آمئریکا عمران مهندیس‌لری جمعیتی اینسان‌لارین یئر کره‌سینده حیرت‌آمیز خصوصیت‌لر یاراتماق قابیلیتینی نومونه گؤسترن مهندیسلیک معجزه‌لری اولان معاصر دونیانین یئددی معجزه‌سینی سئچدی. آشاغیداکی بلدچی سیزی معاصر دونیانین یئددی معجزه‌سی ایله تانیش ائدیر و هر بیر «معجزه» و اونون تأثیرینی تصویر ائدیر.
۱. مانش تونلی
بیرینجی معجزه (الیفبا سیراسی ایله) مانش تونلی‌دیر. ۱۹۹۴-جو ایلده آچیلان مانش تونلی، انگلستاندا‌کی فوکستون ایله فرانسه‌ده‌کی پادوکاله‌نی بیرلشدیرن انگلیس کانالینین آلتینداکی بیر تونلدیر. مانش تونلی اصلینده اوچ تونلدن عبارتدیر: ایکی تونل قاطارلاری داشیییر و داها کیچیک بیر اورتا تونل خیدمت تونلی کیمی ایستیفاده اولونور. مانش تونلی ۵۰ کیلومتر اوزونلوغوندادیر و بونون ۸۰%-ی سو آلتیندا یئرله‌شیر.
۲. سی‌ان تله‌قلّه‌سی
کانادانین تورونتو شهرینده یئرله‌شن سی‌ان تله‌قلّه‌سی ۱۹۷۶-جی ایلده کانادا میللی دمیر یول‌لاری طرفیندن تیکیلمیش مخابراتی قلّهسیدیر. بو گون سی‌ان تله‌قلّه‌سی فدرال مولکیتده‌دیر و «کانادا لندز کمپانی» طرفیندن ایداره اولونور. ۲۰۱۲-جی ایلدن اعتباراً سی‌ان تله‌قلّه‌سی ۵۵۳.۳ متر ایله دونیانین اوچونجو ان بؤیوک قلّهسیدیر. سی‌ان تله‌قلّه‌سی تورونتو بؤلگه‌سینده تلویزیون، رادیو و وایفای سیگنال‌لار یاییملاییر.
۳. امپایر ایستیت بیناسی
امپایر ایستیت بیناسی ۱ مای ۱۹۳۱-جی ایلده آچیلاندا دونیانین ان هوندور بیناسی ایدی (۳۸۱ متر هوندورلویونده). امپایر ایستیت بیناسی نیویورک شهری‌نین سیموولو اولماقلا یاناشی، اینسان‌لارین غیرمومکونه ناییل اولماق مؤوضوعسوندا اوغور قازانماسی‌نین دا سیموولو اولدو.
نیویورکون ۳۵۰ بئشینجی خیابان (۳۳ و ۳۴-جو کوچه‌لر آراسیندا) عونوانیندا یئرله‌شن امپایر ایستیت بیناسی ۱۰۲ مرتبه‌لی بینادیر. بینانین ایلدیریم اؤتوروجو زیروه‌سینه قدر اولان هوندورلویو اصلینده ۴۴۳ متر‌دیر.
۴. گلدن گیت کؤرپوسو
سانفرانسیسکو شهرینی شمالینداکی مارین شهرستانی ایله بیرلشدیرن گلدن گیت (قیزیل قاپی) کؤرپوسو ۱۹۳۷-جی ایلده تاماملاندیغی آندان ۱۹۶۴-جو ایلده نیویورکدا ورازانو نروز کؤرپوسو تاماملانانا قدر دونیانین ان اوزون کئچیدینه مالیک کؤرپو ایدی. قیزیل قاپی کؤرپوسو ۲.۷۳۵ کیلومتر اوزونلوغوندادیر و هر ایل کؤرپودن تخمیناً ۴۱ میلیون سیاحت ائدیلیر. قیزیل قاپی کؤرپوسو تیکیلمزدن اوّل سانفرانسیسکو کؤرفزی بویونجا یئگانه نقلیات نؤعو گمی ایدی.
۵. ایتایپو بندی
برزیل و پاراگوئه سرحدینده یئرله‌شن ایتایپو بندی دونیانین ان بؤیوک ایستیثمار سو-الکتریک (برق‌آبی) اوبیئکتیدیر. ۱۹۸۴-جو ایلده تاماملانان، تخمیناً ۸ کیلومتر اوزونلوغوندا اولان ایتایپو بندی پارانا چایینی توتور و ۱۷۷ کیلومتر اوزونلوغوندا ایتایپو سو آنبارینی یارادیر. چین-ین اوچ دره بندی‌نین ایستئحصال ائتدیگی الکتریک انئرژیسیندن داها چوخ اولان ایتایپو بندیندن الده ائدیلن الکتریک انرژیسی برزیل و پاراگوئه طرفیندن پایلاشیلیر. آنبار پاراگوئه‌نین الکتریک احتیاج‌لارینین ۹۰%-دن چوخونو تامین ائدیر.
۶. هلند شمال دنیزی‌نین محافظه‌سی (دلتا) ایش‌لری
هلندین تخمیناً اوچده بیری دنیز سوییه‌سیندن آشاغیدا یئرله‌شیر. ساحیل اؤلکه‌سی اولماسینا باخمایاراق، هلند اوقیانوسا بندلر و دیگر مانعه‌لردن ایستیفاده ائتمکله شمال دنیزیندن یئنی تورپاق‌لار یاراتمیشدیر. ۱۹۲۷-جی ایلدن ۱۹۳۲-جی ایله قدر زایدرزی دنیزینی شیرین سو گؤلو اولان آیسل-ه چئویره‌رک آفسلایت‌دیک (باغلاما بندی) آدلی ۳۰.۵۷۱ کیلومتر اوزونلوغوندا بند تیکیلدی. آیسل تورپاق‌لارینی گئری قایتاران علاوه قورویوجو بندلر و تا‌سیس‌لر تیکیلدی. یئنی تورپاق عصرلر بویو دنیز و سو آلتیندا اولان یئنی فلیوولند ایالتی‌نین یارادیلماسینا سبب اولدو. کوللئکتیو اولاراق بو اینانیلماز لاییحه هلند شمال دنیزی‌نین محافظه‌سی ایش‌لری کیمی تانینیر.
۷. پاناما کانالی
پاناما کانالی کیمی تانینان ۷۷ کیلومتر اوزونلوغوندا بین‌الخالق سو یولو گمی‌لرین آتلانتیک اوقیانوسو ایله آرام اوقیانوسو آراسیندا کئچمه‌سینه ایمکان وئریر و جنوبی آمئریکانین جنوب اوجونداکی هورن بورنو (دماغه هورن) اطرافیندا سیاحتدن تخمیناً ۱۲۸۷۵ کیلومتر قناعته سبب اولور. ۱۹۰۴-جو ایلدن ۱۹۱۴-جو ایله قدر تیکیلمیش پاناما کانالی بیر واخت‌لار آمئریکا بیرلشمیش دؤولت‌لری‌نین اراضیسی اولوب، حالبوکی بو گون او، پانامایا مخصوصدور. اوچ قیفیل دستی واسیطه‌سیله کانالی کئچمک تخمیناً اون بئش ساعت چکیر (واختین تخمیناً یاریسی ترافیک سببیندن گؤزله‌مه‌یه صرف اولونور).
قایناق:
