انگلیسجه‌دن ترجومه: اتک‌یازی ترجمه قوروپو
سحر قهوه‌سی ریتوالینیزا قاپیدان آیاغینیز دولاشاراق داخیل اولورسونوز. میزلر، صندل‌لر و اوزادیلمیش آیاق‌لاردان تشکیل اولان قاریشیقلیقدا یئرییرکن نهایت سیرانین سونونداکی مکانا چاتیرسینیز و فیکیرلشمه‌یه باشلاییرسینیز…
«بلکه بو دفعه فرقلی بیر شئی آلیم، همم، بیر باخیم… بوزلو لیمونلو زوغال چایی؟ خئیر، سارسینتییا احتیاجیم وار، همیشکیندن آلاجاغام. یاخشی، ایندی باشقا نه وار… بس او کیک‌لردن بیری؟ خئیر، اوست اوسته ییغیرام، اما اونلاردان بیرینده تخمیناً ۶۰۰۰ کالری وار … سیمیت؟ یوخ، منیمکی ائله قهوه‌دیر.»
نؤوبه سیزه چاتیر، ایشچی(گارسون) سوروشور: « سیزه نئجه کؤمک ائده بیله‌رم؟» و سیز امینلیکله دئییرسینیز: «زحمت اولماسا بیر شات اسپرسو ایله وانیللی لاتته.»
هر شئی بیر نئچه ثانییه عرضینده باش وئریر، بو جور گؤتور-قوی ائتمه‌لر، دلیللشدیرمه‌لر و قرار وئرمه‌لر هئچ واخت بیتمز. قهوه دوکانی‌نین سئناریسی سیزه تام اویماسا دا، سیزین ده اؤزونوزه مخصوص ورژنینیز اولاجاق. بئینینیز بئله ایشله‌ییر. هامیمیزین بئینی بئله ایشله‌ییر، حیاتیمیزین هر گونونون هر آنیندا دایم بئله‌جه چک چئویر ائدیر.
بئینیمیزده‌کی او کیچیک سس بعضا ساکیت، بعضا گورولتولودور، اما همیشه اوردادیر. هامیمیز او داخیلی دیالوقو تانیییریق. حیاتی سوزگجدن کئچیرن، اینسان‌لاری کاتئقورییالارا آییران و ائشیتدیکلرینی حیاتا تانیش بیر آهنگ وئرمک (داها اوّل تجروبه ائتدیگیمیز و بیلدیگیمیز وضعیت‌لر فورماتینا سالماق) اوچون ائشیدن داخیلی دیالوقو هامیمیز بیلیریک.
آراشدیرمالار گؤستریر کی، گونده ۵۰.۰۰۰-دن چوخ دوشونجه‌میز اولور. اوتوماتیک و رئاکسییا وئر‌ن(تپکیسل، واکنشی) دوشونجه‌لرده هئچ سؤز صاحیبی اولماساق و یا آز ایختیاریمیز اولسا دا، بو دوشونجه‌لرین هانسینا اهمیت وئردیگیمیز باره‌ده بؤیوک سؤز صاحیبی‌ییک.
دویغوسال وضعیتینیز، احوالینیز، وار اولما و حرکت طرزینیز داخیلی دیالوقونوزلا رقص ائدیر. اؤزونوزله، سیز اولماقلا باغلی تجروبه‌نیز، اؤزونوزله و باشقالاری ایله دانیشیقدا قاریشیق بیر شکیلده مؤوجوددور. بو یالنیز نه حاقیندا دانیشدیغینیز دئییل، داها دا اهمیتلیسی، بو باره‌ده نئجه دانیشدیغینیزدیر.
اکثر اینسان‌لار اوّلجه معین حیس‌لری اولدوغونا اینانیرلار، آردیندان ایسه نئجه حیس ائتدیکلرینی دوشوندوکلرینی حساب ائدیرلر. تام اولاراق بئله دئییل. ایستیفاده ائتدیگینیز دیل حیس‌لرینیزه بیرباشا و گوجلو تأثیر گؤستریر. آلمان فیلوسوفو مارتین هایدگر: «دیل وارلیغین ائویدیر» دئسه ده، هموطنی هانس-گئورگ گادامر ایسه ایصرارلا «دیل اولمادان هئچ نه اولماز» دئییردی.
اؤز حیاتینیزا بیر باخین، «بو مومکون دئییل»، «باجارمیرام»، «چاشیب قالمیشام»، «بو چوخدو» و یا «چالیشیرام» کیمی ایفاده‌لردن ایستیفاده ائتدیگینیزی نظره آلین. بونلارین هر بیری چالیشمالارینیزدا علیه‌ینیزه اولان معین دویغوسال وضعیت‌لره (هیرس، مایوسلوق، اینجیکلیک، اومیدسیزلیک و سایره) سبب اولور. اومیدسیزلیگین ایش آختاریشیندا، مایوسلوغون موناسیبت‌لرینیزی یاخشیلاشدیرماقدا و یا باجاریقسیزلیغین ایشده یوکسلمه‌یه نئجه فایداسی اولار؟ اولماز. بو حیس‌لر سیزی آغیرلاشدیرار و هوسینیزی آزالدار.
ساده بیر مثال اولاراق، «بو مومکون دئییل» سؤزونو «هله حل ائتمه‌میشم» کیمی دییشمک معین پروبلئم‌لرله نئجه مشغول اولدوغونوزا دیققته‌لاییق تأثیر گؤستریر. ائموسیونال وضعیتینیز دییشیر.
رئال دیلله دئسک، مشغول اولدوغونوز شئی باره‌ده نئجه دانیشدیغینیز یا سیزین خئیرینیزه، یا دا علیه‌ینیزه ایشله‌ییر (دانیشیق طرزینیزه باغلی اولاراق).
نؤوبتی دفعه اؤزونوزو سیخیلمیش، عصبی و یا یورغون حیس ائتدیگینیز زامان اؤزونوزو یوخلایین. بو داخیلی صحبتی بیر نئچه دفعه گؤزدن کئچیرین و اؤزونوزه نئجه تعریف ائتدیگینیزی، اؤزونوزو نئجه حیس ائتدیگینیزله علاقه‌لندیره بیلدیینیزه باخین. اؤزونوزدن سوروشون: «من هانسی دیلدن ایستیفاده ائدیرم، نیسه قوران یوخسا محو ائد‌ن دیلدن؟ بو منیم خئیریمه‌دیر، یوخسا علیهیمه؟»
دیل حقیقتا ده بو قدر اهمیتلیدیر. دانیشیغین سنی گؤستریر و سن نه دانیشیرسانسا ائله اوسان.
قایناق:
