«اینکلوزیو توپلوم فوندو» ایراندا آذربایجان تورک‌لرینه قارشی اینسان حاق‌لاری پوزونتولاری باره‌ده راپورت یاییب
آمئریکا بیرلشمیش دؤولت‌لرینده یئرله‌شن «اینکلوزیو توپلوم فوندو» ۲۰۲۴-جو ایلین اوکتیابر-دئکابر آی‌لاریندا ایراندا آذربایجان تورک‌لرینه قارشی باش وئرن اینسان حاق‌لاری پوزونتولارینی سندلشدیر‌ن راپورت یاییملاییب.
راپورتو بورادان اوخویا بیلرسینیز: ایراندا آذربایجان تورک‌لرینه قارشی اینسان حاق‌لاری پوزونتولاری باره‌ده راپورت
راپورتدا بیلدیریلیر کی، بو دؤورده ۱۲ نفر حبس اولونوب، ۱۷ نفر موختلیف مدت‌لره حبس جزاسی و یا جریمه آلیب، بیر سورگون فعال قانون‌لارا عمل ائتمه‌دیگینه گؤره جریمه‌له‌نیب. اوکتیابر و نویابر آی‌لاریندا ۴۵ آذربایجانلی، او جمله‌دن بئش قادین اعدام ائدیلیب. راپورت اعدام‌لارین چوخونون عدالتسیز محکمه پروسئس‌لریندن سونرا حیاتا کئچیریلدیگینی و ایران حکومتی‌نین اؤلوم جزاسینی سیاسی سرکوب واسیطه‌سی کیمی ایستیفاده ائتدیگینی وورغولاییر.
راپورت همچینین آذربایجانلی سیاسی محبوس‌لارین طیبی یاردیمدان محروم ائدیلدیگینی و آذربایجانلی اوشاق‌لارا شخصیت وثیقه‌سی وئریلمه‌سینده مانع‌لرین یارادیلدیغینی بیلدیریر. بو حال‌لار ایران حکومتی‌نین ائتنیک آزلیق‌لارا قارشی سیستئماتیک آیری‌سئچکیلیک سیاستی‌نین داوام ائتدیگینی گؤستریر.
بوندان علاوه، سندده آذربایجانلی فعال‌لارین و عایله‌لرینین ایقتیصادی و سوسیال باسقی‌لارا معروض قالماسی، ایش ایمکان‌لارینین محدودلاشدیریلماسی و مجبوری کؤچ‌لره معروض قالمالاری دا قئید اولونوب. ایرانین میللی آزلیق‌لارا قارشی سیاستی‌نین اونلارین مدنی، دیل و سوسیال حاق‌لارینی داواملی شکیلده پوزدوغو وورغولانیر.
راپورت بین‌الخالق ایجتیماعیتی ایران حکومتینه قارشی تضییق‌لری آرتیرماغا، اعدام‌لاری دایاندیرماغا، سیاسی محبوس‌لاری آزاد ائتمه‌یه و عدالتلی محکمه سیستئمینی تامین ائتمه‌یه چاغیریر.
اینکلوزیو توپلوم فوندو آزلیق‌لارین حقوق‌لارینی مودافیعه ائد‌ن آمئریکا بیرلشمیش دؤولت‌لری مرکزلی غیردولتی تشکیلاتدیر. فوند اینسان حاق‌لاری و چئوره پروبلئم‌لر ساحه‌سینده تدقیقات‌لار آپاریر و راپورت‌لار درج ائدیر. داها اطرافلی معلومات اوچون رسمی وب سایت‌لارینا (www.inclusivevision.org) داخیل اولماق مومکوندور. راپورت انگلیس دیلینده یاییملانیب.
