«منیم بیر آرزوم وار» مارتین لوتر کینگین ۱۹۶۳-جو ایل ۲۸ آقوست تاریخینده واشینگتندا ائتدیگی مشهور چیخیشین عنوانی‌دیر. ۲۰۰ میندن چوخ دینله‌ییجینین اؤنونده ائتدیگی بو چیخیشدا او گله‌جک آمئریکادا آغ‌دریلی و قارادریلی‌لرین برابر حقوقا مالیک اولماسینی آرزو ائدیب.
آمئریکا دموکراسی‌سینین یارانماسیندا اؤنملی رول اوینایان بو چبخیشی اتک‌یازی اوخوجولارینا تقدیم ائدیریک.
آیری‌سئچکیلیگین بوخوولاری
بو گون خالقیمیزین آزادلیق اوغروندا آپاردیغی و تاریخه دوشه‌جک بؤیوک نوماییشده سیزلرله بیرگه اولدوغوم اوچون شادام.
بیر عصر اول بؤیوک آمئریکالی (آبراهام لینکلن) آزادلیق حاقیندا بیاننامه‌نی ایمضالادی و بیز بو گون اونون عابیده‌سی‌نین کؤلگه‌سینه ییغیشمیشیق. اولدوقجا واجیب اهمیت داشییان بو بیاننامه چورومکده اولان عدالتسیزلیک آلوووندا یانان میلیون‌لارلا زنجی قول‌لارینین اومیدلرینی یئنیدن دیرچلتدی. بو، اونلارین اسیرلیکده اولدوغو همین او اوزون گئجه‌لره سئوینجلی شفق ساچدی.
لاکین بیر عصر کئچسه ده، زنجی‌لر هله ده آزاد دئییللر، بیر عصر اؤتوب، اما هله ده تجرید اولونمانین و آیری‌سئچکیلیگین دمیر بوخوولاری زنجی‌لرین حیاتینی محو ائدیر. بیر عصر کئچمه‌سینه باخمایاراق زنجی‌لر بؤیوک اوقیانوسون یوخسول، کیمسه‌سیز آداسیندا یاشاییرلار. بیر عصر کئچیب، زنجی‌لر هله ده آمئریکا جمعیتی‌نین کونج–بوجاق‌لاریندا ازگین حالینا سالینیر و دوغما وطن‌لرینده اؤزلرینی سورگون اولونموش کیمی حیس ائدیرلر. و بیز بو گون بورا بو اوتانج‌وئریجی دورومو دراماتیکلشدیرمک اوچون توپلاشمیشیق.
معین معنادا بیز بورا بیزه وئریلمیش چئکین اؤده‌نیشینی طلب ائتمک اوچون ییغیشمیشیق. رئسپوبلیکا قوروجولاریمیز ایستیقلالیت بیاننامه‌سینی و کونستیتوسییانین(آنایاسانین) طمطراقلی سؤزلرینی یازاندا، اورادا هر بیر آمئریکالی‌نین ورثه‌لیک حقوقونا صاحیب اولاجاغینی بیلدیرمیشدیر. بو سندده هر بیر کسین، بلی، قارادریلی‌لرین ده، آغدریلیلر کیمی حیات، آزادلیق و خوشبختلیک یولوندا “آیریلماز حقوق‌لار»-لا تامین اولوناجاغینا دایر وعد وئریلمیشدیر. آیدین‌دیر کی، بو گون آمئریکا همین وئکسئل(سفته)-ه سهلنکارلیقلا یاناشیر، وطنداش‌لارین رنگی مسئله‌سی اونو ناراحات ائدیر. بو عهده‌لیگی یئرینه یئتیرمک عوضینه آمئریکا قارادریلی وطنداش‌لارا اعتبارسیز چئک وئردی، بو چئکده ایسه “کیفایت قدر وسایت یوخدور» یازیسی مؤوجود ایدی.
