گونئیلی ر‌سام و هئیکل‌تراش روحی تونا، 8 آبان 1400-جی ایلده کانادادا یئرلشن ائتوبیجوکه گئنئرال هوسپیتال آدلی خسته‌خانادا دونیاسینی دییشیب. روحی تونا معده‌آلتی وزی خرچنگیندن(سرطان پانکراس) اذیت چکیردی.
او، 23 دئکابر 1965 جی ایلده ماراغادا آنادان اولوب. اوشاق یاشلاریندان اینجه‌صنعته ماراغی اولان روحی ایلک اؤنجه رساملیغا ماراق گؤسته‌ریب. سونرادان سیاسی دوشونجه‌لرینه گؤره حیاتینین ۷ ایلینی ایران زیندان‌لارینا کئچیرمه‌یه مجبور اولوب. موصاحیبه‌لرینده آذربایجانین موختاریت ایسته‌یینی سیمووللاشدیران بیر کاریکاتور چکدیگی اوچون حبس اولوندوغونو قید ائدیب. چکدیی کاریکاتورا گؤره حبسه دوشن روحی تونا، ایلک دفعه قوشاچای‌دا حبسده اولدوغو مدتده هئیکل‌تراشلیغا باشلاییب. حبسدن چیخدیقدان سونرا دا هئهکل‌تراش کیمی فعالیتینی داوام ائتدیریب. حبسدن آزاد اولونسا دا تعقیب‌لره معروض قالدیغی اوچون ۱۹۹۹-جو ایلده تورکیه‌یه کؤچوب. ایستانبولا کؤچدوکدن سونرا دا حرفه‌ای فعالیتینه داوام ائدیب. تورکیه‌ده وطنداشلیق آلا بیلمه‌دیگی اوچون ۲۰۰۶-جی ایلده خانیمی ریمما موهیتووا ایله بیرلیکده کانادایا کؤچوب و عمرونون سونونادک ده بوردا یاشاییب.
هئیکل‌تراش روحی تونا ۱۷ یاشیندا ایکن تبریز زیندانیندا ستارخان، قاچاق نبی، کوروغلو کیمی میللی شخصیت‌لرین هیکل‌لرینی دوزلده‌رک حبسخانا یولداش‌لارینا هدییه ائدیب. گنج یاشلاریندان داشیدیغی میللی روح صنعتکارین بوتون اثرلرینده گؤزه چارپیر. روحی تونا بابک خرمی، ستارخان، باقرخان، محمد امین رسول‌زاده، سید جعفر پیشه‌وری، ابولفضل ائلچی‌بی کیمی بیر چوخ میللی شخصیت‌لرین هیکلینی دوزلدیب. اونون اثرلری تک آذربایجان‌داکی شخصیت‌لره حصر ائدیلمه‌ییب. او، آتاتورکون، یونس امره‌نین، مختوم‌قولونون، ایسماعیل خان قاشقایین و دیگر تورک دونیاسینین تانینمیش شخصیت‌لرینین ده هیکل‌لرینی دوزلدیب.
بون‌دان باشقا چاغداش گونئی آذربایجان آیدین‌لاریندان اولان پروفسور زهتابی، پروفسور هئیت و رضا براهنی‌نین هیکل‌لری ده اونون ال ایشلری سیراسیندادیر.
روحی تونا قیسا سورن عمرونده اؤزوندن سونرا تورک دونیاسی اوچون بؤیوک میراث قویوب. بو میراث اونون خاطیره‌سینی دایم یاشاداجاقدیر.
اتک‌یازی آدیندان عائله‌سی، یاخین‌لاری و آذربایجان میللتینه باش ساغلیغی وئریریک.
