«ایچیمده بیر آراز آددیملاییر» آدلی تاماشا 20 مهر سه‌شنبه آخشام خالخال شهرینده نوماییش ائتدیریله‌جک. اوندان ایکی گون سونرا جومعه آخشامی ایسه گرگر-علمدار (هادیشهر) شهرینده صحنه‌یه قویولاجاق.
«موغان هنر تئاتر» قروپونون ایشی اولان بو تاماشانین سئناریستی عارف مهتاب، رئژیسورو ایسه غریب منوچهری‌دیر. آذربایجان تورکجه‌سینده یازیلمیش اولان بو اثر داها اؤنجه اردبیل، تبریز، تهران، مشکین‌شهر(خیاو)، گرمی و پارساباد شهرلرینده ده نوماییش اولونوب.
دراما آرازین گونئییندن قوزئیه کئچرکن روس عسگرلرینه یاخالانان بیر کیشی حاقیندادیر. اوزون ایللر سیبری‌ده سورگون حیاتی یاشایان کیشی ایللر سونرا ائوینه قاییدیر. اما آرتیق بورادا چوخ شئی اولکی کیمی اولمور.
