لیندا ناپیکوسکی‌نین یازدیغی بو مقاله ۲۰۱۹-جو ایلین آپرئل آیی‌نین ۱۰-دا، ToughtCoسایتیندا درج ائدیلیب و «اتک‌یازی» ترجومه قوروپو اونو آذربایجان تورکجه‌سینه ترجومه ائدیب.
سوسیالیست فئمینیزم نه ایله فرقله‌نیر؟
قادین‌لارین ازیلمه‌سینی جمعیتده‌کی باشقا باسقی‌لارلا علاقه‌لندیرن سوسیالیست فئمینیزم، ۱۹۷۰-جی ایل‌لرده آکادئمیک فئمینیست دوشونجه‌ده کریستاللاشان فئمینیست نظریه‌ده گئتدیکجه داها چوخ اهمیت کسب ائتدی. سوسیالیست فئمینیزمی دیگر فئمینیزم نؤع‌لریندن فرقی نه ایدی؟
سوسیالیست فئمینیزم و مدنی فئمینیزم
سوسیالیست فئمینیزمی تئز-تئز قادین‌لارین اونیکال طبیعتینه دقت یئتیرن و قادینی تصدیق ائد‌ن بیر مدنیته احتیاجی وورغولایان مدنی فئمینیزمله ضیددیت تشکیل ائدیردی. مدنی فئمینیزم اؤزچو (ذات‌گرا) حساب اولونوردو: او، قادین‌لارین قادین جینسینه خاص طبیعتی‌نین وارلیغینی قبول ائدیردی. مدنی فئمینیست‌لر بعضا قادین موسیقیسینی، قادین صنعتینی و قادین آراشدیرمالارینی اساس آنا مدنیتدن آیری توتماغا چالیشدیقلاری اوچون سئپاراتچی اولماقلا تنقید ائدیلیردیلر.
سوسیالیست فئمینیزم نظرییه‌سی ایسه فئمینیزمی جمعیتین قالان حیصه‌سیندن آییرماقدان چکینمه‌یه چالیشیردی. ۱۹۷۰-جی ایل‌لرده‌کی سوسیالیست فئمینیست‌لر، قادین ظولمونه قارشی موباریزه‌لرینی عیرق، صینیف و یا اقتصادی ایستاتوسا گؤره دیگر عدالتسیزلیک‌لره قارشی موباریزه ایله بیرلشدیرمه‌یه اوستونلوک وئردیلر. سوسیالیست فئمینیست‌لر کیشیلر و قادینلار آراسینداکی برابرسیزلیگی دوزلتمک اوچون کیشی‌لرله ایشله‌مک ایسته‌ییردیلر.
سوسیالیست فئمینیزم و لیبئرال فئمینیزم
سوسیالیست فئمینیزم، میللی قادینلار تشکیلاتی (National Organization for Women (NOW)) کیمی لیبئرال فئمینیزمدن ده فرقله‌نیردی. «لیبئرال» آنلاییشی ایل‌لر کئچدیکجه دییشدی، لاکین قادین آزادلیق حرکاتینین لیبئرال فئمینیزمی حکومت، حقوق و تحصیل ده داخیل اولماقلا جمعیتین بوتون قوروم‌لاریندا قادینلار اوچون برابرلیک ایسته‌دی. سوسیالیست فئمینیست‌لر، قورولوشو کؤکوندن قوصورلو اولان و برابرسیزلیک اوزَرینده قورولموش جمعیتده حقیقی برابرلیگین مومکون اولماسی فیکرینی تنقید ائدیردیلر. بو تنقید، رادیکال فئمینیست‌لرین فئمینیست نظرییه‌سینه بنزَییردی.
سوسیالیست فئمینیزم و رادیکال فئمینیزم
بونونلا برابر، سوسیالیست فئمینیزم رادیکال فئمینیزمدن ده فرقله‌نیردی، چونکی سوسیالیست فئمینیست‌لر قادین‌لارین اوزلشدیگی جینسی آیری‌سئچکیلیگین بوتون ظولم‌لرینین منبعی اولدوغو رادیکال فئمینیست آنلاییشینی رد ائدیردیلر. رادیکال فئمینیست‌لر، تعریفه گؤره هر شئیی کؤکوندن دییشدیرمک اوچون جمعیتده‌کی ظولمون کؤکونه ائنمه‌یه چالیشیردیلار. کیشی‌لرین اوستونلوک تشکیل ائتدیگی پاتریارخال(آتاارکیل) جمعیتده، اونلار بو کؤکو قادین‌لارین ازیلمه‌سی کیمی گؤروردولر. سوسیالیست فئمینیست‌لر ایسه جینسه اساسلانان ظولمو داها چوخ موباریزه‌نین بیر پارچاسی کیمی تصویر ائدیردیلر.
سوسیالیست فئمینیزم و سوسیالیزم و یا مارکسیزم
سوسیالیست فئمینیست‌لرین مارکسیزمه و عنعنوی سوسیالیزمه قارشی تنقیدی اوندان عبارتدیر کی، مارکسیزم و سوسیالیزم اساساً قادین برابرسیزلیگینی تصادوفی و یا ایقتیصادی برابرسیزلیک و صینیف سیستئمی طرفیندن یارادیلان بیر شئیه ائندیریر. قادین‌لارین ازیلمه‌سی کاپیتالیزمین اینکیشافیندان اوّل ده وار اولدوغو اوچون سوسیالیست فئمینیست‌لر قادین‌لارا ظولمون صینیف بؤلگوسو ایله برابر یارادیلا بیلمه‌یه‌جه‌یینی ادعا ائدیرلر. سوسیالیست فئمینیست‌لر هم ده ادعا ائدیرلر کی، قادین‌لارا ائدیلن ظولمو اورتادان قالدیرمادان کاپیتالیست هیرارشیک سیستئم داغیدیلمایاجاق. سوسیالیزم و مارکسیزم ایلک نؤوبه‌ده ایجتیماعی ساحه‌ده، خصوصاً ده حیاتین ایقتیصادی ساحه‌سینده آزادلیقلا علاقه‌داردیر و سوسیالیست فئمینیزم آزادلیغین مارکسیزم و سوسیالیز‌ده همیشه مؤوجود اولمایان پسیخولوژی و شخصی بیر اؤلچوسونو قبول ائدیر. بو دا مارکسیزم و سوسیالیزمده همیشه مؤوجود دئییلدیر. مثلاً، سیمون دوبوار قادین‌لارین آزادلیغی‌نین ایلک نؤوبه‌ده ایقتیصادی برابرلیک یولو ایله اولاجاغینی مودافیعه ائدیردی.
