بو گزارش (۱۷ سئنتیابر ۲۰۲۲-جی ایل – ۱ فئورال ۲۰۲۳-جو ایل) بیر قوروپ آذربایجانلی حقوق مودافیعه‌چیسی طرفیندن ۲۰۲۲ و ۲۰۲۳-جو ایل ایران اعتراضلارینی آراشدیراراق آذربایجانلی تورک قادین و اوشاقلارا قارشی ایراندا اینسان حقوقلاری‌نین پوزولماسی‌نین سون وضعيیتی ایله باغلی حاضیرلانمیشدیر.
ایران حؤکومتی ائتنیک و دیل قوروپلاری ایله باغلی هئچ بیر رسمی دئموگرافیک آمار آچیقلامادیغی اوچون، ایرانداکی آذربایجان تورکلری‌نین سایی باره‌ده تخمینلر وئرمک چوخ چتیندیر. لاکین ۲۰۱۱-جی ایلین یانواریندا تورکیه‌یه رسمی سفری زامانی ایرانین کئچمیش خاریجی ایشلر ناظیری علی اکبر صالحی بیان ائتمیشدی کی، ایرانلی‌لارین ۴۰ فایزی تورکجه دانیشیر:
«بیز دئمک اولار کی، عینی دیلده دانیشیریق. ایرانلی‌لارین ۴۰ فایزی تورکجه دانیشیر. بو، تورکییه ایله ایران آراسیندا بؤیوک بیر باغدیر.»
بو گزارشین مقصدی ایران اسلام رئسپوبلیکاسی طرفیندن اینسان حاقلاری پوزونتولاری باره‌ده معلوماتلاردا اولان بوشلوقلاری آرادان قالدیرماقدیر. بو، ایران رژیمی قوه‌لری طرفیندن حبس ائدیلن، سورغو-سؤال اوچون چاغیریلان، ایشدن قووولان، گولله‌له‌نرک اؤلدورولن و شکنجه‌لره معروض قالان آذربایجانلی تورک قادین و اوشاقلاری حاقیندا اینسان حاقلاری گزارشی‌دیر.
بیز، ایران اسلام رئسپوبلیکاسی‌نین مختلیف تهلوکه‌‌‌سیزلیک قوه‌لری و محکمه‌‌لری طرفیندن فیزیکی زوراکیلیق، بیرباشا گولله‌لنمه و شکنجه‌لره معروض قالاراق قتله یئتیریلن یالنیز ۱۱ آذربایجانلی تورک قادین و اوشاغین کیملیگینی تصدیق ائده بیلدیک. بعضی حاللاردا حبس ائدیلرکن آغیر فیزیکی و روحی سارسینتی کئچیرمیش حبس ائدیلمیش شخصلر آزادلیغا بوراخیلدیقدان سونرا انتحار ائدیبلر.
گزارشین «A» حیصه‌‌‌سی ایرانین سرکوب قوه‌لری طرفیندن قتله یئتیریلن ۱۱ آذربایجانلی قادین و اوشاق اعتراضچی حاقیندادیر.
گزارشین «B» حیصه‌‌‌سی حبس ائدیلمیش و ایش پروسئسی‌نین سونونا قدر آزاد ائدیلمیش ۷۹ قادین و اوشاق اعتراضچی‌نین ایشینی ایضاح ائدیر.
گزارشین «C» حیصه‌‌‌سی کشفيات ناظرلیگی طرفیندن چاغیریلان اوچ شخصی تحلیل ائده‌جک و اونلارین ایشی ایله باغلی جزییاتلاری تقدیم ائده‌جک.
گزارشین «D» حیصه‌‌‌سینده بیز جزا نؤع کیمی ایشدن کنارلاشدیریلان بیر شخصین ایشینه دقت یئتیره‌جه‌ییک.
گزارشین «E» حیصه‌‌‌سینده ایرانین محکمه سیستمی طرفیندن ساخلانیلان و اتهام اولونان آذربایجانلی قادین وکیلین ایشینی آراشدیراجاغیق.
گزارشین «F» حیصه‌‌‌سینده اعتراضلار زامانی حبس ائدیلمیش و مختلیف جزالارا محکوم ائدیلمیش ۲۰ محکومون ایستاتوسو نظردن کئچیریله‌جک.
گزارشین دیلی انگلیسجه‌دیر.
گزارشی بوردان دانلود ائده بیلر و اوخویا بیلرسینیز
