«مونولوق»ون اون بئشینجی موصاحیبه‌سینده ، وئری (دئتا) بیلیمچی و آکتیویست ناهید (تارا) جعفری ، «سپتامبر آیی‌نین ۲۰سیندن باشلایان آیاقلانمالارا قادینلار و گنج قیزلار اؤنجولوک ائتدی. بو پروتئستولارین آذربایجانا یانسیماسی و آذربایجانداکی اؤزللیکلری حاققیندا نه دوشونورسونوز؟»، « آذربایجاندا تورک قادینلارینین دورومونو نئجه دیرلندیریرسینیز؟ سیزجه تورک قادینلاری هانسی باسقی سیستئملرینه معروض قالیبلار؟ سیزجه تورک قادینلاری بو باسقیلارا نئجه، هاردا و هانسی یؤنتملر ایله قارشیلیق وئره بیلر؟» و «سیز اؤز حیاتینیزدا چوخ بویوتلو باسقی سیستئمینی نئجه تجروبه ائدیب‌سینیز و اونا نئجه تپگی گؤستریب‌سینیز؟» کیمی سواللاری جاوابلاییر.
ایراندا قادین آیاقلانمالاری‌نین اهميتیندن بحث ائدن ناهید (تارا) جعفری قئید ائدیر کی، بو گون گلوبال مسئله اولان قادین حوقوقلاری، ایراندا داها بؤیوک پروبلئم تشکیل ائتمه‌سینه باخمایاراق بورادا قادینلارا اولان باسقیلارین حددی دونیا ایجتماعیّتینه محض بو سون آیاقلانمالار نتیجه‌سینده چاتدیریلدی. او، بو آیاقلانمالارین سببلریندن بیرینی گنجلرین سوسیال مئدیا و دیگر واسطه‌‌‌لرله دونیادا قادینلارین نئجه یاشادیغی، نه کیمی حاقلارا صاحب اولدوغونو گؤره‌رک اؤز حاقلارینی آلماق اوچون موباریزه‌یه باشلاماسیندا گؤرور.
«بوگونکو گنج قیزلار اوخویورلار، گؤزلری آچیقدیر، بونلاری بیلیرلر، دوشونورلر و بونلارین قارشیسینی آلماق، قانونلاری ديیشدیرمک ایسته‌ییرلر. آرتیق زامان ديیشیب، قادینلار دانشگاه‌لارا گئدیرلر، چالیشماق ایسته‌ییرلر. ایش موحیطینده ایسه قادینلارا چوخ باسقیلار وار، قادینلاری کیشیلرله برابر توتمورلار، اونلارا آغیر ایش، آز پول وئریلیر. دیگر طرفدن بیزیم اؤز حکومتیمیز ده مجلیسده قانون حاضرلاییر کی، مملکتده ایش یئری آزدیر، کیشیلره اؤنجه‌لیک وئریلمه‌لیدیر. بو داها بیر آیری‌سئچکیلیکدیر. بو پاتریرارخال توپلوم ایسته‌ییر کی، قدرتی کیشییه وئرسین، ایسته‌ییر کی، عائله‌‌‌نین پول گتیره‌نی کیشی اولسون، چونکی پول اؤزو ایله قدرت ده گتیریر. اونلار قادی‌نین ال-آیاق آچماسی‌نین قارشیسینی بو جور آلماق ایسته‌ییرلر.»
دونیادا قادینلارا قارشی مؤوجود حقوق پوزونتولاری، باسقیلاردان دانیشان ناهید (تارا) جعفری ایرانداکی دوروم اوزرینده خوصوصیله دایاناراق بورادا قادینلارین حیاتین موختلیف ساحه‌‌‌لرینده یاشادیقلاری چتینلیکلردن بحث ائدیر. او دئییر کی، ایراندا حکومت و قانون کیشیلرین طرفینده دوردوغو اوچون قادینلار هر ساحه‌‌‌ده آیری‌سئچکیلییه معروض قالیر.
«بیزیم قادین مسئله‌‌سینده ان بؤیوک پروبلئمیمیز بو حکومتین گلیشی ایله باشلایان حجاب موضوعسودور. بیزیم نه گئیینه‌جه‌ییمیزه، چؤله نئجه چیخاجاغیمیزا قرار وئرمک حاقیمیز یوخدور. قانونلار یازیلیب، اونیفورمالار تکلیف اولونوب کی، اونلاری گرک گئیینک. قادی‌نین سئودیگی رنگ، سئودیگی طرز اؤنملی دئییل، گرک شرایطینه باخا کی، هاردا ایشله‌ییر، باشی‌نین اوستونده‌کی کیمدیر و س. حتی بیزیم پولیسیمیزین گشت ارشاد آدیندا بیر بؤیوک شعبه‌سی وار کی خیابانلاردا گزیر، قادینلارا دایمی تذکر وئریر، توتور آپاریر و نه گئیینیب گئیینمه‌یه‌جه‌یی باره‌سینده تنبیه ائدیر. باخیریق کی، بورادا قادینی کنترل ائتمک او قدر بؤیوک بیر مسئله‌‌دیر کی، رژیم بونا بو قدر چوخ سرمایه یاتیرمیشدیر.»
