توپچوباشوو مرکزی‌نین تشکیلاتچیلیغی ایله لهستانین کارپاچ شهرینده مینلرله اوزمانین عنعنه‌‌وی فورومو اولان ۳۲-جی اقتصادی فورومدا گونئی آذربایجانلا باغلی پانئل کئچیریلدی. ۱۴۰۲-جی ایل۱۶-۱۴ شهریور تاریخینده کئچیریلن بو ایلکی بوراخیلیش چرچیوه‌سینده توپچوباشوو مرکزی «ایراندا اینسان حوقوقلاری‌نین وضعيتی: ائتنیک آذربایجانلیلارین نمونه‌سی» آدلی پانئلده بیر نئچه اوزمانی بیر آرایا توپلادی.
توپچوباشوو مرکزی‌نین دیرئکتورو روسیف حسینووون مودئراتورلوغو ایله ۱۶شهریور ۱۴۰۲-جی ایل تاریخینده کئچیریلن موذاکیره‌ده آشاغیداکی معروزه‌چیلر ایشتیراک ائده‌رک گونئی آذربایجان حاقیندا چیخیش ائتدیلر:
تورنتو یونیورسیته‌سی‌نین (کانادا) تدقیقاتچیسی، اتک‌یازی انسان حاقلاری تشبّوث قروپو عضوو تورکان بوزکورت، ایراندا اینسان حوقوقلاری چرچیوه‌سینده آذربایجانلی قادین و اوشاقلارین دورومو مؤوضوعسوندا چیخیش ائتدی.
یاخین شرق حقیقتلری فوندونون (EMET) (واشینگتن، آمریکا) آنالیتیکی و امکداشی جوزئف ائپشتئین اورمو گؤلو ایله باغلی چیخیش ائتدی. او، ایران دؤولتی‌نین اورمو گؤلو سیاستینی و گؤلون قوروماسی ایله باغلی نتیجه‌لری تحلیل ائتدی.
آی م.کوری تقاعدچوسو (واشینگتن /بروکسل/ونیز) دوکتور ماوریزیو گئری (PhD)، گونئی آذربایجان حرکاتی ایله باغلی چیخیش ائتدی. گئری برلین‌ده کئچیریلمیش اعتراضلار مسئله‌‌سینه ده توخوناراق، گونئی‌له باغلی دیگر اجتماعی سیاسی مؤوضوعلار حاقیندا دا دانیشدی.
رامین جبارلی واشینگتن یونیورسیته‌سی‌نین تدقیقاتچیسی (سیاتل، آمریکا) و اتک‌یازی دوشونجه سایتی‌نین ائدیتورو کیمی ایران انقیلابیندان (۱۳۵۷) اؤنجه و سونرا ایرانین ائتنیک سیاستی حاقیندا چیخیش ائتدی.
تل آویو یونیورسیته‌سی‌نین موشئ دایان آدینا یاخین شرق و آفریقا آراشدیرمالاری مرکزی‌نین تدقیقاتچیسی (تل آویو، اسرائیل) دوکتور. های ائیتان کوئن یاناروجاک گونئی آذربایجانین ژئوپولیتیک اهميتی ایله باغلی دانیشدی.
پانئل ایشتیراکچیلاری ایراندا اینسان حوقوقلاری ایله باغلی آکتوال پروبلئمی و اونون ایرانین خاریجی سیاستینه تأثیرینی موذاکیره ائتدیلر. پانئلده مهسا امینی اعتراضلاری و ایرانین آقرئسسیو خاریجی سیاستی فونوندا داخیلده‌کی ائتنیک گرگینلیک و رئژیمین ائتنیک قروپلارا، ان چوخ دا آذربایجانلی‌لارا قارشی آیری‌سئچکیلیک سیاستی کیمی مسئله‌‌لر موذاکیره ائدیلدی.
