینکار ائتمز. اونا گؤره بیچاق‌چکنلر اوچون اونلاری تاپماق و اونلارین کیشی خاصیت‌لریندن ناکیشی کیمی ایستیفاده ائتمک موشکول دئییلدیر.
تهراندان گلن اینانیلمیش آدام‌لاردان بیری دئییردی کی، آرتیق اورادا آذربایجانلی‌لار اوچون یاشاماق غیر-مومکون بیر حالا گلمیشدیر. حتی، ائشیتدیگیمیزه گؤره، کور میر جاواد ایله رضازاده‌یه ده فارس بیچاقچی‌لاری موکافات اولاراق دادلی کؤتک ووروب گؤزه‌لرینین آلتینی قارالتمیشلار.
میللتیمیزه خیانت ائدیب اونو سید ضیا کیمی آلچاقلارا ساتانلاری بیز اؤزوموز تنبیه ائتمه‌یه اوستونلوک وئریریک. اونلارین آذربایجانلی آدینا یادلار طرفیندن تحقیر اولماسی بیزیم خوشوموزا گلن ایش‌لردن دئییلدیر.
اما فهله دسته‌لری و بی‌طرف آذربایجانلی‌لارین، مخصوصا میللی غرور و میللی حیثیتینی حفظ ائتمک ایسته‌ین شرفلی و مرد هموطن‌لریمیزین حقوق‌لارینی مدافعه ائتمکده لاقیدلیک و دقتسیزلیک گؤسترمک، بیزیم عقیده‌میزجه، خیانت‌دیر. اگر تهران بو خائن حرکته تئزلیکله سون قویمازسا، بیز ده همین تدبیرله جاواب وئرمه‌یه مجبور اولاجاغیق.
اگر تهراندا آذربایجان دموکرات فیرقه‌سینه طرفدارلیق و یاخود آذربایجانلیلیق گناهدیرسا، آذربایجاندا اونو گناه حساب ائد‌نلر جانی و خائن حساب اولونوب جزالاندیریلاجاقدیر. ایش بئله گئدرسه، بیز ده خالقیمیزین الینده اولان واسطه‌لردن ایستیفاده ائدیب زیندانا زیندان ایله جاواب وئره‌ریک. تهران ایسه بو معامیله‌دن منفعت آپارا بیلمز.
میر جعفر پیشه‌وری
