«آذربایجان» قزئتی‌نین ۸۹-جو ساییندا نجمی علوی‌نین فارسجا یازدیغی بیر یازی(زن در اجتماع ما) درج ائدیلیب. نجمی علوی ایراندا قادین حرکات‌لارینین باشچی‌لاریندان حساب ائدیلیر. او تبریزده «آذربایجان» قزئتی‌نین نشری ایله برابر تهراندا «بیداری ما» ژورنالیندا فعالیت گؤستریردی. نجمی علوی هم ده تانینمیش فارس یازیچی بزرگ علوی‌نین کیچیک باجیسی‌دیر.
سوسیالیست دوشونجه‌یه مالیک اولان نجمی علوی «آذربایجان» قزئتینده درج ائدیلن یازیسیندا آذربایجانلی قادین‌لاری تبریک ائدیر، اونلاری سئوینجله ایزلدیگینی بیلدیریر. او هم ده همین یازیدا قادین‌لارین اقتصادی آزادلیق‌لارینین واجیبلیگی باره‌سینده ده اؤنملی موضوع‌لارا توخونور.
۸ مارت موناسیبتیله «آذربایجان» قزئتینده درج ائدیلمیش بو یازی‌نین تورکجه ترجومه‌سینی اتک‌یازی اوخوجولارینا تقدیم ائدیریک.
بیزیم توپلومدا قادین‌لار
اؤنجه‌دن آزادلیق‌سئور اینسان‌لارین اؤندرلیگی ایله اؤز طبیعی حاق‌لارینا نایل اولموش بوتون آذربایجانلی ضیالی، آزادلیق‌سئور و فهله قادین‌لاری ایرانین بوتون آزادلیق‌سئور قادین‌لاری طرفیندن تبریک ائدیرم. عینی زاماندا ایرانلی بیر قادینین ترجومه‌یی-حالی تیمثالیندا ایرانلی قادین‌لارین طالعیندن بیر نومونه‌نی اجتماعی اصلاحات‌لاری تنظیمله‌یرکن اؤرنک کیمی ایستیفاده ائتمک اوچون قیساجا اولاراق دقتینیزه تقدیم ائتمک ایستردیم.
بعضی آدام‌لار بئله تصوور ائدیرلر کی، قادین‌لارین یاشماغی‌نین گؤتورولمه‌سی، کیشی‌لرله بیرلیکده قوناقلیق‌لارا قاتیلماسی و ایداره‌لرده ایشله‌مه‌سی اورک آچاندیر و اونلارین سعادتینی تامین ائدیر. لاکین بئله بیر باخیش دوغرو سعادت ایسته‌ینلر اوچون دَیَرسیز و دایازدیر.
کوچه‌ده و یاخود قوناقلیقدا گؤردویونوز، اری طرفیندن حؤرمتله قارشیلانان بیر قادین، ائله همین اری‌نین ایراده‌سی ایله بوشانماق آدی آلتیندا حؤرمتسیزجه‌سینه ائودن باییرا آتیلا بیلر و ایل‌لر بویو قورموش اولدوغو حیاتیندان محروم ائدیله بیلر. همچینین قوجاغیندا بؤیوتدویو، اونون اوچون گئجه‌لر یوخوسوز قالدیغی، اؤز قانی ایله بسله‌دیگی و خسته‌لیک زامانی اونون قایغیسینی چکمیش اولدوغو اؤولادینی دا قانونون حؤکمو ایله آناسیندان آییرا بیلر. هابئله، قادین بوشاندیقدان سونرا قانونا اساساً کیشی‌نین مالیندان هئچ بیر پای آپارمیر. او گنجلیگینی، ایل‌لر بویو زحمتینی، جیگر پاراسینی و ییغدیقلارینی الدن وئریب کدرلی، غملی و الی‌یالین وضعیتده ائودن چیخماق مجبوریتینده اولور.
اونوتمایاق کی، ار و آرواد آراسیندا کیچیک بیر سؤز اولان زامان قادین مغلوب اولونموش و باشی‌آشاغی وضعیته دوشور، کیشی ایسه اونون عکسینه، تکببورلو و باشی‌اوجا بیر مؤقعده دایانیر.
