گونئی آذربایجاندا چکیلمیش فیلملر حاقیندا پایلاشدیغیمیز سون یازیدان سونرا گونئیلی سویداش‌لاریمیز قوزئی آذربایجاندا چکیلمیش فیلملر حاقیندا دا یازی یازماغیمیزی ایسته‌دیلر. بو یازیدا سون ایللر موستقیل قوزئی آذربایجاندا چکیلمیش و بعضی خصوصیت‌لرینه گؤره موثبت فرقلنمیش فیلم‌لری توپلامیشیق. اومیدواریق کی بو فیلملر سیزین خوشونوزا گله‌جک و سیز ده اؤز نؤوبه‌نیزده چکیلمیش بو فیلم‌لری دیگر سویداش‌لاریمیزلا بؤلوشوب، فیلم حاقیندا فیکیرلرینیزی ده سوسیال شبکه‌لرده یازاجاقسینیز.
چؤلچو فیلمی (۲۰۱۲)
رئژیسسورو شامیل علی‌یئو اولان چؤلچو فیلمی ۲۰۱۲-جی ایلده “آزربایجان‌فیلم” کینواستودییاسی طرفیندن ائکرانلاشدیریلیب. سسئناری مؤلفی ویدادی حسنوودور. رول‌لاردا ویدادی حسنوو، بهروز واقیف‌اوغلو، جاویدان محمدوو و باشقالاری چکیلیب. فیلمده‌کی بوتون حادثه‌لر چؤلده باش وئریر. بورادا یاشایان یاشلی کیشی و گنج اوغلان ساخلادیقلاری دوه‌لرین یونونو ساتاراق یاشاییرلار. یاشلی کیشی‌نین اؤلوموندن سونرا تک قالان گنج بیر گون گؤزل بیر قیزلا راستلاشیر و بونونلا دا هر شئی دییشیر. حیاتیندان حظ آلماغا باشلایان گنج آتا اولماغا حاضیرلاشیر. لاکین او سونرادان اؤیره‌نیر کی سئودیگی قادین اصلینده باشقاسیندان حامیله‌دیر. بوندان سونرا او ایکی سئچیم آراسیندا قالیر. بو حقیقتی قبول ائتسین، یا یوخ؟!
فیلم ۲۰۱۴-جو ایلده “خاریجی دیلده ان یاخشی فیلمه گؤره” نومیناسییاسیندا «اوسکار» موکافاتینا تقدیم اولونوب. سونراکی ایل‌لرده بئش قاره‌نی احاطه ائد‌ن ۷۳ بین‌الخالق فیلم فئستیوالیندا ایشتیراک ائد‌ه‌رک ۴۰-دان آرتیق موختلیف موکافات‌لارا لاییق گؤرولوب.
فیلمی ایزله‌مک اوچون لینک:
https://www.youtube.com/watch?v=6khTU0NpCaM
نار باغی (۲۰۱۷)
۲۰۱۷-جی ایلده چکیلمیش «نار باغی» فیلمی «آزربایجان‌فیلم» کینوستودییاسی و «بوتا فیلم» کینو شیرکتی‌نین بیرگه ایستحصالیدیر. فیلمین سسئناری مؤلف‌لری آصیف روستموو، ایلقار نجف، رولوف جان مینه‌بو، قورولوشچو رئژیسسورو ایلقار نجف، بستکاری فیرودین آللاهوئردی‌دیر. باش رول‌لاری قوربان ایسماعیلوو، ایلاهه حسنووا، صمیمی فرهاد، حسن آغایئو و دیگرلری جانلاندیریرلار.
بؤلگه‌لرین بیرینده یاشایان شامیلین ایری نار باغی وار، اونو کندین وارلی آدام‌لاریندان بیری آلماق ایسته‌سه ده او، اؤز تورپاغینی ساتمیر. شامیلین اوغلو قابیل عایله قورسا دا، سونرا هئچ کسه نسه دئمه‌دن عایله‌سینی ده آتاسی‌نین یانیندا قویاراق روسیه‌یه گئدیب. شامیل گلینی سارا و نوه‌سی جلاللا بیرلیکده یاشاییر. گون‌لرین بیرینده گؤزلنیلمه‌دن اوغول قاییدیر. او، آتاسینا عایله‌سینی روسیه‌یه آپاراجاغینی دئیه‌رک، نار باغینی ساتدیریر و پولو دا گؤتوره‌رک عایله‌سیندن گیزلین تک روسیه‌یه قاچیر. چونکی اونون روسیه‌ده باشقا عایله‌سی وار و بورجو اولدوغونا گؤره اونون روسیه‌ده‌کی قیزی گیروو گؤتورولوب. بو پوللا ایسه او، اؤز قیزینی خلاص ائتمه‌یه چالیشیر.