بو آمئریکانین اؤلوم-دیریم مسئله‌سیدیر
لاکین بیز عدالت بانکی‌نین ایفلاسا اوغراماسینا اینانمیریق. بیز بو خالقین آنبارلاریندا آز میقداردا کاپیتال اولماسینا اینانمیریق. بلی بیز بو چئکی نقد ائتمه‌یه گلمیشیک، او چئکی کی، بیزه آزادلیغین وار-دؤولتینی، حاق-عدالتین تهلوکسیزلیگینی وئره‌جک.
بو مقدس میدانا بیز همچینین آمئریکایا حال-حاضیردا مؤوجود اولان تاخیره‌سالینماز اؤلوم-دیریم مسئله‌سی‌نین وار اولدوغونو خاطیرلاتماق اوچون توپلاشمیشیق. دم-دستگاه یاراتماق و یاخود سوسیال اصلاحات‌لار کئچیرمک اوچون ساکیتلشدیریجی قبول ائتمک زامانی دئییل. قارانلیق و ویران ائدیلمیش تجرید اولونما وادیسیندن آیاغا قالخماق، عرقی آیری‌سئچکیلیگین اولمادیغی گونشلی یولا کئچمک واختیدیر. خالقیمیزی دیسکریمیناسییا(آیری‌سئچکیلیک)-نین اولدوغو آغیر قوم اوزه‌ریندن قالدیرماق، اونلاری قارداشلیغین اولدوغو سرت قایادا بیرلشدیرمک واختیدیر. تانرینین بوتون اوشاق‌لاری اوچون حاق-عدالت برپا ائتمک واختیدیر.
وضعیتین گرگینلیگینه نظر سالماق خالق اوچون دؤزولمز اولاردی. گونشلی یاز سحرلری گلمه‌دیکجه آزادلیق و برابرلیگین اوستونو آلان بو قارا بولودلار چکیلمه‌یه‌جک. ۱۹۶۳-جو ایل سون دئییل، باشلانغیجدیر. اگر خالق بو مسئله‌یه یئنیدن قاییتسا زنجی‌لرین آرادان قالدیریلمالی اولدوغونو دوشوننلر بؤیوک خیال قیریقلیغینا اوغرایاجاقلار.
گئری دؤنوش یوخدور
زنجی‌لره وطنداشلیق حاق‌لاری وئریلمه‌دیکجه بیزه نه دینجلیک، نه ده راحتلیق اولاجاق. عدالت ایشیغی گؤرونه‌نه قدر بو عصیان خالقین تملینی سارسیتماغا داوام ائدهجک. ایندی عدالت سارایینا آپاران یولدا دایانان طرفداش‌لاریما دئمک ایسته‌دیگیم بعضی شئی‌لر وار: لاییقلی یئریمیزی قازانماق اوغروندا آددیملادیغیمیز بو یولدا ناحق عمل‌لره گؤره تقصیرکار اولمامالی‌ییق. کین و نیفرت دولو قدح‌لردن ایچه‌رک سرخوش اولساق آزادلیغی ساده‌جه آرزولاماقلا کیفایتله‌نه‌جه‌ییک. موباریزه‌میزی منلیگیمیز، شرفیمیزله، قایدا-قانونلا ایداره ائتمه‌لی‌ییک. یارادیجی اعتراض‌لاریمیزین فیزیکی زوراکیلیغا چئوریلمه‌سینه ایزن وئرمه‌مه‌لی‌ییک. فیزیکی قوه‌میزله قلبیمیزین گوجونو بیرلشدیره‌رک عالی‌جنابلیق سوییه‌سینه قالخمالی‌ییق.
زنجی جمعیتی‌نین قاتیلدیغی بو نوماییشده مقصد هئچ ده آغ‌دریلی‌لره قارشی نیفرت اویاتماق دئییل، گؤروندویو کیمی بو گون آرامیزدا آغ‌دریلی قارداش‌لاریمیز دا وار، بو دا بیزیم برابر اولدوغوموزون بیر ثبوتودور و اونلار آرتیق بیلیرلر کی، اونلارین آزادلیغی بیزیم آزادلیغیمیزلا بیر بوتونلوک تشکیل ائدیر. بیز بو یولدا تک باشینا آددیملایا بیلمه‌ریک. بو یولا باش قویدوقدا دایم ایره‌‌لییه باخاجاغیمیزا دایر سؤز وئرمه‌لی‌ییک. گئری دؤنوش یوخدور.
وطنداش حاق‌لارینی طلب ائد‌نلره بئله سوال وئریرلر: «سیز نه زامان دایاناجاقسینیز؟» زنجی‌لر پلیس زوراکیلیغی‌نین دیله‌گلمز دهشت‌لرینین قوربان‌لاری اولدوغو مدتجه بو موباریزه داوام ائدهجک. کؤچه‌ری حیات طرزی سورمکدن بئزمیش اینسان‌لار شهرین اساس متئل‌لرینده یئرلشدیریلمه‌یینجه بیز یولوموزدان دؤنمه‌یه‌جه‌ییک. زنجی‌لر کیچیک شهرلردن بؤیوک شهرلره کؤچمه‌یینجه بیز دایانمایاجاغیق. اوشاق‌لاریمیزین منلیگینه توخونان، شرف‌لرینی تاپدالایان «یالنیز آغدریلیلر اوچون» یازیسی مؤوجود اولدوغو مدتجه بو موباریزه داوام ائدهجک. می‌سی‌سی‌پی‌ده‌کی بیر زنجی‌نین سس وئره بیلمه‌دیگی، نیویورکدا یاشایان بیر زنجی‌نین ایسه سس وئرمه‌یه بیر کیمسه‌سی اولمادیغی مدتجه یولوموزدان دؤنمه‌یه‌جه‌ییک. خئیر، خئیر، بیز یولوموزدان دؤنمه‌یه‌جه‌ییک، عدالت و لیاقت بیر سئل کیمی قاباغینا چیخان بندلری هله کی، سوپوروب آتماییب، بیز یولوموزدان دؤنمه‌یه‌جه‌ییک!
گلین اومیدسیزلیک گیردابیندا چابالامایاق
من بیلیرم کی، سیزلردن بعضی‌لری بؤیوک آغری‌لاردان و بدبختلیک‌لردن کئچه‌رک بورا گلمیسیز. بعضی‌لرینیز داریسقال حبسخانا حجره‌لریندن گلمیسیز. و بعضی‌لرینیز ائله یئرلردن گلمیسیز کی، اورادا سیز آزادلیق آختارمیسیز، پلیس وحشیلیگی و تعقیب‌لرله راستلاشمیسینیز. سیزلر عذاب چکمکده پخته‌لشمیش وئتئران(کهنه‌کار)لارسینیز. بو ایناملا چالیشین، عذاب چکمه‌سز خلاص اولا بیلمزسیز. گئری قاییدین، می‌سی‌سی‌پی‌یه گئری قاییدین، آلابامایا قاییدین، جنوبی کارولینایا جورجیایا، لویسیانایا قاییدین، او خارابالیق‌لارا، او دار کوچه‌لره قاییدین و بیلین کی، بو وضعیت دوزه‌له بیلر و دوزه‌له‌جک ده! منیم دوست‌لاریم، سیزه دئییرم، گلین، اومیدسیزلیک گیردابیندا چابالامایاق.
بو بوتون آمئریکانین ان بؤیوک آرزوسودور
بو گون و صاباح قارشیلاشاجاغیمیز چتینلیک‌لر اولسا دا، منیم بیر آرزوم وار. بو بوتون آمئریکانلارین ان بؤیوک آرزوسودور. آرزو ائدیرم کی، بیر گون بو میللت آیاغا قالخسین و اؤز مذهب‌لریندن دؤنمه‌سین. هر کسه بللی ائتمه‌لی‌ییک کی، بوتون اینسان‌لار برابردیر. آرزو ائدیرم کی، جورجیانین قیرمیزی تپه‌لیگینده کئچمیش قول‌لارین و قولدارلارین اؤولادلاری قارداشلیق ماساسیندا دوز-چؤرک کسسینلر.
