پهلوی‌لرین حاکمیتی دؤورونده آذربایجاندا بیر چوخ تاریخی عابیده محو ائدیلیب. او قارانلیق ایل‌لردن سالامات قالان عابیده‌لر ایسه حاضیردا دؤولت ارگان‌لارینین قئیدسیز یاناشماسی نتیجه‌سینده یا داغیلیب یا دا محو اولماق تهلوکه‌سی ایله قارشی-قارشییادیر. بونلاردان بیری ده تبریزده یئرله‌شن باقرخانین ائویدیر.
تانینمیش میللی قهرمان باقرخانین ائوی آجیناجاقلی وضعیتده‌دیر. تبریزین «خیابان» محله‌سینده یئرله‌شن بو تاریخی ائو تخمیناً بیر ایل اول تاریخی عابیده‌لر لیستینه سالینیب. لاکین بونا باخمایاراق بینانین مرمتی ایله باغلی بیر ایش گؤرولمور. حاضیردا یاری داغیلمیش حالدا اولان ائو معتادلارین سیغیناجاغینا چئوریلیب.
مشروطه حرکاتی‌نین قهرمانی اولان باقرخان تبریز محاصره‌یه آلیناندا ستارخان و دیگر موجاهیدلرله بیرلیکده سلاحداش اولوب. اونون رهبرلیک ائتدیگی سنگر خیابان محله‌سینده یئرله‌شیب. حاضیردا باقرخان ائوی آدی وئریلمیش بو ائوین اصلینده باقرخانین یاخین سلاحداشی میر هاشیم خیابانلی‌نین ائوی اولدوغو دئییلیر. ائو قورد(قطب) میدانی‌نین یاخینلیغیندا میللی سالار کوچه‌سینده یئرله‌شیر.
باقرخانین اؤز ائوی مشروطه اینقیلابیندا روس قوشونو طرفیندن پارتلادیلیب. داها سونرا ایسه میللی حکومتین حاکمیتی دؤورونده همین محله‌یه «میللی سالار» آدی وئریلیب. سونرا تبریزه هجوم ائد‌ن پهلوی قوشونو میللی حکومت دؤورونده بورادا قویولان باقرخانین هیکلینی ده ییخیبلار.
بؤیوک موجاهید باقرخانین مزاری ایسه تبریزین طوبائیه قبریستانلیغیندا یئرله‌شیر.
وعده‌لر بینانی قورومور
اوزون ایل‌لردیر کی باقرخان ائوی آدی ایله تانینان تاریخی ائو پیس وضعیتده‌دیر. ۱۲ مهر ۱۳۹۹ تاریخینده تبریز شهر شوراسی‌نین مدنیت کمسیونونون رئیسی شکور اکبرنژاد بو ائوین برپا ائدیلمه‌سی ایله باغلی خبر وئرمیشدیر. اوندان قاباق ایسه شرقی آذربایجان میراث ایداره‌سی‌نین رئیسی و اوچونجو دؤور ایسلامی شورا دا باقرخانین ائوینین تعمیر اولوناجاغینی دئمیشدیلر. بئشینجی دؤور ایسلامی شورا دا بونونلا باغلی ایش گؤره بیلمه‌دی. تکرارلانان و یئرینه یئتیریلمه‌ین وعده‌لر ائوین داها دا داغیلماسی ایله موشایعت اولونور. حتی باقرخانین ائوی حاقدا سوال وئرن موخبیره شورانین سؤزجوسو اورانی تانیمادیغینی دئمیشدی.
۱۳۹۹-جو ایل اسفندین ۴-ده بینا تاریخی عابیده‌لرین لیستینه علاوه ائدیلیب. لاکین داغیلماق تهلوکه‌سی ایله اوزلشمیش بو ائوده هله ده تعمیر ایش‌لرینه باشلاماییبلار. باقرخانین ائوی آذربایجانین دیگر آجیناجاقلی وضعیتده اولان ائولری ایله عینی سیرادادیر.
باقرخانین دا ائوی محو اولان تاریخی عابیده‌لرین لیستینه دوشه‌جک؟
تاریخی عابیده‌لر باخیمسیز قالدیقدا طبیعی عامل‌لرین تأثیری ایله ده داغیلیرلار. بو عابیده‌لری طبیعی و یا غیر طبیعی عامل‌لرین تأثیری ایله داغیلماسی‌نین قارشیسینی دؤولت آلمالیدیر. تأسف‌لر اولسون کی جنوبی آذربایجاندا بیر چوخ عابیده مقصدیؤنلو شکیلده داغیدیلیب. قاجارلار دؤورونه عایید بیر چوخ عابیده‌لر پهلوی‌لر دؤورونده رضا شاهین امری ایله داغیدیلیب.
پهلوی‌لر دؤورونده اونلارلا عابیده داغیدیلیب. بونلارا نومونه کیمی شمس‌العماره، آلی‌قاپی، دارالسلطنه کیمی بیر چوخ اهمیتلی عابیده‌لری گؤسترمک اولار. ۱۳۵۷-جی ایلده باش وئرمیش اینقیلابدان سونرا دا عابیده‌لرین بیر قیسمی مقصدیؤنلو شکیلده بیر قیسمی ایسه باخیمسیزلیقدان داغیلیب.
بیله‌رکدن داغیدیلان عابیده‌لردن بیری ده ارک قالاسی کومپلئکسیدیر. حاضیردا بو کومپلئکسدن یالنیز ارک قالاسی سالامات قالیب. بو کومپلئکسین داغیدیلماسیندا اساس رولو تبریزین کئچمیش جومعه ایمامی اویناییب. او بورادا تاریخی کومپلئکسین بؤیوک بیر اراضیسینی ایشغال ائد‌ن مصلی آدلی یئنی مسجید تیکدیریب.
باقرخان ائوی داغیدیجی عامل‌لرله باش-باشا قالیب. الده اولان گؤرونتولره اساساً بو ائو یاخین زامان‌لاردا برپا ائدیلمه‌سه تامامیله محو اولا بیلر.
