۱۹۱۸-جی ایلین مای آیی‌نین ۲۸-ده تیفلیسده قورولان آذربایجان میللی شوراسی آذربایجانین ایستیقلال بیاننامه‌سینی یاییب. بو بیاننامه آذربایجاندا مدرن جومهوریتین قورولماسینی اعلان ائتمکله بیرلیکده وطنداشلار آراسیندا جینسیت برابرلیگی و دینی آزادلیق‌لارین واجیبلیگی ده اؤنمله وورغولانمیشدیر. ایستیقلال گونونون ۱۰۴-جو ایل دؤنومونده همین بیاننامه‌نی اتک‌یازی اوخوجولارینا تقدیم ائدیریک.
آذربایجانین موستقیل دؤولت اعلان ائدیلمه‌سی حاقیندا آذربایجان میللی شوراسی‌نین قراری
۲۸ مای ۱۹۱۸-جی ایل
۲۸ ماییس، سنه(ایل) ۱۹۱۸ ایلده تیفلیس شهرینده آذربایجان میللی شوراسی -رئیس موعاوینی حسن بی آغایئو، کاتیب مصطفی ماحمودوو، فتحعلی خان خویسکی، خلیل بی خاص‌محمدوو، نصیب بی یوسیف‌بَیوو، میر هیدایت سئییدوو، نریمان بی نریمانوو، هیبت‌قولو محمدبَیوو، مهدی بی حاجینسکی، علسگر بی ماحمودبَیوو، آسلان بی قارداشوو، سلطان مجید غنی‌زاده، اکبر آغا شیخ الاسلاموو، مهدی بی حاجی‌بابابَیوو، محمدیوسیف جفروو، خوداداد بی ملیک‌آسلانوو، رحیم بی وکیلوو، حمید بی شاهتاختینسکی، فیرودین بی کؤچرلینسکی، جامو بی هاجینسکی، شفیع بی روستم‌بَیوو، خسرو پاشا بی سولطانوو، جعفر آخوندوو، محمد محرموو، جاواد ملیک‌آسلانوو و حاجی میرزه سلیم آخوندزاده افندیله-رین ایشتیراکی ایله آذربایجانین ایستیقلالی حاقیندا زیلده‌کی عقدی اعلان ائتدی:
روسیه ایله عثمانلی ایمپئراتورلوغو آراسیندا ظهور ائدن موحاریبه‌نین تسوییه‌سی اوزوندن حاصیل اولان وضعیت حاضیریه-سیاسییه و مملکت داخیلینده بولونون میثیلسیز آنارشی جنوبی-شرقی زاقافقازییادان عبارت بولونون آذربایجانا، دخی بولوندوغو داخیلی و خاریجی موشکولاتدان چیخماق اوچون خصوصی بیر دؤولت تشکیلاتی قورماق لوزومونو تلقین ائدیور.
بونا بیناءن آرای-عمومییه ایله اینتیخاب اولونان آذربایجان شورای میللیه ایسلامییه‌سی بوتون جماعته اعلان ائدیور کی:
۱. بو گوندن اعتباراً آذربایجان خلقی حاکمیت حقینه مالیک اولدوغو کیبی جنوبی-شرقی زاقافقازییادان عبارت آذربایجان دخی کامیل الحقوق موستقیل بیر دؤولتدیر.
۲. موستقیل آذربایجان دؤولتی‌نین شکیلی-ایداره‌سی خالق جومهوریتی اولاراق تقرّر ائدیور.
۳. آذربایجان خالق جومهوریتی بوتون میللت‌لر و بالخاصه همجوار اولدوغو میللت و دؤولت‌لرله موناسیبت حسنه تاسیسینه عزم ائدر.
۴. آذربایجان خالق جومهوریتی میللت، مذهب، صینیف، سیلک و جینس فرقی گؤزله‌مه‌دن قلمروینده یاشایان بوتون وطنداش‌لارینا حقوق سیاسییه و وطنییه تامین ائدر.
۵. آذربایجان خالق جومهوریتی اراضیسی داخیلینده یاشایان بالجمله میللت‌لره سربستانه اینکیشاف‌لاری اوچون گئنیش میدان بوراخیر.
۶. مجلیس موسسان توپلانینجایا قدر آذربایجان ایداره‌سی‌نین باشیندا آراء عمومییه ایله اینتیخاب اولونموش شورای میللی و شورای میللییه قارشی مسئول حکومتی موقتی دورور.
آذربایجان جومهوریتی حکومت قانون و بناگذارلیق‌لاری مجموعه‌سی، ۱۹۱۹، نؤ ۱، سه. ۵-۷.
