مهرین 12-ده ایران ایسلام شوراسی مجلیسی‌نین بیر قروپ عضوو صنایع، معدن و تجارت ناظرینه، میللی مس شیرکتینین تراختور کلوبونو دستکله‌مه‌سی اوچون شرایط یاراتماسی حاقدا بیر مکتوب ایمضالادیلار. تبریز نماینده‌سی احمد علیرضابیگی طرفیندن حاضرلانان و بعضی شهرلرین نماینده‌لری طرفیندن ایمضالانان بو مکتوبدا بئله یازیلیب:
«قید ائتمک واجیب‌دیر کی، ایران میللی مس شیرکتی رفسنجان، کرمان و شهر بابک کیمی شهرلرده سوسیال مسولیت‌لرینی یئرینه یئتیرسه‌لر ده بو گونه قدر، آسییانین ان پوپولیار کومانداسی کیمی تانینان تراختور کومانداسینا هئچ بیر یاردیم ائتمه‌ییب. بیز آذربایجان نماینده‌لری، تراختور کلوبونون لیاقتینه اویغون اسپانسرلیک موقاویله‌سینه اوخشار مالییه دسته‌یی گؤزله‌ییریک.» بو مکتوبدان اون گون سونرا دا، کلیبرین پارلامئنتده‌کی نماینده‌سی حسین حاتمی اؤز چیخیشیندا قید ائتدی کی، «بو کوماندا آذربایجانلی‌لارین و ایران خالقینین اکثریتینین سوسیال سرمایه‌سی‌دیر و آذربایجان معدن‌لرینین زنگین منبع‌لریندن تراختورا دستک وئریلمه‌سه، ایدمان ناظری و صنایع، معدن و تجارت ناظری سورغویا معروض قالاجاق.»
ایران ایسلام شوراسی مجلیسی‌نین بیر قروپ عضوونون صنایع، معدن و تجارت ناظرینه، میللی مس شیرکتینین تراختور کلوبونو دستکله‌مه‌سی اوچون شرایط یاراتماسی حاقدا مکتوبو.
ایرانین میللی مس شیرکتینین گلیرلرینین چوخو رفسنجان‌داکی سرچشمه مس معدنی و ورزقان‌داکی سونگون مس معدنیندن گلیر. کرمان ایالتی بو فورصتدن ایستیفاده ائدهرک، اقتصادی وضعیتینین اینکیشافی و یاخشیلاشدیریلماسی اوچون یاخشی آددیم‌لار آتیب. سرچشمه مس شهرینین ایمکان‌لاری، کرمان ایالتینده تیکیلمیش چوخ‌سایلی مدنیت، اینجه‌صنعت اوبیئکت‌لری، ایدمان قورغولاری و او ایالتده یارادیلمیش اوچ مشهور فوتبال کومانداسی (کرمان، رفسنجان و سرچشمه) بیزیم بو سؤزوموزو تصدیقله‌ییر. بونون عکسینه، ورزقان شهرینده و شرقی آذربایجان ایالتینده مس شیرکتینین سرمایه‌گذاری‌سی و تیکینتیسی یوخدور. گؤرولن بیر نئچه ایش ده کرمان ایله موقایسه اولونا بیلمز. عمومیتله سونگون مس کومپلئکسی، کاغیذ اوزه‌رینده آذربایجان مسی آدلاندیریلسا دا، ظاهری موستقیل‌لیگی اولسا دا، سونگون معدنی ایله باغلی اساس سیاست و قرارلار کرمانلی‌لار و تهران شیرکتی طرفیندن معین ائدیلیر.
