محمد علیمرادی کورکوت آتا تورک کینو فئستیوالینین سندلی فیلم بؤلومونده «اکیزلر» فیلمی ایله بیرینجیلیگی قازاندی. قزاقستان‌دا یئرله‌شن آرال گؤلو ایله گونئی آذربایجان‌دا اولان اورمو گؤلونون دورومونو پارالئل شکیلده روایت ائد‌ن «اکیزلر» تورکیه‌ده آتاتورک کولتور مرکزینده کئچیریلن موکافاتلاندیرما مراسیمینده سندلی فیلم بؤلومونده ان یاخشی سندلی فیلم اولاراق اؤدوله لاییق گؤرولوب.
بو فئستیوال تورک دونیاسینین اورتاق دیری ساییلان دده قورقود آدینا کئچیریله‌رک، تورک دونیاسینین کینو اثرلرینی بیر پلاتفورم آلتیندا بیرلشدیرمک، اونلاری یئنی نسیل‌لره گؤسترمک، تورک جمعیت‌لری آراسیندا مدنی ایش‌بیرلیگینی آرتیرماق و اورتاق مدنی میراث‌لاری گوجلندیرمک و زنگینلشدیرمک هدفی ایله قورولموش فئستیوال‌دیر. فئستیوالا موختلیف تورک جمعیت‌لریندن کینو اثرلری ایشتیراک ائدیب، سئچیلن ان یاخشی اثرلر ایسه ۱۲ نویابر تاریخینده موکافاتلاندیرما مراسیمینده آچیقلانیب.
گونئی آذربایجانین مرند شهریندن اولان رئژیسسور محمد علیمرادی بیر چوخ سندلی فیلمین رئژیسسورو و پرودوسورو اولموشدور. «اورمو گؤلو خاطره‌سینه»، «من عصمتم» ،«آنا دیلیم» ، «اکیزلر»، «اکینچی‌لر»، «سن چاغیرسان گله‌رم من»، «مئشه تالانی»، «آجی چای»، «اوبا»، «اوزونو ایشیغا توت» و «دنیزین یولو هارداندیر» فیلم‌لری اونون چکدیگی سندلی فیلم‌لری ایچینده یئر آلیر. او هم ده سوسیال، اقتصادی و ائکولوژی پروبلئم‌لر حاقیندا بیر چوخ قیسا مئتراژلی فیلم‌لر چکیب. اورمو گؤلونون قوروماسی و اونون تأثیرلری حاقدا چکیلن اکیزلر سندلی فیلمی بین‌الخالق کبک فیلم فئستیوالی فینالینا دا یول تاپمیش‌دیر.
کورکوت آتا فئستیوالینین ان یاخشی اوزون‌مئتراژلی فیلم موکافاتینا ایسه قوزئی آذربایجان‌دان «سپه‌لنمیش اؤلوم‌لر آراسیندا» فیلمی لاییق گؤرونوب.
کورکوت آتا فئستیوالینده موستقیل گونئی آذربایجان سینماسینین اسماعیل منصف رئژیسسورلوغوندا «کؤمور» آدلی فیلمی ده اوزون مئتراژلی فیلم‌لری بؤلومونده ایشتیراک ائدیردی. گونئیلی رئژیسسور رضا صیامی ایسه سندلی فیلم بؤلومونده ژوری هئیتینین عضوو اولاراق ایشتیراک ائدیردی.
