آذربایجان موستقیل سینماسی‌نین «قوجالار اؤلمز» فیلمی 26 آباندان اعتباراً hashure.com سایتیندا آنلاین اکرانا چیخیب. 1397-جی ایلده اردبیل ویلایتینده چکیلمیش تورکجه-فارسجا «قوجالار اؤلمز» فیلمی بوندان اول هنر و تجربه کینوتئاترلار شبکه‌سینده نمایش ائتدیریلمیشدی. بوندان باشقا فیلم ۲۰۲۰-جی ایلده تورکیه‌نین دؤولت تئلویزیونو اولان TRT-ده ده نمایش ائتدیریلیب.
کمدی-درام ژانریندا اولان «قوجالار اؤلمز» فیلمی اوجقار بیر یئرده اؤلومسوزلوک نتیجه‌سینده یارانان غریبه بیر احوالاتدان بحث ائدیر. اوزون ایل‌لردیر هئچ کیمین اؤلمه‌دیگی بیر کندده قوجالارین اؤلوم آرزوسو یئنی باش وئرن حادثه‌لردن سونرا حیات ایسته‌یینه چئوریلیر و بو اومیدسیزلیک توزونو سیلیب آپاریر. اثرین رئژیسسور و سسئناریستی رضا جمالی دئییر کی پئرسوناژلارین عصیانکار روح‌لاری اولدوقلاری اوچون دونیانین بوتون وار-دؤولتی ایله ساواشیرلار. اونلار روح‌لارینین دینجلیگی اوچون ان بؤیوک وارلیق‌لاری اولان حیات‌لاریندان واز کئچمه‌یه حاضیردیرلار.
فیلمین اساس دیلی تورکجه‌دیر، لاکین آرادا بیر فارسجا دانیشیق‌لار دا اولور. داها اوّلکی نمایش‌لرده اولدوغو کیمی فیلم فارسجا آلت‌یازی ایله گؤسته‌ریلیر.
ایلک دفعه ۳۷-جی بین‌الخالق فجر کینوفستیوالیندا نمایش اولونان «قوجالار اؤلمز» فیلمی، بیر نئچه باشقا فستیوال‌لاردا دا ایشتیراک ائد‌ه‌رک موختلیف موکافات‌لارا لاییق گؤرولوب. بونلاردان توکیو فیلم فستیوالیندا «آسیانین روحو» موکافاتی، اسپانیادا کئچیریلن بارسلونا آسیا فیلم فستیوالیندا ایسه «ان یاخشی سسئناری» موکافاتینی سایماق اولار.