نییه؟ اونا گؤره کی، کیشی اؤز ائوینده و اؤز یاشاییشیندا اولور، قادین ایسه اونون نامینه یاشاییر. بئله کی، بوتون گونو درزی‌لیک، آشپازلیق و مین‌لرله دیگر ایش‌لر گؤرمه‌سینه، اؤولادلارینی ان گؤزل اصول‌لارلا تربییه ائتمه‌سینه باخمایاراق، مادی باخیمدان اونون بوتون ایش‌لرینه گلیرلی اولمادیغینا گؤره ذره قدر دَیَر وئریلمیر. اما کیشی کیچیک بیر قازانج الده ائد‌نده او، اؤز سئوینجینی دوست‌لاری ایله یئمک‌خانا میزی آرخاسیندا قئید ائدیر، عکسینه، کیشی ضرره دوشنده، اونون کدری آرواد-اوشاغا یئتیشیر.
یازدیغیم سؤزلر بوتون ایران قادین‌لارینین وضعیتینی عکس ائتدیریر و بو چوروک قانونون اوجباتیندان قادین‌لارین نه قدر عذاب چکدیگینی گؤستریر.
تأسف‌لر اولسون کی، ایران قادین‌لاری محرومیت‌لر اوجباتیندان اؤز آغیر وضعیت‌لرینی باشا دوشه بیلمیرلر. لاکین من اینانیرام کی، ضیالی‌لارین و آزادلیق‌سئونلرین اؤندرلیگی آلتیندا کؤله‌لیک زنجیرلرینی قیرمیش آذربایجان قادین‌لاری اؤز تاپدالانمیش حاق‌لارینا، او جمله‌دن سئچیب و سئچیلمک حاقینا نایل اولوبلار. بئله‌لیکله، حیات اونلاری داشیندیریب دوشوندورور کی، کؤله‌لیک و قولدارلیغین لغو اولوندوغو و اینسان حاق‌لارینین، آزادلیغینین دونیایا اعلان ائدیلدیگی کیمی، ایران قادین‌لارینین آزادلیغی دا گرک دونیا اهالیسینه اعلان ائدیلسین.
قادین‌لارین موستقیللیگینی برپا ائتمک اوچون اقتصادی موستقیللیگین اولماسی واجیبدیر. یو‌خسا، دوکتور ارانی‌نین دئدیگینه اساساً، قادین اقتصادی جهتدن موستقیل اولماسا، توپلومون کوکلاسی و کیشی‌نین اویونجاغی تیمثالیندا اولاجاقدیر.
قادین‌لاری گرک عطالتدن قورتاراق، یئنی دوشونجه‌لرله تانیش ائده‌‌رک ذلیل یاشام طرزیندن چیخاراق. بئله‌لیکله، پول و مادی مسئله‌لر اوزه‌رینده یارانان ار-آرواد پروبلئم‌لری آرادان قالدیریلاجاق و اونون یئرینی مصلحت (فیکیرداشلیق) و معنوی علاقه‌لر توتاجاقدیر.
سئچکی‌لرده ایشتیراک‌لارینا قاداغا قویولموش فرانسه کیمی بیر اؤلکه‌ده اؤتن ایل قادین‌لار کورسولرین ۲۵ فایزینی اله کئچیرمیشلر و سیز آذربایجان قادین‌لاری دا اؤز سعی‌لرینیز نتیجه‌سینده بو طبیعی حاقینیزا نایل اولوبسونوز. لاکین بیر نئچه آی اؤنجه ۱۵ نفر میللت وکیلی طرفیندن مجلیسه تقدیم اولونموش بیر لاییحه خاین‌لر، اوغرولار، آخوندا اوخشارلارین و غرضلی وکیل‌لرین طرفیندن تنقید اولوناراق قولاق آردینا وورولدو. لاکین بو گون بیزی بو طبیعی حاقیمیزدان محروم ائتسه‌لر ده، اونون موقابیلینده بؤیوک سئوینجله، جسارتلی آددیم‌لار آتاراق آزادلیق یولوندا چالیشان و اوغورلار قازانان اؤز آذربایجانلی باجی‌لاریمی گؤرورم.
نجمی علوی
