اکینچی‌نین یاییملادیغی خبره گؤره، ۱۱ خرداد ۱۴۰۲-جی ایل تاریخینده، اوشاقلارین اولوسلارآراسی مودافعه‌سی گونونده، «یارات» معاصیر اینجه‌صعنت مرکزینده «حدیث» قیسامئتراژلی انیمیشن فیلمی‌نین تقدیماتی کئچیریلیب.
رئژیسورو نذرین آغامالییئو اولان «حدیث» سیموولیک اولاراق قارغالارین حؤکم سوردویو عدالتسیز دونیادا حاق-عدالت اوغروندا موباریزه آپاران گنج قیز حاقیندادیر.
«حدیث» قیسامئتراژلی انیمیشن فیلمی ۱۴۰۱-جی ایلین شهریور آییندا ایران‌دا اعتراض آکسییالاری زامانی تهلوکه‌‌‌سیزلیک قوه‌لری طرفیندن قتله یئتیریلمیش ۲۲یاشلی آذربایجان تورکو «حدیث نجفی»یه حصر اولونوب، ایران‌دا جنسیت، ائتنیک و مدنی آیری‌سئچکیلیکله موباریزه آپارانلارا اتحاف اولونوب.
کئچیریلن بو تدبیرین اولینده موغام سسله‌نیب. تار چالان افقان ایسگندروو، اوخویان میرعلی ساری‌زاده، کامانچا ایفاچیسی فرید بابایئو تاماشاچیلار اوچون «آیریلیق» و «قاراگیله» ماهنیلارینی ایفا ائدیبلر.
فیلمین نومایشیندن سونرا یارادیجی کوماندا ایله سؤال-جاواب بؤلومو اولوبدور. رئژیسور نذرین آغامالییئو، سناریست اسماعیل ایمان، استوری‌بورد رسامی کبری بیننت‌اووا، گرافیک تاساریمجی سئیمور الله‌یارلی و «قوزئی کالیفرنیا آذربایجان مدنيتی مرکزی»نین نوماینده‌‌سی رجب حسن‌بی‌لی تاماشاچیلارین سؤاللارینا جاواب وئریبلر.
یاییملانان بیلگی‌لره گؤره، «حدیث» رسما بو ایلین آننئجی اولوسلارآراسی انیمیشن فیلملری فئستیوالی‌نین موسابیقه‌‌سینه داخیل ائدیلیب. آننئجی فئستیوالی دونیانین ان بؤیوک و آپاریجی انیمیشن فئستیوالی کیمی تانینیر. بو ایلین موسابیقه‌‌سینده «حدیث» ۱۱۲اؤلکه اوزره ۳۲۵۰ فیلم آراسیندان سئچیلیب. قیسامئتراژلی کاتئقورییادا یاریشا جمعی ۷۱ فیلم لاییق گؤرولوب. آننئجی موسابیقه‌‌سینه داخیل ائدیلمک آذربایجان کینو صنعتی اوچون مهم نایلییت‌دیر.
فیلمین یاپیمجیسی رشید آقاملییئو، مصلحتچیسی مسعود پناهی، آپاریجی آنیماتورو آندرئا سئلئشووئردیر، مونتاژچی خورخئ سانجئز کالدئرون، بسته‌کار اوندئژ زاوادیل، سسلندیرن زهره کریمی، رئداکتورو رافیق ممدلی‌دیر. فیلمین پارتیتوراسیندا آذربایجانین مشهور موسیقی‌چیسی سودا علی‌اکبرزاده‌نین موسیقیسی سسله‌نیب.
«آنیمافیلم استودیو» انیمیشن استودییاسی‌نین ایستحصال ائتدیگی «حدیث» فیلمی «قوزئی کالیفرنیا آذربایجان مدنيتی مرکزی»نین Azerbaijan Cultural Society – ACSNC ماليه و ایدئیا دسته‌یی ایله چکیلیب. آذربایجان انیمیشن درنه‌یی، «اکینچی» پلاتفورماسی و «Skwigly» آنلاین انیمیشن ژورنالی فیلمه مئدیا دسته‌یی وئریبدیر.
