غربی آذربایجان ویلایتی تحصیل گؤستریجی‌لرینه گؤره ۳۱ ویلایت ایچینده ۲۹-جو سیرادا یئرله‌شیر. اؤلکه سوییه‌سینده غربی آذربایجاندان سونرا تحصیل سوییه‌سی پیس اولان یالنیز بلوچیستان و هرمزگان‌دیر. عمومیلیک‌ده ایسه غربی آذربایجان‌دا آدام‌باشینا دوشن تحصیل ساحه‌سی اؤلکه اورتالاماسیندان آشاغیدا یئرله‌شیر.
غربی آذربایجان‌دا آدام‌باشینا دوشن تحصیل ساحه‌سی اؤلکه اورتالاماسیندان آشاغیدا یئرله‌شیر.
1397-جی ایلده تحصیل ناظیرلیگینین غربی آذربایجان ویلایتی اوزره نماینده‌سی‌نین اینکیشاف اوزره معاونی بهرام صمدی ویلایتده تحصیله جدی دقت آییرماغین واجیبلیگینی وورغولاییب. بوندان باشقا او، قید ائدیب کی، غربی آذربایجان‌دا آدام‌باشینا دوشن تحصیل ساحه‌سی ۴.۰۵ کوادرات متر اولدوغو حالدا، یزد ویلایتینده بو گؤستریجی ۸.۸۶ کوادرات متردیر.
بو گؤستریجییه گؤره ان یاخشی وضعیتده اساساً فارس‌لارین یاشادیغی اصفهان، یزد، کرمان و سمنان کیمی مرکزی ویلایتلردیر. مرکزدن کنار ویلایت‌لره دوغرو ایسه تحصیل کئیفیتی دوشور.
عدالت لازیم‌دیر
غربی آذربایجان ویلایتی یالنیز بو گؤستریجییه گؤره دئییل، باشقا تحصیل گؤستریجی‌لرینه گؤره ده گئریده‌دیر. ساوادلانما گؤستریجی‌سینه گؤره غربی آذربایجان اؤلکه‌ده ۳۰-جو، آدام‌باشینا دوشن ایدمان ساحه‌سینه گؤره ایسه ۲۹-جو یئرده‌دیر.
غربی آذربایجان مکتب‌لرینین تجهیز و تعمیر مدیری‌نین وئردیگی معلوماتا اساساً ویلایتده ۵۶۰۰-دن چوخ داغیلمیش، ۱۳۶۵ پالچیقدان، آغاجدان تیکیلمیش و کانکسدن عبارت اولان و ۶۰۰۰ تعمیره احتیاجی اولان مکتب وار.
تحصیل ناظیرلیگینین غربی آذربایجان ویلایتی اوزره مدیری منافی مکتب‌لرده تحصیلین ضعیف اولماسینا سبب کیمی معلم آزلیغینی گؤسته‌ره‌رک یئنی تشکیل ائدیلن حکومتین داها عدالتلی قرارلار وئره‌جه‌یینه اومید ائتدیگینی دئییب.
فارس اولمایانلارلا باغلی عمومی وضعیت
1395-جی ایلین نتیجه‌لرینه گؤره 1385-جی ایلدن 1395-جی ایله‌دک اؤلکه سوییه‌سینده ساوادلیلیق درجه‌سی ان چوخ تهران و مرکزی ویلایت‌لرده آرتیب. ان ضعیف نتیجه‌لر ایسه فارس اولمایانلارین چوخلوق تشکیل ائتدیگی ویلایتلردیر. بوندان اوّلکی نتیجه‌لرده ده وضعیت عینی اولوب. 1375-جی ایلین نتیجه‌لرینه اساساً ده گونئی آذربایجانین ۴ ویلایتی (شرقی آذربایجان، غربی آذربایجان، زنجان و اردبیل) ساوادلانما سیرالاماسیندا لیستده سون یئری توتموش ۸ ویلایتین ایچریسینده اولوبلار. بو نتیجه‌لر هم ده آنا دیلینده تحصیلین واجیبلیگینی گؤستریر.
1372-جی ایلده شرقی آذربایجان و تهران ویلایتینده آپاریلمیش آراشدیرمادا عینی سوییه‌لی تورک و فارس اوشاق‌لاری مقایسه ائدیلیبلر. ماکسیموم نتیجه‌سی ۲۰ اولان ساوادلانما ایمتحانیندا تورک اوشاق‌لارینین نتیجه‌سی ۸.۵ اولدوغو حالدا فارس اوشاق‌لارین گؤستریجیسی ۱۵ اولوب. شرقی آذربایجان‌دا ایکی دیللی اوشاق‌لارین تحصیل مسئله‌لری آدلی آراشدیرمانین مؤلفی سولماز مدرس تهراندان و شرقی آذربایجاندان هره‌سیندن ۱۲ مکتبی سئچه‌رک بورادا تحصیل آلان اوشاق‌لاری مقایسه ائدیب. نتیجه‌لره اساساً شرقی آذربایجان‌دا اؤز آنا دیلینده تحصیل آلمایان تورک اوشاق‌لارین اؤز آنا دیلینده تحصیل آلان فارس اوشاق‌لاردان گئری قالدیقلاری معین ائدیلیب.
شرقی آذربایجان‌دا اؤز آنا دیلینده تحصیل آلمایان تورک اوشاق‌لارین اؤز آنا دیلینده تحصیل آلان فارس اوشاق‌لاردان گئری قالدیقلاری معین ائدیلیب.
آنا دیلی‌نین تحصیله تأثیری حاقیندا بیر چوخ آراشدیرمالار آپاریلیب. ایران‌دا آپاریلان آراشدیرمالار دا تحصیلین آنا دیلینده آپاریلماسینین واجیبلیگینی تصدیقله‌ییر. ایران‌دا یاشایان بوتون فارس اولمایانلار آنا دیلینده تحصیل آلماق ایستک‌لرینی دایم سسلندیریبلر. بو موضوع خصوصی ایله گونئی آذربایجان‌دا آکتوال‌دیر. لاکین ایران دؤولت‌لری اؤز فارسلاشدیرما سیاستینی آخساتمیر، عکسینه داها دا گوجلندیریر.
ایکی‌باشلی آیری‌سئچکیلیک
تحصیل ناظیرلیگینین غربی آذربایجان اوزره نماینده‌سی‌نین دئدیگینه اساساً تحصیله یارارسیز و تعمیره احتیاجی اولان تحصیل موسسه‌لرینین بو ویلایتده چوخ اولماسی دؤولتین عدالتسیز موناسیبتینه گؤره‌دیر. بونونلا بئله ویلایتده یاشایان تورک اوشاق‌لار اؤز آنا دیل‌لرینده یوخ، فارسجا تحصیل آلماق مجبوریتینده‌دیرلر. هر ایکی مسئله اؤزلویونده تحصیله بؤیوک تأثیر گؤستریر.
سون کنکور نتیجه‌لرینه اساساً عالی مکتب‌لره قبول اولونان طلبه‌لرین سایی مرکزی ویلایت‌لرده داها چوخ‌دور. طلبه آدینی قازانا بیلمه‌ین و فارس اولمایانلارین آراسیندا ایسه ان پیس وضعیتده غربی آذربایجان ویلایتی‌نین تورک‌لریدیر. بو دا ایکی‌باشلی آیری‌سئچکیلیگین نتیجه‌سی‌دیر.
