نووروز بایرامی موناسیبتی ایله اؤلکه ایچینده یوکسک میقیاسدا سفرلر قئیده آلینیب. کرونا خسته‌لیگی‌نین یایغینلاشماسیندان سونرا بو ایلک دفعه ایدی کی بایرام تعطیل‌لرینده یول‌لاردا ترافیک آغیرلاشدی و چوخ سایدا اینسان باشقا شهرلره سفره گئتدیلر. لاکین اردبیل استانی کئچن ایل‌لرله موقاییسه‌ده ده داها آز سفر ائدنه شاهید اولوب.
سفرلره ان چوخ هدف اولان شهرلر آراسیندا آذربایجان شهرلرینین آدی کئچمیر. ان چوخ توریست قبول ائد‌ن استان‌لار مرکزی استان‌لار اولوب. آذربایجانین ان بؤیوک شهری اولان تبریز ایسه طبیعی و تاریخی باخیمدان یوکسک پوتئنسیالا مالیک اولدوغو حالدا اوخشار شهرلرله موقاییسه‌ده ساکیت گون‌لر کئچیردیگی بلینیر.
تبریز شهرینین سون بایرام گون‌لرده‌کی دورومو بام-باشقا اولوب. بایرامدان آز قاباق تبریز بلدییه باشقانی وظیفه‌سیندن آزاد ائدیلیب و بو ایسه بایرام عرفه‌سینده شهر سوییه‌سینده تام نیظامسیزلیغا سبب اولوب. بیر چوخ تاریخی عابیده‌نین قاپیسی باغلی قالیب، گلن توریست‌لر باغلی قاپی‌لارا دییب قاییتمالی اولوبلار.
لاکین بو پروبلئمین بوتونو دئییل. چونکی آذربایجانین باشقا استان‌لاریندا دا بنزر ساکیتلیک کئچیریلیب و گزمه‌یه چیخان چوخ سایدا اینسان‌لارین مقصدینه چئوریلمه‌ییب. سمنان استانی جمیت باخیمیندان اردبیل استانی‌نین یاریسیجادیر لاکین تعطیل‌لر بویونجا سمناندان سیاحته چیخانلار اردبیلین ۴ قاتیدیر. سمنانا گلنلر ده اردبیله گلنلرین ۳ قاتیدیر. بو نیسبت باشقا استان‌لار و شهرلرده ده قورونوب.
مرکزی استان‌لارین توریزم بایرامی
توریزم سئکتورو ایقتیصادیاتدا اؤنملی عامیل‌لردن حساب ائدیلیر و بیر چوخ حال‌لاردا یئرلی اهالی‌نین اصیل گلیر قایناغینا چئوریلیر. لاکین گونئی آذربایجان شهرلری بوندان محروم بوراخیلیبلار.
ایران سیاحت خیدمت‌لری کوردیناسییا قرارگاهی‌نین وئردیگی معلوماتا اساساً سیاحت‌لرده ان چوخ مقصد سئچیلن استان‌لار مرکزی استان‌لار اولوب. ایلک ۱۰ استان ایسه بونلاردان عبارتدیر: تهران، فارس، اصفهان، رضوی خراسان، خوزستان، کرمان، کرمانشاه، یزد، لرستان و همدان.
بایرام تعطیل‌لرینین ایلک ایکی گونونده ان چوخ توریست جذب ائد‌ن تاریخی عابیده‌لر آراسیندا دا آذربایجانین عابیده‌لریندن خبر یوخدور.
25 اسفنددن 6 فروردینه‌دک ان چوخ سیاحتچی گؤندرنلر ده یئنه مرکزی استان‌لار اولوب. بونلار تهران، اصفهان، فارس کیمی استان‌لار اولوب، بو ایسه اؤلکه سوییه‌سینده ریفاهین عدالتسیزجه پایلاشیلدیغینا ایشاره‌دیر.
سفر ائدنلر نییه آذربایجانی مقصد سئچمیرلر
عمومیتله گونئی آذربایجان شهرلری یای فصلینده گزمه‌یه داها اویغون اولدوغو دئییلیر. بو سؤز جاوابده شخص‌لرین موباحیثه‌یه وئردیکلری جاوابدیر. لاکین یای فصلینده بئله آذربایجان شهرلری لاییقی میقداردا توریست جذب ائده بیلمیر. عومیمیتله آذربایجان شهرلری مرکزی استان‌لارلا موقاییسه‌ده داها آز توریستین مقصدی اولور. بو ایسه آذربایجان استان‌لاریندا توریزم سئکتورونا اؤنم وئریلمه‌مه‌سینین نتیجه‌سیدیر.
کئچمیشده توریست‌لر اوچون ان چکیجی عامیل‌لردن بیری اورمو گؤلو ایدی. ایندی ایسه بوتونلوکله یوخا چئوریلمکده‌دیر. آذربایجانین گونئیینده یاشایانلار اورمو گؤلونون قوروماسیندا دؤولت ارگان‌لارینی گولو قوروتماقلا گوناهلاندیریرلار.
بونونلا یاناشی باشقا طبیعی توریست آتراکسیونلاری دا مرکزی استان‌لارلا موقاییسه‌ده داها آز تبلیغ اولونور و داها پیس دورومدادیرلار.
توریست‌لر اوچون چکیجی اولان باشقا یئر ایسه ایرانین شمالیندا یئرله‌شن خزر ساحیل‌لری و شمال مئشه‌لریدیر. بونو قاراداغ مئشه‌لری ایله موقاییسه ائتدییمیزده مسئله آیدینلانا بیلر. قاراداغ مئشه‌لری ایراندا ان آز تانینانن مئشه‌لر سیراسیندادیر و عینی حالدا بیر چوخ طبیعی و غیرطبیعی داغیدیجی عامیلله موباریزه آپاریر.
تاریخی عابیده‌لر ده بنزر دورومدادیرلار. بو ایل بایرام تعطیل‌لرینده ان چوخ توریست قبول ائد‌ن تاریخی عابیده‌لر لیستینده ده مرکزی استان‌لارین تاریخی عابیده‌لری دورور. بونلاردان بیری شیرازدا یئرله‌شن کریم‌خان ارکی اولوب. ایلک باخیشدا توریست‌لر اوچون هانسی‌نین داها چوخ چکیجی گله‌جه‌یی آیدین گؤرونور.
آذربایجانلا برابر فارس اولمایانلارین یاشادیغی باشقا یئرلر ده عینی دورومدادیرلار. بو ایسه دؤولتین مرکزی سیاست‌لرینین آچیق نومونه‌سیدیر. ۱۰۰ ایللیک مرکزچی اقتیدار فارس‌لارین یاشادیغی مرکزی استان‌لاری داها چوخ منیمسه‌یه‌رک باشقا یئرلره آیریسئچکیلیکله یاناشیب.
نتیجه اعتباری ایله مرکزی استان‌لار داها چوخ آتتراکسیونا صاحب اولور و آذربایجان کیمی فارس اولمایانلارین یاشادیغی بؤلگه‌لرده وار اولان طبیعی و تاریخی آتتراکسیونلار یوخ اولور و یا آجیناجاقلی شکیلده آیاقدا دورورلار.