فیلم ۲۰۱۸-جی ایلده “خاریجی دیلده ان یاخشی فیلمه گؤره” «اوسکار» موکافاتینا تقدیم اولونوب. «نار باغی» فیلمی بیر نئچه خاریجی فیلم فئستیوال‌لاریندا ایشتیراک ائدیب موختلیف نومیناسییالاردا غالیب اولوب.
فیلمی ایزله‌مک اوچون لینک:
https://kinoo.az/487-nar-bagi-pomegranate-orchard.html
دولو (۲۰۱۲)
دولو فیلمی ۲۰۱۲-جی ایلده عاقیل عباسین عینی‌آدلی رومانی اساسیندا چکیلیب. فیلمین رئژیسسورو ائلخان جفروو، بستکاری پولاد بولبول‌اوغلودور. فیلمده قاراباغدا گئدن موحاریبه تصویر ائدیلیب. رومانین مؤلفی‌نین سؤزلرینه گؤره اثرده‌کی پئرسوناژلار رئال اینسان‌لاردیر. فیلمده او دؤورده اؤلکه‌ده‌کی هرج-مرجلیک، وطن اوغروندا دؤیوشن کؤنوللولرین غیر برابر دؤیوش‌لرده گؤستردیکلری فداکارلیق‌لار گؤستریلیب. فیلم موختلیف فئستیوال‌لاردا موکافات‌لارا لاییق گؤرولوب.
فیلمی ایزله‌مک اوچون لینک:
https://www.youtube.com/watch?v=0DNAsucfsFc
میراث (۲۰۱۸)
«میراث» بدیعی-سندلی فیلمی ۲۰۱۸-جی ایلده «باکی مدیا مرکزی» طرفیندن چکیلیب. فیلمین رئژیسسورو و سسئناری مؤلفی زاور قاسیملی‌دیر. فیلمده نوبل قارداش‌لارینین آذربایجانداکی فعالیتی، اونلارین بورادا دونیادا ایلک نفت‌دولدورما تانکری و نفت محصول‌لارینین ساخلانیلماسی اوچون دمیر چن‌لری یاراتماقلاری، آوروپادا ایلک نفت بورو کمری‌نین محض باکیدا ایستیفاده‌یه وئرمکلری و شیرکتین نفت صنایعسینده تطبیق ائتدیگی بو کیمی بیر سیرا دیگر یئنیلیک‌لردن بحث اولونور. فیلمده نوبل‌لر عایله‌سی‌نین عضولری پیتر نوبل (روبرت نوبلین نتیجه‌سی)، توماس تیدن (لودویق نوبلین نتیجه‌سی، پروفسور) و تانینمیش ائکسپئرت‌لر ویلیام برایس ( آمئریکا بیرلشمیش دؤولت‌لری نفت تاریخچیسی) و بریتا آسبرینکدن (ایسوئچ یازیچیسی، ژورنالیست) آلینمیش موصاحیبه‌لر ده اؤز یئرینی آلیب.
فیلمی ایزله‌مک اوچون لینک:
https://daytube.az/videos/98258/
عزیزیم فلینی (۲۰۱۰)
رئژیسسورو و سسئناری مؤلفی جاوید توکول اولان «عزیزیم فئللینی» فیلمی ۲۰۱۰-جو ایلده «جارچی فیلم» ایستودییاسیندا چکیلیب. فیلم رئژیسسور اولماق اوچون کنددن پایتاختا گلن ادبیات معلمی راسیمین باشینا گلن حادیثه‌لر اوزه‌رینده قورولوب. شهرده‌کی کافه‌لردن بیرینده او لیلا آدلی گؤزل قادینلا تانیش اولور و اونا وورولور. لیلا راسیمین رئژیسسورلوق هوسینه گؤره اونو ایتالیان کینورئژیسسورو فدریکو فلینی‌نین شرفینه فلینی دئیه چاغیریر. اما لیلا وارلی بیر ایش آدامی اولان جامالین معشوقه‌سیدیر و راسیمله موناسیبت‌لرینی اوندان گیزلتمک مومکون اولمور. لیلا راسیمی سئویر، عینیله راسیم ده لیلانی، اما جامال بو موناسیبتین علیهینه‌دیر.