ایراندا تورک قادینلارین یاشادیغی چتینلیکلر باره‌سینده‌کی تحلیللرینی بیزیمله بؤلوشن جعفری دئییر کی، تورک قادینلاری ایراندا یاشایان دیگر قادینلارین قارشیلاشدیغی زورلوقلاردان علاوه بیر سیرا باشقا مسئله‌‌لرله ده موباریزه آپاریر. او، آذربایجان توپلومونون داها سنتی و داها مذهبی اولدوغو اوچون قادینلارین بو باسقیلاری همچینین عائله‌‌‌لریندن ده گؤردوکلرینی قئید ائدیر.
«کئچن دفعه اردبیلدن اولان بیر دوستوملا دانیشارکن دئدی کی، عائله‌‌‌میزدن گنج بیر کیشی خیابانلاردا «قادین، یاشام، اؤزگورلوک» حرکاتینا قوشولور آما ائوده باجی و آناسینا دئییر کی، حجابینی دوزلت. بورادان گؤروروک کی، بو مسئله نئجه ده آنلاماسی چتین بیر مسئله اولموشدور. من گؤرورم کی، کیشیلر قادینلارا دستک اولماق اوچون چوخ چالیشیرلار، اونلارین دسته‌یی اولماسایدی بو حرکات بورا یئتیشمزدی. آنجاق ائله عائله‌‌‌لریمیز ده وار کی، ارکک اؤزو ایسته‌یه‌رک قادینلارا دستک اولماق اوچون چیخیر، آمّا اؤزو بئینینده اؤزونه ایجازه وئریر کی، آناسینا بئله نئجه گئیینمه‌لی اولدوغونو دئسین. !
جعفری ایراندا آذربایجان قادینلارینین یاشادیغی چتینلیکلردن بحث ائدرکن دئییر کی، آذربایجانلی عائله‌‌‌لرین مادی ایمکانلاری اوشاقلارا، گنجلره سوسیال مئدیا و اینترنته گیرمک اوچون موبایل تلفون آلماغا ایجازه وئرمیر و بو دا اونلارین حاضرکی موضوع‌دا معاریفلنمه‌لری و حرکاتداکی فعالیییتلرینه تأثیر گؤستریر.
«دوشوننده کی، آذربایجاندا اوشاقلار نییه سوسیال مئدیادا یوخدورلار، گؤروروک کی، آذربایجانلی اوشاقلار اؤزلرینی ایرانین ایچینده گؤرورلر و ایرانین ایچینده ده دیل فارسجادیر، اونلارین آنا دیللری ایسه تورک دیلیدیر. اونلار فارسجا دانیشاندا، طبیعی کی، لهجه ایله دانیشاجاقلار. اینسان دیل قدرتی اولماسا نئجه اینفلوئنسئر اولا بیلر. منجه بو مانع‌لردن بیری اولا بیلر. اوشاقلار بیلیرلر کی، مثلا اوتوروب دانیشسالار فارسجا شرحلر یازیلاجاق، هره بیر طرفدن مسخره ائده‌جک، دیللرینه، تورک اولمالارینا ساتاشاجاقلار.»
ایراندا اؤز شخصینه اولان باسقیلاردان دانیشارکن جعفری حیاتین موختلیف ساحه‌‌‌لرینده قادین اولدوغو اوچون قارشیلاشدیغی عدالتسیزلیک، چتینلیکلر، تاجیزلره نومونه‌لر ده گؤستریر.
«تهراندا دوستلاریما دئدیم کی نه‌دن گشت ارشاد منی توتور، باخ گؤر تهراندا قیزلار نئجه آزاد گئیینیبلر من اونلارین یانیندا چوخ قاپالییام. دوستلاریم منه دئدی کی، اونلار جسارت ائتمزلز تهران قیزلارینا یاخینلاشسینلار. ائله گؤرورلر کی، شهرستانلی‌سیز، اونا گؤره یاخینلاشیریلار. یعنی بیز آیری‌سئچکیلیگی هر یئرده گؤروروک.دیلیمیزین اوستونده، گئییمیمیزین اوستونده و س.»
«مونولوق» آذربایجان سیویک نئیشن ایله اتک‌یازی‌نین اورتاق پروژه‌سی‌دیر. اونون مقصدی آذربایجان فعاللاری، دوشونورلری و چالیشانلاری آراسیندا سؤیلمسل دیالوق قورماق و فیکیر آلیش-وئریشی ایمکانی یاراتماقدیر.
بو پروژه چوخ آشامالی بیر چالیشمادیر. ایزله‌یه‌جه‌گینیز بو ویدئو مصاحیبه‌لری سئریسی اونون ایلک آشاماسیدیر. پروژه‌نی اتک یازی مئدیاسیندان و AZ Civic Nation یوتیوب کانالیندان ایزله‌یه بیلرسیز.
ماراقلانانلار و آرتیق بیلگی ایسته‌ینلر آشاغیداکی ایمئیل واسیطه‌سیله بیزیمله علاقه ساخلایا بیلرلر:
