فارس مئدیاسی قاسیم سلیمانی‌نی قورخماز و ایگید بیر سردار کیمی گؤسترمه‌یه جهد ائدیر. بو موحاریبه حالیندا یاشایان بیر اؤلکه‌یه چوخ دا لازیمدیر. چونکی خالقا قورخمازلیق روحو وئریب و اونلاری موحاریبه مئیدانلارینا آخیتماق سیمگه‌سیز و قهرمانسیز مومکون دئییلدیر.
ائله بو رئکلاملار نتیجه‌سینده ایران گئنل‌لیگی، اؤزل‌لیکله لومپن پرولتاریا صینفی، اونو قورخماز و باراک اوباما و دونالد ترامپ‌ین اوریینه قورخو سالان بیر قهرمان کیمی قبول ائدیرلر. تعجوبلو مقام بودورکی، قاسیم سلیمانی فاناتلاری آراسیندا، دوشونجه باخیمیندان ایران رئژیمینه قارشی اولان کوروشچو قوروپلارا عایید آداملار دا آز دئییلدیر. بیزجه بو مسئله‌ده، بو کوتله‌لرین سوسیوپیسخولوژیک بوشلوقلاری اساس رول اویناماقدادیر.
بؤلگه‌میزین باشقا خالقلاری کیمی فارسلارین دا تاریخی یادداشی، ایسلام و شیعه‌دن آلینمیش کولتورله فورمالاشمیشدیر. بو کولتورده پیغمبرین عمیسی حمزه، نخعی مالک‌اشتر و علی‌اوغلو ابوالفضل شجاعت و ایگیدلیک سیمگه‌لری کیمی تانینیرلار. ایرانچی بیریسی بو عربلری اؤزونه سیمگه کیمی قبول ائده‌بیلمز. هابئله ایران تاریخینده (ان‌آزی سون بئش‌یوز ایلده) قهرمانلیق صفتلریله تانینمیش صفوی شاه‌عباس، افشاری نادرشاه و قاجاری عباس‌میرزا کیمی‌لری ده تورکدورلر. بئله لیکله ایرانچی دوشونجه‌سینه قارا قوشون اولان فارس لومپن پرولتاریاسی ایگید و قهرمان بوشلوغونو حیس ائدرک کوروش هخامنشی و قاسیم سلیمانی کیمی‌لرینی اؤزلرینه قهرمان سئچیب اونلارلا اؤیونورلر. هله بو ایکی سرداری بیر-بیرینه بنزدن باشقا عامیلده واردیر. قاسیم سلیمانی و کوروش هخامنشی‌نین آت اویناتدیقلاری تورپاقلاردا قدیم بابیل و فینیقی و بوگونکو عراق و سوریه عینیدیر.
بو یازاردان باشقا بیر یازینی دا اوخو: قیرمیزی یوخ، ساری آلما
بیلدیگیم قدر فارس خالقی بؤلگه‌میزین عاریف، شاعیر و سیاستچی یئتیشدیرن خالقلاریندان اولموشدور. آما اونلار هئچ زامان قهرمان و ایگید یئتیشدیرن خالق اولمامیشلار. اونا گؤره بو بوشلوق اونلارین تاریخ آنلاییشلارینا و چاغداش تاریخده داورانیشلارینا کؤلگه سالیبدیر. اونلار کئچن مین‌بئش‌یوز ایلده هئچ بیر ساواشین غالیبی اولمامیشلار. اونلار آردی-آردیجا بنی‌امیه و بنی‌عباس عربلرینه، غزنه‌لی و سلجوقلو تورکلرینه، موغوللاردان سونرا بیرداها تیموری، صفوی، افشار و قاجار تورکلرینه مغلوب اولموشلار. محض بو تاریخی یادداشا گؤره، تهران علامه طباطبایی یونیورسیته‌سی‌نین سوسیوپیسخولوژی اوستادی؛ دوکتور یوسف کریمی بو حاقدا بئله یازیر: «موغوللار و باشقا فاتیحلرین قارشیسیندا راحاتجاسینا مغلوب اولان ایرانلی کوتله‌سی، بوگون اؤزونو قورخاق و گوجسوز حیس ائدیر. بونلار بو گرچه‌یه عکس‌العمل اولارق اؤزلرینی ایگید و قورخماز گؤسترمک مجبوریت‌ینده‌دیرلر*».
دوکتور کریمی‌نین سؤزلرینی نظرده آلاراق ، پهلوی حؤکومتی‌نین سوپر گوجلره یاخینلاشیب، اؤلکه‌نین چوخ میقدار پاراسینی سیلاح آلماغا خرجله‌ییب بؤلگه‌نین بیرینجی گوجو و کؤرفزین ژاندارماسی اولماغا جان آتماسی یئنی آنلام تاپیر. اونلار گوجله‌نن همن کؤرفزین گونئینده یئرلشن عمان و ایمارات اؤلکه‌لرینه عسگر یورودوب مین ایل اؤنجه کی یئنیلگی‌لرین اینتقامینی عربلردن آلماق ایسته‌دیلر. ایسلامی حؤکومت داها بؤیوک داش گؤتورب شرقه، غربه اؤلوم مئساژی وئریب، «سووئتلره اؤلوم، آمریکایا اؤلوم» باغیرتیلاری ایله دونیایا مئیدان اوخودولار. بو حربه-زوربا تاریخی یئنیلگی‌لره عکس‌العمل اولاراق اؤزلرینی قورخاق حیس ائدن اینسانلارین بوشلوغونو دویوروب حؤکومته اعتیبار قازانیر.
قاسیم سلیمانی و کوروش هخامنشی کیمی‌لرینه سیغینماق بونلارین ایچ دونیاسیندا یئرلشن قورخاقلیق حیسسینه توختاقلیق وئریر.
ی.س:
تیتر محمد قائدین قاسم و آلبرت مقاله‌سیندن اقتباسدیر.
*علامه یونیورسیته‌سی، پیسخولوژی فاکولته‌سی، بیرلیک درگیسی، اوچونجو سایی