فیلمی ایزله‌مک اوچون لینک:
https://www.youtube.com/watch?v=3OZEYd1zq7M
هدف باکی‌دیر! (۲۰۱۵)
«هدف باکی‌دیر. هیتلر نفت اوغروندا دؤیوشو نئجه اودوزدو» فیلمی ۲۰۱۵-جی ایلده فاشیزم اوزه‌رینده غلبه‌نین ۷۰ ایللیک یوبیلئیی‌نین شرفینه چکیلیب. فیلمین چکیلیشلری «باکی مدیا مرکزی» و فرانسه‌نین سندلی فیلم ایستحصالی ساحه‌سینده تانینمیش «کلارک کاستلو و کو» (CC&C) پروداکشن شیرکتی طرفیندن آپاریلیب. ایکینجی دونیا موحاریبه‌سینه حصر ائدیلمیش بو فیلمده اساس دقت باکی نفتی‌نین موحاریبه‌ده‌کی رولونا چکیلیر. غلبه‌نین تامین ائدیلمه‌سینده حل‌ائدیجی رول اوینامیش تانک و طیاره‌لرین اکثریتی باکی نفتچی‌لری‌نین گؤندردیگی یاناجاقلا حرکته گتیریلیردی. تصادفی دئییل کی، باکی و اونون قارا قیزیلی هیتلرین اله کئچیرمک ایسته‌دیگی ان قیمتلی ثروت ایدی. فیلمده بوگونه‌دک نوماییش ائتدیریلمه‌ین کینوکادرلار رئستاوراسییا(برپا، یئنیدن قورما) اولوناراق رنگلی فورماتدا تقدیم ائدیلیر.
بو سندلی اکران اثری آذربایجان دیلی ایله یاناشی روس، انگلیس، فرانسیز، آلمان، ایتالیان و دیگر دیل‌لره ده ترجومه اولونوب. فیلم ۲۰۱۵-جی ایلده «نشنال جئوگرافیک» کانالی واسطه‌سی موختلیف اؤلکه‌لرده گؤستریلیب.
فیلمی ایزله‌مک اوچون لینک:
https://www.youtube.com/watch?v=62P7RB3c7JQ
یاریمچیق خاطیره‌لر (۲۰۱۵)
2015-جی ایلده «آزربایجان‌فیلم» کینوستودییاسی طرفیندن چکیلمیش فیلمین رئژیسسورو ائلخان جفروودور. فیلمده ۲-جی دونیا موحاریبه‌سینده برست قالاسینی مدافعه ائتمیش و موحاریبه‌ده ایشتیراک ائتمیش آذر آدلی پئرسوناژ ۵۰ ایلدن سونرا دوغما قاراباغی ارمنی ایشغالچی‌لاریندان مدافعه ائتمه‌یه چالیشیر. فیلمین قهرمانی ایکی موحاریبه‌نین ایشتیراکچیسی‌دیر. فیلمده‌کی حادیثه‌لر قاراباغ موحاریبه‌سینه روس ظابطی‌نین گؤزو ایله باخیشی عکس ائتدیریر.
فیلمی ایزله‌مک اوچون لینک:
https://www.youtube.com/watch?v=8gw06wOl9AE
بیر گونش آلتیندا (۲۰۱۶)
«باکی مدیا مرکزی» طرفیندن ۲۰۱۶-جی ایلده چکیلمیش سندلی فیلم آذربایجاندا یاشایان، موختلیف مدنیت، عادت-عنعنه، فرقلی دیل و دینی اعتیقادا صاحیب اولان آزسایلی خالق‌لارین و ائتنیک قروپ‌لارین حیاتیندان بحث ائدیر. چکیلیش هئیتی بیر ایله یاخین مدتده آذربایجانین موختلیف بؤلگه‌لرینده اولوب، ۵۴ کند و قصبه‌یه ائکسپئدیسییالار(سفرلر) تشکیل ائدیلیب. ائکسپئریمئنت(آزمایش) کاراکتئری داشییان بو سفرلر زامانی ۱۷ ائتنیک قروپون ۱۳۴ نماینده‌سی‌نین موصاحیبه‌سی لئنته آلینیب. چکیلیش اوچون هر ائتنیک قروپون اونلارلا نماینده‌سیندن بیری سئچیلیب. فیلمده موختلیف دینی اعتیقادلارین تمثیلچی‌لری اؤز دینی آیین‌لرینی ایجرا ائدیر، ۱۷ ائتنیک قروپون مدنیتی‌نین و عادت-عنعنه‌سی‌نین ایزلری گؤرونور. فیلمین قهرمان‌لاری ۱۷ دیلده – هر کس اؤز آنا دیلینده – دانیشیر.
