کانادانین تورونتو شهرینده حیاتلا ویداعلاشان گونئیلی یازیچی رضا براهنی‌نین اؤلومو ده جمعیتده بعضی موباحیثه‌لره سبب اولوب. بعضی‌لری اونو ایرانا قارشی خایینلیکده گوناهلاندیرسالار دا، دیگرلری اونا سیاسی دوشونجه‌لرینه گؤره یوخ، یازیب یاراتدیقلارینا گؤره دَیَر وئره‌رک، اونو فارس ادبیاتی‌نین بؤیوکلریندن حساب ائدیرلر. اصلینده موباحیثه‌یه سبب اونون سیاسی باخیش‌لاری اولور و ادبی حیاتی عمومیتله یوکسک دیرلندیریلیر.
اؤلوموندن بیر گون سونرا اوغلو اوکتای آتاسی‌نین مزاری‌نین ایراندا اولماسی اوچون سوروملو قوروم‌لارلا دانیشاجاغینی بیلدیریب. اصلا تبریزلی اولان رضا براهنی آذربایجانلی‌لار طرفیندن یوکسک قیمتلندیریلیر. بیر چوخ سوسیال مئدیا ایستیفاده‌چی‌لری اؤز یازیلاریندا اونون تبریزده دفن اولونماسینی ایستدیکلرینی قئید ائدیبلر. بیر قروپ آذربایجانلی تبریزین ارک قالاسینین یاخینلیغینا توپلاشاراق دوکتور براهنی‌نین خاطره‌سینه شام یاندیریبلار.
رضا براهنی حیاتدا اولاندا دا فرقلی مؤوقعیینه گؤره اطرافیندا دایما موباحیثه‌لر اولوب. او، فارسجانی دا سئومه‌یی اؤیرندیگینی دئییردی. لاکین فارسجانین فارس اولمایانلارا زورلا تطبیق ائدیلدیگینی ده قئید ائتمه‌یی اونوتموردو. او فارس ادبیاتیندا عوض‌ائدیلمز مقاما صاحب اولماقلا یاناشی فارس اولمایانلارین دیل حاق‌لارینی دا مدافعه ائدیردی. بو مؤوقعیینه گؤره ایسه فارس میللتچی‌لری طرفیندن دایما هوجوم‌لارا معروض قالیب. اونون بو موباریزلیگی فارس اولمایانلار آراسیندا دا حؤرمتینی گونون-گوندن آرتیریب.
آزلیق‌لارین براهنیسی
تانینمیش عرب یازیچی یوسف عزیزی بنی‌طرف ایران یازیچی‌لار بیرلیگینده رضا براهنینی نومونه گؤتورمه‌یه چالیشدیغینی دئییب. او، تورک ایدی و فارس یازیچی‌لارینین آراسیندا گئنیش یاییلمیش عرب دوشمنچیلیگیندن اوزاق ایدی دئییر. بنی‌طرف هم ده رضا براهنی‌نین دسته‌یی ایله اهواز عرب‌لری مسئله‌سی‌نین یازیچی‌لار بیرلیگینده اورتایا قویدوغونو یازیب.
تانینمیش بیر نئچه کورد فعال دا رضا براهنی‌نین اؤلومونه تاسوفلنه‌رک اونون آدینی حؤرمتله یاد ائدیبلر. گونئی آذربایجانلی‌لار آراسیندا ایسه رضا براهنی حؤرمت و میننتله یاد ائدیلیب. لاکین فارس‌لارین آراسیندا بو هئچ ده بئله اولماییب.
“منوتو” تلویزیون کانالینین تئله‌آپاریجیسی رضا براهنینی خایین حساب ائدیب و اونون اؤلومونه سئویندیگینی یازیب.
بعضی‌لری ایسه اونون 1357 اینقیلابینی دستکله‌مه‌سینی خیانت حساب ائده‌‌رک رضا براهنینی ایسلام رئژیمی‌نین عضوو حساب ائدیبلر.
رضا براهنی پهلوی‌لر دؤورونده محبوس حیاتی یاشادیقدان سونرا آمئریکا بیرلشمیش دؤولت‌لرینه گئدیر و اورادا محبوس‌لارین وضعیت‌لرینین نه قدر پیس اولدوغو حاقدا مقاله‌لر یازیب. اونون بو امه‌یینین نتیجه‌سینده پهلوی رئژیمی‌نین وحشیلیک‌لری دونیا سوییه‌سینده ایشیقلاندیریلیب. بو ایسه سلطنت طرفدارلارینین نیفرتینه سبب اولوب. اونلارین براهنی حاقیندا تربییه‌سیز پایلاشیملاری بورادا درج ائدیلمه‌یه اویغون دئییل. لاکین قئید ائتمک لازیمدیر کی بو کیمی ادبسیز پایلاشیملار اولدوقجا چوخ اولوب. سؤینلر اونو پانتورک، سئپاراتچی و روس آگئنتی حساب ائده‌‌رک اونو تحقیر ائدیبلر. بو پایلاشیملارا ایسه اساساً آذربایجانی‌لار اعتراض ائدیبلر.
چوخ آز سایدا فارس رضا براهنی حاقیندا موثبت فیکیر یازیب. آمئریکا سسی فارسجا تلویزیونونون تئله‌آپاریجیسی مهدی فلاحتی براهنی‌نین پیسله‌نمه‌سی‌نین سببینی اونون اؤز آنا دیلینی مودافعه ائتمه‌سی اولدوغونو یازیب.
بیر باشقا شخص ایسه اونون تنقیدچی‌لرینین ساوادسیز اولدوغونو و ادبی تنقیدین آکادئمی‌لره داشیمانین نه درجه‌ده اؤنملی ایش اولدوغونو بیلمه‌دیکلرینی یازیب.
دئمک اولار کی، بوتون آذربایجانلی فعال‌لار اونو حؤرمت و احتیراملا یاد ائدیب، خاطیره‌سینی عزیزله‌ییبلر.
ارسلان براهنی اینستاگرام حسابیندا بیر قروپ آزربایجانلی‌نین براهنی خاطیره‌سینه ارک قالاسینین یانیندا شام یاندیردیقلارینین فوتوسونو پایلاشیب. ارک قالاسینا توپلاشانلار ارکدن اوزاقلاشدیریلسالار دا، اونون دیوارلاری‌نین آرخاسیندا توپلاشاراق براهنی‌نین شکیل‌لرینی قویوب، خاطیره‌سینه شام یادیریبلار.
براهنی‌نین مزاری تبریزه گتیریله‌جک‌می؟
رضا براهنی‌نین اؤلوموندن سونرا هر ایکی اوغلو (اوکتای و ارسلان) اونون جنازه‌سینی ایرانا گتیرمک اوچون چالیشدیقلارینی قئید ائدیبلر. آذربایجانلی فعال‌لار دا، اونون تبریزده دفن ائدیلمه‌سینی دستکله‌ییرلر.
بعضی آذربایجانلی‌لار اونون شهریارین دا دفن ائدیلدیگی شاعیرلر مقبره‌سینده دفن ائدیلمه‌سینی ایسته‌ییبلر.
