اورهان، آیدین، آیاز، اوکتای، ارسلان و اونلارجا بئله آدلار ایچنیده اوزورم، نییه بو آدلار؟ اؤلولر فریادیندان، نیمایا، اورهان اسماعیله دیغیرلانان بیر سلوک ایچینده‌یم. گویا بیریسی بیر یاندان دئییر، آی قارداش بو، بو وارها، ائله بو، خمینی‌یه مکتوب یازیب… دیگر آدام فریاد ائدیر و دئیر یوخ-یوخ دورون، بو آدام تجزیه‌چی‌دیر، پان تورکدور باخ. او طرفدن بیر خانیم باغیریر کی، اصلا و ابدا بو براهنی بیر پان-ایرانیستدیر. باخین یازیبلار کی، توجه ائدین یازیبلار کی، بو شخص دئییب من ایرانین تمامیت ارضی‌سیندن دفاع ائدیرم…. باشیم پارتلاییر، اللریمی قویورام او زامانکی آذربایجان قلم انجمنی ایمئیلینین اوزرینه، او زامان کی، یازیق براهنی‌نی اورایا گتیرمیشلر بیر عیدده اوندان مشروعیت آلسین و سونرا بیزی قاپیدان چؤله آتدیلار. هئچ بیر کتابی اولمایان آداملار اوردا توپلانیب براهنی‌نی بیر عثمان کؤینگی کیمی بیزلره کفن بیچدیریردیلر، آمما یئنه ده اونا کوسه بیلمدیک…
بلی بیزلر، اونون کتابلاری ایچینده بؤیودوک، اورهان، آیدین اولدوق اما اونا قیریلمادیق، اونا باخدیق و دینله‌دیک، اونا کوسه بیلمه‌دیک، آنجاق اونو هر گون بیر یانا چکنلر، هر گون اونون علمینی بیر بادیه‌یه قورانلار، اونو داشلادیلار.
ساققاللی‌لار، شاهچی‌لار، اسکی سولچولار، رادیکال ناسیونالیست‌لر، تمامیت‌طلب‌لر، تجزیه‌طلب‌لر، خمینی‌چی‌لر، کمونیستلر، موللالار، قشه‌لر، سن جورج کلیسه‌سی منصوبلاری، حسن‌قولو قارداشلاری، نرگیز خانیم و قونشولاری، بوتون ولیعصر کوچه‌لرینده‌کی قیسا شالوار قیزلار، هامی، هامی، هامی…
آمما بیز تاریخین ان دویغوسال انسانلاری، اونو نئجه سیله بیلردیک کی!؟ محمد عربجه یازدیغی اوچون، عیسی ناصری اولدوغو اوچون، نرودا اسپانیولجا، تاگور هیندجه، تولستوی روسجا یازدیغی اوچون اونلارا قیریلمادیق، اونلارا امپاتی دویدوق.
براهنی یازدیغی دئییل، یازمادیقلاری ایله یارقیلاندی. یاشادیغی اوچون دئییل، اؤلدویو اوچون جزالانیر. او زامانکی منیم آتام «با نوای کربلا» دینله‌ییردی، او آیدین‌دان یازیردی. او زامانکی من مکتبده «ائی ایران» اوخویوردوم، او، ائله بو رضا، آیازین سس‌تئللرینی تمیزله‌ییردی.
بو رضا، او رضا ایله هئچ فرقی یوخ. اورهان همان اورهان، ائله آیدین، او آنکارادا اولان آیدین و آیدین‌دیر. آیاز آلمانییادا، اوکتای و ارسلان هله آنادان اولماییبلار، دوغولورلار بوتون شعیرلرده.
بیز، اونو یارقیلاییریق، بابالاریمیزین ترسی. اونلار دئیردیلر «تانری یارقیلاسین»، قولا نه گرک وار، براهنی‌نی دیلینه گؤره متهم اولدوغونا گؤره، او مکتوبا گؤره، او سرزنش‌لره گؤره، او کتابا، او ساققالا، او بؤرکه گؤره. آمما منجه او دا بونو ایستردی، یارقیلانماسینی، چیخیب کورسویه جواب وئرمه‌سینی، تبریزی داها آرتیق سئومه‌یی اعتراف ائتمه‌یی. بیز ده بری ژوری کیمی ساده‌جه آغلایا بیلردیک. محمود درویشی ادوارد سعیده یازدیغی کونتئرپوآن کیمی. ساده‌جه اونو بیر دفعه شکیله چکه بیلدیک. بو قالین دووارا داش آتماسی کیمی. بیر یهودی ایله ائولنمه‌سی فلسطینی‌لره ناراحات ائتمه‌دی. ساده‌جه بیر کلمه یازدی: «سجل انا براهنی»
براهنی محمود درویش و ادوارد سعید آراسیندا قالدی. نقد ائده‌جک بیری قالمادی. اؤزونون نقد اولونماسینی ایسته‌دی، آنجاق بوتون نقادلار جلالا دؤنموشلر، بوتون مداحلار آل احمده….
قصورو دا اولسا، سهوی ده اولسا، دردی ده اولسا، خوشموزا گلمه‌سه ده، بوراخدیغی ایز چوخ دریندیر. او قدر درین کی، ارسلانین هر پایلاشدیغی تصویرده اؤزومو گؤرورم. او دا ان بؤیوک درددیر، تبریزسیزلیک. منجه بو اونا یئتر. بو درددن آغیری یوخدور. اومورام تبریزده قویلانار. راستا کوچه‌یه یاخین، شهنازه چنبر، شهرین چپرلری بیتمه‌دیگی یئرده، حسن آغانین یانیند. بگ چالار، او اوخویار، اسماعیل… یاواش اول، امیره قیزدا باش کسیرلر…