فیلمی ایزله‌مک اوچون لینک:
https://www.youtube.com/watch?v=xJwkF81ylIE
پرده تریلوگییاسی (۲۰۱۶، ۲۰۱۷، ۲۰۱۹)
رئژیسسور امیل قولیئوین سوسیال درام تریللوگییاسی. ایلک ایکی فیلمده مؤلف منتال، معیشت، عایله پروبلئم‌لرینی معنوی-اخلاقی دَیَرلر موستویسینده گؤستریر. تریلوگییانین سون حیصه‌سینده ایسه معنوی دیرلر عایله سرحدلریندن چیخاراق سوسیال، طبقه‌لرآراسی موناسیبت‌لر موستویسینه پرویئکسییا(پیش‌بینی) اولونور.
ایلک فیلمده آتا مصلحتی، ائل عادت-عنعنه‌سی ایله ائولنه‌رک سونرادان بدبخت اولان زاور، حال-حاضیردا سئچیم قارشیسیندادیر. او، اؤز باجیسی لاله‌نین سئودیگی اوغلان ائمینله خوشبخت اولماسینی ایسته‌ییر. بونون اوچون زاور، باجیسی‌نین قاچیریلماسینا ایجازه وئرمه‌لیدیر. جمعیتین، دوست‌لارین، قونشولارین بو ایشه موناسیبتی نئجه اولاجاق کیمی فیکیرلر زاورو چیخیلماز وضعیتده قویور. اونون سئچیمیندن بیر عایله‌نین طالعی آسیلیدیر. گؤره‌سن او، نه‌یی سئچه‌جک؟!
فیلمی ایزله‌مک اوچون لینک:
https://www.youtube.com/watch?v=7yQs4O_HlQc
«ایکینجی پرده» فیلمینده حادیثه‌لر باکی محله‌لریندن بیرینده باش وئریر. بو محله‌لرده هامی یازیلمامیش مئنتالیتت قانون‌لاری ایله یاشاییر. بئله محله‌لردن بیرینده تیما آدلی پئرسوناژین حیات یولداشی اونا عاریف آدلی بیری ایله خیانت ائدیر. ایبیش آدلی دیگر پئرسوناژ ایسه بونو تیمایا خبر وئریر. حادیثه‌لر بوندان سونرا جریان ائتمه‌یه باشلاییر.
فیلمی ایزله‌مک اوچون لینک:
https://www.youtube.com/watch?v=ihgdTu5Ltc8
«سون پرده» فیلمینده ایش آدامی نریمان باکی‌نین کنار محله‌لریندن بیرینین هئیتینده نسه تیکمک ایسته‌ییر. لاکین ساکین‌لردن بیری فرمان بونا ایمکان وئرمیر، اونو فیریلداقچی حساب ائدیر. طرف‌لر آراسیندا باش وئرن موناقیشه ایسه فاجعه ایله نتیجه‌له‌نیر…
فیلمی ایزله‌مک اوچون لینک:
https://www.youtube.com/watch?v=ONTJWGpevXA
سون ایجلاس (۲۰۱۸)
«سون ایجلاس» بدیعی-سندلی فیلمی آذربایجان خالق جمهوریتی‌نین قورولماسی‌نین ۱۰۰ ایللیگی موناسیبتیله ۲۰۱۸-جی ایلده «باکی مدیا مرکزی» طرفیندن چکیلیب. فیلمده آذربایجان خالق جمهوریتی‌نین سون گون‌لرینده باش وئرن حادیثه‌لر تصویر ائدیلیب. بورادا جمهوریت قوروجولاری‌نین موستقیللیگیمیزین دوشمن‌لرینه قارشی سون آنادک آپاردیقلاری غیر برابر و اومیدسیز، لاکین دؤنمز و قطعیتلی موباریزه عکس اولونور.
فیلمی ایزله‌مک اوچون لینک:
https://www.youtube.com/watch?v=RFXZfZkgU6k
