فمينيست جوغرافييا سون ايللرده فمينيست ادبياتيندا يئر آلان ماراقلی مؤوضوعلاردان بيری حالينا گليب. فمينيست جوغرافييا تئرمينی خوصوصيله باسقی آلتيندا اولان توپلوملارا عاييد قادينلار طرفيندن داها چوخ منيمسنمکده‌دير. بونون سببی ايسه فمينيست جوغرافييانين ساده‌جه قادين پروبلئملرينه قارشی دئیيل، هم ده، توپلومداکی ديگر عدالتسيزليکلر و باسقيلارا قارشی دا بير آلترناتيو مکان اولماسيدير. مثلا، کاترين مک‌کيتريک و ليندا پیک کيمی قارادريلی فمينيست جوغرافييا حاقدا تدقيقاتچيلار، خوصوصيله بيلديگيميز علمی جوغرافييا ايله اينسانی جوغرافييا آراسينداکی فرقليليکلری گؤسترمه‌يه چاليشيرلار. اينسانلارين توپلوملارداکی جوغرافی يئرلرينی آنلاماق اوچون عيرق، جينسيت، صينيف، و جينسی کيمليکی کيمی سوسيال اينشالار(Social Costruction) و سوسيال گؤستريجيلرين چوخ اؤنملی اولدوغونو وورغولاييرلار. ميثال اوچون؛ آغ‌دريلی، هئتروسئکسوال و پاتريارخال کيشيلرين يئرلری آمريکا توپلوموندا هر کسدن داها فرقلی، اعتيبارلی، و اوستوندور.
عيرق و جينسيت کيمی سوسيال علامتلر، فرقليليکلری گؤسترن قاباريق سوسيال اينشالاردير، بو فرقليليکلر مکان اولاراق تشکيل ائديليبلر. بوندان باشقا ماددی جوغرافييالار واسيطه‌سيله فرقلی اينسانلار فرقلی جوغرافی مکانلارا صاحيب اولورلار (مثلا ائوده، ايش يئرينده، شهر ويا کندلرده).
بو کونتکستده فرقلی اينسانلار اوچون فرقلی مکانلار و يئرلرين وار اولدوغونو دوشوندويوموزده، عئينی زاماندا توپلوملاردا هيرارشی، باسقی، و عدالتسيزليکلردن ده دانيشا بيله‌ريک. قيساجاسی، فرقليليکلر و ايمتيازلارا اساسلانان جوغرافييالار و مکانلار بيزه فرقلی توپلوملارداکی آلت مؤوقعده و باسقی آلتيندا اولان قروپلارين سوسيال دوروملارينی دوشونوب آنلاماقدا چوخ يارديمچی اولا بيلر. بئله‌ليکله، بيز دموکراتيک، برابرلييه اساسلانان و دومينانتليغين اولماديغی بير جوغرافييا خيال ائده بيلريک. ميثال اوچون آمريکادا قارادريلی فمينيست جوغرافييا و يا ايراندا آذربايجان فمينيست جوغرافيياسی. بئله‌ليکله، قارادريلی فمينيست جوغرافييا آلترناتيو بير جوغرافييادير و جينسيت، صينيف و عيرق کيمی سوسيال علامتلر اينسانلارين شخصی و سوسيال حياتيندا هئچ بير منفي تاثيره صاحيب دئیيللر. قارادريلی فمينيست جوغرافييا و يا گونئي آذربايجان فمينيست جوغرافيياسی اوتوپيک بير جوغرافييادير. اينسانلاری مؤوجود ديرلری و نيظامی قوروماقلاری اوچون موکافاتلانديران و فرقليليکلر يارادانلاری جزالانديران بير سيستم و دونيادا ياشاديغيميز اوچون بو اوتوپيک جوغرافييانی ياراتماق و يا ياراتماغا چاليشماغين راحات بير ايش اولماديغينی بيليريک.
گونئی آذربايجان فمينيست جوغرافيياسی، فارس و کيشيلرين حاکيم اولدوغو سيستمين ايچينده ياشايان بوتون گونئی آذربايجانلی قادينلار اوچون آلتئرناتيو بير جوغرافييادير. ايراندا آذربايجان قادينلارينين يئرلری و مؤوقعلری اونلارين جينسيتلری و ائتنيک کيمليکلری اساسيندا تعيين اولونور و اونلار حاکيم سيستمين اونلار اوچون تعيين ائتديگی يئرلرده، مؤوقعلرده سيستمين ايسته‌ديگی گؤرونتو و شکيلده دورماق مجبوريتينده قاليرلار. اونا گؤره ده گونئی آذربايجانلی قادينلار يئنی جوغرافی مکانلار و ايدئال ياشام ساحه‌لرينی دوشونمه‌يه و تصوور ائتمه‌يه باشلاييرلار. گونئی آذربايجان فمينيست جوغرافيياسی، تورک قادينلارينين آزاد شکيلده اؤز ديللرينده يازيب اوخودوقلاری آزاد بير جوغرافی ساحه‌دير. بو جوغرافييادا عدالتسيز سوسيال فاکتورلارين يئرينه برابرليک و عدالت کيمی عونصورلر حاکيمدير. بو جوغرافييادا تورک قادينلاری ديللرينه و ميللی منصوبيتلرينه گؤره تحقير اولونمورلار و يا داها ياخشی بير حيات اوچون فارس بؤلگه‌لرينه کؤچوب فارسلاشماغا مجبور ائديلميرلر. ايراندا آذربايجان فمينيست جوغرافيياسيندا جينسيیت عدالتسيزليگی، راسيزم، و هر هانسی بير آيری سئچکيليک يوخدور.
اصلينده گونئی آذربايجان قادينلاری هر زامان ايستر-ايسته‌مز بو فمينيست جوغرافييا حاقيندا دوشونوبلر. بيز بونو گونئی آذربايجان قادينين شعرينده آچيقجا گؤره بيلريک. ايراندا آذربايجان قادينلارينين شعيرلری و خوصوصيله ده تورک فمينيست قادينلارين اثرلرينده کفسيزليک، قارامسارليق، حسرت، و برابرسيزليکله علاقه دار شيکايتلر چوخ قاباريقدير. بونونلا ياناشی آذربايجان قادينينين صنعت اثرلرينين آيريلماز بير حيصه‌سی اوندا اولان اوميد ايزيدير. اونلار دايم اؤز شعيرلرينده آرزو ائتديکلری ايدئال يوردلاری و آزاد جوغرافی مکانلاريندان دانيشيرلار. آذربايجانين بؤيوک شهرلريندن بيری اولان تبريزين آذربايجانليلار اوچونی استراتئژی، سياسی، تاريخی، و ايجتيماعی باخيمدان واجيبليگی هر کسه آيديندير. تبريز گئرچک بير جوغرافی مکاندير، آمما عينی زاماندا بو شهر آذربايجانليلار اوچون بير اوميد و بير اوتوپييادير. طبيعی کی، يازارلار، شاعيرلر، و موغننيلرين اثرلرينده آرزو ائتديکلری و دانيشديقلاری تبريز اينديکی ايران سرحدلری ايچينده يئرلشن تبريزدن چوخ فرقليدير. اوتوپيک تبريز قوللارينی آچيب هر کسی قوجاقلايان و بوتون آذربايجانليلارين اورادا خوشبخت و باسقيسيز بير شکيلده ياشاديغی آزاد و دئموکراتيک تبريزدير.
قيساجاسی فمينيست جوغرافييا اينسانی ديرلر و عدالتلی قايدالارلا ايداره اولونان آلتئرناتيو بير جوغرافييادار. بو جوغرافييادا عيرق، صينيف، جينسيت، ديل، و اتنيک کيمليک کيمی خوصوصيتلرين اينسانلارين حياتيندا هئچ بير رولو و تاثيری اولمايان باشقا سؤزله آرزولاديقلاری او آزاد جوغرافييانی دوشونورلر. يوخاريدا دئديگيم کيمی آذربايجان قادينينين آرزولاديغی ياشام يئری و ايدئال جوغرافييا ايستکلرينی، ان آزی اونلارين صنعت اثرلرينده، آچيقجا گؤره بيله‌ريک. بيلديگيميز کيمی، شعير و شاعيرانه دونيا خيال قورماغين و آرزولارين ان گئرچک ساحه‌سيدير و اينسانلار بو عالمده ايستک و آرزولاريندان آزاد بير شکيلده دانيشا بيلرلر.
گونئی آذربایجان فمینیست جوغرافییاسی
Paylaş.