سونگون مس معدنینده استحصال اولونان مس کنسانتره‌سی اریدیلمک اوچون کرمان-ا گؤنده‌ریلیر. بیر حالداکی معدن آذربایجان‌دا یئرله‌شیر و سونگون معدنیندن باشقا دا بو اراضی‌لرده بؤیوک مس یاتاق‌لارینین اولماغی احتیمال ائدیلیر. بس اوندا نه‌یه گؤره بورادا مس‌اریتمه کارخاناسی تیکیلمه‌سین؟ ورزقان‌دا مس‌اریتمه کارخاناسینین تیکیلمه‌یی آذربایجان‌دا ایش یئرلرینین آچیلماسینا و سون محصولون دا بورادا استحصالینا سبب اولاجاق. لاکین بو مؤوضودان آنجاق باجاریقسیز ایالت مأمورلاری ایستیفاده ائدیرلر. اونلار هر دفعه بورادا کارخانانین تیکیله‌جه‌یینه سؤز وئرسه‌لر ده هله بونو باجارماییبلار. مسئله‌نین واجیبلیگینه باخمایاراق مس‌اریتمه کارخاناسی تئزلیکله تیکیله‌جه‌یی تبلیغ آلتی کیمی باجاریقسیز ایالت مأمورلارینین مانور قونوسو اولموشدور.
تراختور کلوبونون مالی چتینلیک‌لری مجلس نماینده‌لرینین ده دقتینی سونگون مس معدنینه یؤنلتمه‌یینه سبب اولوب. ورزقان‌دا مس‌اریتمه کارخاناسینین تیکیلمه‌سینه جدی یاناشماق لازیم‌دیر. مس‌اریتمه کارخاناسینی هارادا یئرلشدیرمکله باغلی بعضی موباحیثه‌لر یارانیر. اگر اکولوژی‌نین بوندان منفی تأثیر آلاجاغینی دوشونوروکسه چوخ گوجلو فیلترلردن ایستیفاده ائتسک طبیعته زیان دیمز. ایشدیر تحریم‌لره گؤره او فیلترلری الده ائتمک مومکون اولماسا خوجا بؤلگه‌سینین شوران تورپاق‌لاریندا اکولوژیک پروبلئم یاراتمایاجاق بیر مس‌اریتمه کارخاناسی تیکمک مومکون‌دور.
سونگون مس معدنی
سونگون کلوبونا کرمان کوماندالارینا باخاندا داها آز مالییه آیریلاراق یارادیلماغینا باخمایاراق کرمانلی‌لار طرفیندن اعتراضلا قارشیلاندی. اونلار ایران مس شیرکتینین کرمان، رفسنجان و سرچشمه کوماندالارینی مالیلشدیردیگینی و باشقا کلوبون دا یارادیلماسینا احتیاج اولمادیغینی دئییردیلر. لاکین اونلارین هئچ بیری نییه ایران مس شیرکتینین آنجاق کرمان‌دان اولان ۳ کوماندایا مالییه دسته‌یی وئردیگینی گلیرده بؤیوک پایی اولان ورزقاندان ایسه بیر کوماندایا بئله دستک وئرمه‌مه‌لرینی آچیقلایا بیلمه‌دیلر. سونگون فوتبال کلوبو کرمان کوماندالارینا نظرن داها آز مالییه دسته‌یی ایله تامین ائدیلسه بئله بو کوماندا آسیادا بؤیوک اوغورلار قازاندی. ایندی ایسه تراختور کلوبونا دسته‌یین واجیب‌لیگی قاباردیلاندا ایران مس شیرکتی بونا منفی رئاکسییا وئریر. پارلامئنتین آذربایجانلی نماینده‌لری اؤز قوهوم و تانیش‌لارینی ایشه گؤتورمک، اونلاری هاراسا ایشه باشینا قویماق یئرینه بئله مؤوضولارلا مشغول اولسالار یاخشی اولار. اونلار ورزقان‌دا مس‌اریتمه کارخاناسینین تیکینتی‌سینی طلب ائتمه‌لی، بو یوللا دا هم آذربایجان‌داکی تالانین قارشیسینی آلمالی هم ده تراختورا دسته‌یی تامین ائدهرک بیر اوخلا ایکی نیشانی وورمالیدیرلار.
