سون گونلر اورمو گؤلونون قورودولماسینا اینسانلارین حساسلیغی آرتدیقجا آذربایجانلی مجلیس نماینده‌لرین بیر سیراسی یئنی چیخیشلارینی، بیر سیراسی دا کئچمیشده‌کی اورمو گؤلو حاققیندا چیخیشلارینی یئنیدن پایلاشیب اورمو گؤلونون وضعیتیندن اؤز خیرلرینه یارارلانماق ایسته‌ییرلر. اونلارین بو داوارنیشی آشاغیداکی سببلره گؤره اورمو گؤلونو قورتارماق اوچون یازانمیش ایجتیماعی حرکته منفی تاثیر گؤستریر:
اورمو گؤلونون قورودولماسی‌نین مسئولو بو سیستمدیر، ایستر حاکیمیتی اجرایی، مقننه یا نظارت مسئولیتی اولان قوروملارین هامیسی مسئولدور. مجلیس نماینده‌لری، آذربایجان نماینده‌لری داخیل، ایندیکی وضعیتین مسئولودورلار. اونلار ایندیکی اورمور گؤلو اوچون اولان کمپین و عمومی سفربرلیک(بسیج) شراییطینده قهرمان رولوندا دئییل، مسئولیتسیزلیکلری حاققیندا جواب وئرمه‌لیدیرلر.
حاکیمیت ایللردیر اؤزونون سئچدیگی آذربایجانلی مجلیس نماینده‌لرینی آذربایجان میللی حرکاتی و میللی مسئله حاققیندا اولان حرکتلرده مرجع و رفرانس قروپا چئویرمک ایسته‌ییر. اونلار بونو ائتمکله اورمو گؤلو کیمی مسئله‌لرده قینانمالی اولان حاکیمیتین بؤیوک قیسمینی مسئولیتدن یاییندیرماق و لازیم اولان زامان ایجتیماعی حرکاتیمیزی یؤنلندیرمک و مدیریت ائتمک ایسته‌ییرلر. حاکیمیتین بیزه مرجع قروپ یاراتماسینا ایذن وئرمه‌مک، اونلاری قیناماق و تنقید ائتمک بیزیم گؤره‌ویمیزدیر. بیزیم آدیمیزا حاکیمیتین سئچدیگی مجلیس نماینده‌لرینین اسکی چیخیشلارینی پایلاشماق یئرینه اونلاری ایللرله مسئولیتسیز داوراندیقلاری اوچون تنقید ائتمک لازیمدیر.
هر بیر جمعی اعتیراضین باش توتماسی اوچون اینسانلارین بئنینده پروبلئمین سببی و قینانیلاجاق طرفلر حاققیندا فیکیربیرلیگی و اجماع اولمالیدیر. آذربایجان آدینا مجلیسده اوتورموش بو شخصلر اؤزلرینی آذربایجان تمثیلچی‌سی گؤسترمکله حاکیمیتین بوتونلوگونو دئییل بیر قیسمینی مسئول گؤسترمه‌یه چالیشیرلار. بو وضعیتده آذربایجانلیلارین بیر بؤلومو حاکیمیتین بوتونونو، بیر بؤلومو بعضی اورقانلارینی یا شخصلری سوچلو بیلمه‌یه یؤنله‌لیرلر. بو حالدا دا مجلیس نماینده‌لری اجماع و فیکیربیرلیگی‌نین یارانماسینا مانع اولماقلا جمعی و کوللکتیو حرکته مثلن اعتیراض آکسییاسی کئچیرمه‌یه مانع اولورلار.
ایجتیماعی حرکاتلار حاکیمیتده بیر باشا روللاری اولمادیقلاری اوچون وطنداشلارین جمعی اعتراض گوجوندن ایسته‌دیکلرینی گئرچکلشدیرمک اوچون ایستیفاده ائدرلر. او اوزدن ده اونلارین گوجو اینسانلاری سفربر ائتمه(بسیج ائمکدن) قابیلیتنیدن آسیلیدیر. حاکیمیتی آنجاق بو سفربرلیک گوجو اورمو گؤلونو قورتارماغا مجبور ائده بیلر. آذربایجانلی مجلیس نماینده‌لری سیرالادیغیم سببلره گؤره عمومی سفربرلیگه مانع اولورلار. اونلارین سفربرلیگه زیان وئرمه‌لرینه ایذن وئرمه‌یک.
