گونئیلی رئژیسسور رضا صیامی «کورکوت آتا» تورک دونیاسی فیلم فئستیوالینین سندلی فیلم بؤلومونده ژوری هیئتی (داورلیک کومیته‌سینه عضو) سئچیلیب. «کورکوت آتا» تورک دونیاسی فیلم فئستیوالی دونیا تورک‌لرینین بیرلیگینی سیموولیزه ائدن «دده قورقود»-ون خاطره‌سینه یارادیلمیش فئستیوال‌دیر. ایسماعیل قاسپیرالی‌نین «دیلده، فیکیرده و ایشده بیرلیک» شعارینه اویغون قورولموش بو فئستیوالدا تورکجه‌نین فرقلی لهجه‌لرینده چکیلمیش فیلم‌لر مسابقه‌ده ایشتراک ائده‌جکدیر.
رضا صیامی (1344، ماراغا) 1370-جی ایلده فیلم ساحه‌سینده تحصیلینی بیتیردیکدن سونرا حرفه‌ای فعالیته باشلاییر. او ایکی ایل اردبیل گنج‌لر سینما انجمنی مودیری اولدوغو دؤورده بوردا سینما درس‌لری تدریس ائدیب. زنجان بؤلگه‌سینده، اردبیل ایالتینده باش توتموش فیلم فئستیوال‌لاریندا داور کیمی، تبریز وحدت فیلم فئستیوالینده ایسه سئچیم شوراسیندا ایشتیراک ائتمیشدیر. فیلم ساحه‌سینده بیر چوخ فیلمه رئژیسسورلوق و پرودوسئرلیک(تهیه‌کننده) ائتمیش رضا صیامی، اؤلکه سوییه‌سینده اؤنملی موکافات‌لارا لاییق گؤرولوب. ۲۰ ایللیک رئژیسسورلوق و پرودوسئرلیک فعلیتیندن سونرا تورکیه‌ده اؤز فیلم شرکتینی قورموش، ایرانین و تورکیه‌نین فیلم و سریال محصول‌لارینین قارشیلیقلی شکیلده یاییمینی تشکیل ائتمیشدیر. «ووصال گون‌لری»، «ائل و یول»، «سون کؤچ»، «گیزلی آتش» و «شیخ شامیل» کیمی اثرلرین مؤلفی اولان رضا صیامی آذربایجان رئسپوبلیکاسی، تورکیه و ایران‌دا موختلیف تلویزیون کانال‌لارلا امکداشلیق ائتمیشدیر.