آرزو ائدیرم کی، بیر گون عدالتسیزلیک، حاقسیزلیق‌لاردان بئزمیش می‌سی‌سی‌پی دؤولتی ده آزاد و عدالتلی بیر واحه‌یه چئوریلسین.
آرزو ائدیرم کی، منیم دؤرد بالاجا کؤرپم بیر گون ائله بیر اؤلکه‌ده یاشاسین کی، اوردا اونلار دریسی‌نین رنگینه گؤره دئییل، کاراکتئرلرینه گؤره موحاکیمه اولونسونلار.
منیم بو گون بیر آرزوم وار!
آرزوم بودور کی، عرقچیلیگین دهشتلی درجه‌ده یاییلدیغی، «محو ائتمک» و «موداخیله ائتمک» سؤزلری دیلیندن دوشمه‌ین فرمانداری اولان آلاباما دؤولتینده بیر گون آغ‌دریلی و قارادریلی اوغلان و قیزلار ال-اله وئره‌رک باجی-قارداش کیمی گزسینلر.
بو گون منیم بیر آرزوم وار.
آرزو ائدیرم کی، بیر گون دره‌لر بؤیوسون، داغ و تپه‌لر ائنسین، کله-کؤتور یئرلر هامارلانسین، اَیری-اویرو یول‌لار دوزلدیلسین، تانری گؤزللیگی ظهور ائتسین و هر کس بونا شاهید اولسون.
بیز بونا اومید ائدیریک و من ائله بو ایناملا جنوبا دؤنورم. بو ایناملا بیز اومیدسیزلیک داغینی آشاراق، اومید قایاسینا آیاق آچاجاغیق. بو ایناملا بیز، میللتیمیزین ایچینده اولان آهنگسیزلیگی گؤزل قارداشلیق سیمفونییاسینا چئویره‌جه‌ییک.
بو اینام بیزی بیرگه چالیشماغا، بیرگه عبادت ائله‌مه‌یه، بیرگه موباریزه آپارماغا، محبسه بیرگه دوشمه‌یه، بیر گون آزاد اولاجاغیمیزی بیله‌رک آزادلیق اوچون بیرگه چارپیشماغیمیزا کؤمک ائدهجک. و همین گون باش توتاجاق و همین گون تانرینین بوتون بنده‌لری بو وطن‌پرور موسیقینی باشقا آب و هوا ایله اوخویاجاقلار:
«منیم عزیز-دوغما، آزاد وطنیم،
آتالاریمیزین اؤلدویو، زووارلارین غرور یئری
هر داغ‌دؤشوندن چالینسین آزادلیق موسیقیسی.»
اگر آمئریکا بؤیوک میللت اولماق ایسته‌ییرسه، بو گئرچکلشه‌جک.
قوی آزادلیق سسی نیوهمپشایرین نهنگ تپه‌لریندن، نیویورکون اوجا داغ‌لاریندان، پنسیلوانیاداکی اوجا آلگینی داغ‌لاریندان، کلرادونون قارلی قایالاریندان، کالیفرنیانین اَیری یاماج‌لاریندان ائشیدیلسین.
آمّا تک اورالاردان دئییل،
قوی آزادلیغین سسی جورجیانین داغ‌لاریندان، تنسی‌ده‌کی لوک آوت داغیندان، می‌سی‌سی‌پی‌نین هر بند-برزیندن، هر یئردن،
قوی هر داغ باشیندان آزادلیغین صداسی گلسین.
آزادلیغین سسینی هر کند-اوبادا، هر دؤولت و شهرده سسلندیره بیلسک، اوندا بیز او گونو یاخین ائده‌جه‌ییک، او گونو کی، آغ‌لار-قارالار، یهودی‌لر و بوت‌پرست‌لر، پروتستان‌لار و کاتولیک‌لر، تانرینین بوتون بنده‌لری ال-اله توتاجاق و قدیم زنجی نغمه‌سینی اوخویاجاقلار:
«آخیر کی، آزاد اولدوق! آخیر کی، آزاد اولدوق!
شوکورلر اولسون، هر شئیه قادیر تانری،
سونوندا آزاد اولدوق!»
