میرجعفر پیشه‌وری‌نین بو مقاله‌سی ۲۹ شهریور ۱۳۲۴ تاریخینده آذربایجان قزئتی‌نین ۸-جی ساییندا نشر ائدیلمیشدیر
تاریخ تکرار اولماقدادیر. ایران جماعتینی، ظلم، اسارت و قارانلیقدا ساخلاماغی لازیم گؤرن سیاست موحاریبه نتیجه‌سینده جبرا میدانا چیخان ظاهری دموکراسی-یه سون قویماغا چالیشماقلا وطنیمیزی اجنبی‌لره ساتان خائن عنصرلرین فعالیتینه گئنیش میدان آچمیشدیر.
تهران سرعتلی آددیم‌لارلا ارتجاعا طرف گئتمکده‌دیر. باشیمیزا یونان خالقینین باشینا گلن اویونو گتیرمک فیکرینده‌دیرلر. پارلامئنت، دؤولت و مطبوعات ساتیلمیش خائن آدام‌لارین الینه دوشموشدور. بونلار ووروب، ییخیب، داغیدیب اؤز سیاست‌لرینی یئریتمک ایسته‌ییرلر.
آزادلیق، دموکراسی نامینه چالیشماقدا اولان قوه‌لر جوربه‌جور بهانه‌لرله بوغولوب تار-مار ائدیلمکده‌دیر. رضاخاندان داها قابا، داها کوبود بیر جلاد ووجودا گتیرمک پلانی جدی صورتده زامانیندا ایجرایا قویولموشدور.
ایران موحاریبه زامانی دموکراسی جبهه‌سینین غالیبیت کؤرپوسو اولدوغو حالدا، «صلح زامانی بؤیوک ایستعمار دونیاسینین سنگری اولمالیدیر» دئییب، میلیون‌لارلا ضعیف خالق‌لاری اسارت و قول حالیندا ساخلاماق اوچون اوندان قالخان و سنگر یاراتماق، آزادلیق و حریتیمیزی بو مقصده قوربان ائتمه‌یه چالیشیرلار.
سید ضیا الی ایله چیخان سایسیز – حسابسیز ارتجاعچی قزئت‌لر، دشتی، دوکتور طاهری، اسفندیاری و سایرلرینین پارلامئنتده اوخودوقلاری رجزلر و چئویردیکلری حقه‌لر هامیسی بوندان اؤترودور.
بوندان اؤترودور کی، حتی تبریزده بئله بعضی پیس آدام‌لار جرات ائدیب آزادلیق علیه‌ینه خائینجه‌سینه شایعه‌لر یاییر، مئیخانالاردا، پیس یئرلرده سئل کیمی پول خرج ائدیر، ماجرا آختاران عنصرلری ساتین آلیب، خالقین فیکرینی اونلارین واسطه‌سیله زهرله‌مه‌یه چالیشیرلار.
ساتیلمیش ارتجاعچی مطبوعات ایله زومزومه‌یه باشلامیش خاریجی رادیولارین هماهنگ اولماسی دا تصادفی بیر مسئله دئیلدیر. علیهیمیزه قالخان ارتجاعچی قوه‌لر خاریجی استعمارچی منبع‌لرین بارماغی ایله اویناماقدادیر.
تاریخ بیزیم عهده‌میزه بؤیوک بیر وظیفه قویموشدور. بیز آذربایجاندا سارسیلماز بیر آزادلیق قالاسی ووجودا گتیرمه‌لیگیک. تهراندا و ایرانین آیری ایالت‌لرینده اجنبی گؤستریشی ایله ازیلن دموکرات و آزادلیق‌سئور شخص‌لر بیزه پناه گتیره‌جک، آزاد و دموکرات وطنیمیزین شانلی بایراغی آلتیندا مقدس وظیفه‌لری اولان آزادلیق موباریزه‌سینی داوام ائتدیره‌جکلر.
آذربایجان تهرانلا بیر یئرده اسیر هندوستان اولماقدانسا، اؤزو اوچون آزاد ایرلند اولماغا اوستونلوک وئریر.
تهران پوزغون و کوچه گؤزل‌لری کیمی هر گون بیر لوتونون قوجاغینا آتیلا بیلر. آذربایجان ایسه ناموس و حیثیتینه ماراقلیدیر. او بیر داها بیگانه‌لرین آلچاق نؤکری اولان رضاخان‌لارین بویوندوروغو آلتینا گیرمز و گونده بیر لوتویا تسلیم اولماز.
بیز هر قیمته اولور اولسون، دونیاداکی حادثه‌لرین وئردیگی ایمکاندان ایستیفاده ائدیب آزادلیغیمیزی تامین ائده‌جه‌ییک. بوش‌بوغاز و خائن یازیچی‌لارین قیل-قالی بیزی توتدوغوموز یولدان گئری قایتارا بیلمز.
فیرقه‌میز بوتون آذربایجان خالقینین ساغلام و آزادلیق‌سئور عنصرلرینی اؤز بایراغی آلتینا توپلاماغا موفق اولموشدور.
اذا جاء نصر اله والفتح و رایت الناس یدخلون فی الدین الله افواجا آیه‌ی شریفه‌سی موجبینجه بیزیم فتح و غلبه‌میزی حیس ائدن جماعت دسته-دسته، قروپ-قروپ سیرالاریمیزا داخیل اولماقدادیر.
ایداره‌میزه اطرافدان سئل کیمی آخیب گلن تبریک تئلگراف‌لارینی چاپ ائدیب یایماغا بئله فورصت تاپا بیلمیریک. بو اثبات ائدیر کی، آذربایجان خالقینین دوشمن‌لری وحشته دوشمکده سهو ائتمه‌میشلر.
آذربایجان آزادلیق و دئموکراسی یولوندا بؤیوک قدم‌لرله ایر‌ه‌لی گئدیر. تهران ایسه عکسینه، ارتیجاعا اویوب گئری گئتمکده‌دیر. اونا گؤره آزادلیق‌سئور آذربایجان ایله تهرانی زورلاییب چنگینه آلان ارتجاعچی دؤولت آراسیندا فاصیله آرتیر، بؤیویور، کئچیلمز بیر حالا گلیر. بو ایسه بیزیم تقصیریمیز دئییلدیر.
تهران خالقی اؤز گئدیشینی جدی صورتده بیر داها نظردن کئچیرمه‌لیدیر. او گؤزلرینی آچیب قاباغا چوخ دقتله باخماغا مجبوردور. او هله بیلمیر کی، زور ایله ایش باشینا کئچنلر اونو هارا آپاریر و نه کیمی مقصده سؤوق ائدیرلر.
ایشین آخیرینی حساب ائتمک نتیجه‌سینده‌دیر کی، بیز تهرانی گؤزله‌مه‌ییب، بیر چوخ مسئله‌لرده حساب و خرجیمیزی آییریب اؤز الیمیزه آلماغا چالیشیریق. بیز حیوان دئییلیک کی نوختامیزی سیرلی و شوبهه‌لی آدام‌لارا تاپشیریب، اونلارین دالینجا گئدک. یولوموزو آیریدیر. بیز آزادلیق، دئموکراسی یولوندان دؤنه بیلمه‌ریک. بو یولدان دؤنمک محو اولماغی و یوخا چیخماغی قبول ائتمک دئمکدیر. بو ایشی بیز گؤرمه‌یه‌جه‌ییک. سیز ایسه موختارسینیز، هارا گئدیرسیز گئدین. لاکین بیزیم ایله ایشینیز اولماسین. فارس‌لار دئمیشکن: «مرا به خیر تو امید نیست شر مرسان»
