تبریزین هاواسی گونلر ایدی کی حسساس قروپ‌لارا عایید اینسان‌لار اوچون دؤزولمز اولموشدو. بونا سبب ایسه تبریز ایستیلیک(حرارتی) الکتریک نیروگاهی‌نین مازوت یاندیرماسیدیر. نیروگاهین اساس یاناجاغی گاز اولسا دا میللی گاز شیرکتی‌نین نیروگاها گلن گازی کسمه‌سی اونلارین مازوتدان ایستیفاده ائتمه‌سینه سبب اولوب. بو ایسه هاوانین چیرکله‌نمه‌سی ایله نتیجه‌له‌نیر.
بئله بیر حادثه کئچن ایل ده باش وئریب. اوندا «بیتکوین» ایستحصالینا گؤره یارانمیش الکتریک چاتیشمازلیغی مازوتدان ایستیفاده‌یه سبب اولموشدو. بو ایسه هاوا چیرکلندیردیگی اوچون اینسان‌لارین دا ناراضیلیغینا یول آچیب.
۱۵ نویابردان اعتباراً مازوت یاندیران تبریز ایستیلیک الکتریک نیروگاهی هاوانی چیرکلندیرمه‌سینه ائله‌جه ده اینسان‌لارین ناراضیلیغینا باخمایاراق بونا داوام ائدیب. ان سون خبرلره گوره آذرین 4-ده تبریزین هاواسی بیر داها دوزوله بیله‌جک حالا گلیب.
وئریلن امر لغو ائدیلمه‌لیدیر
تبریز میللت وکیلی متفکر آزاد میللی گاز شیرکتی‌نین قرارینا اعتراض ائدیب. او بیلدیریب کی، وئریلن بو قرارا اساساً یالنیز ایکی نیروگاهین، تبریز و سهند نیروگاه‌لارینین گازی کسیلیب. گازی کسیلن هر ایکی نیروگاهین تبریز یاخینلیغیندا اولماسی ایسه بو قرارین غریبه اولدوغونو گؤستریر.
روح‌الله متفکر آزاد تبریز ایستیلیک نیروگاهی‌نین گازینین کسیلمه‌سینین گونده ۱ میلیون ۸۰۰ مین لیتر مازوتون یانماسینا سبب اولدوغونو بیلدیریب. بو ایسه هر گون ۳۵۰ تن کوکوردون آتموسفره آتیلماسی دئمکدیر. دئمه‌لی کئچن ۱۰ گون عرضینده تبریز نیروگاهی ۳ مین ۵۰۰ تن کوکوردو آتموسفره بوراخیب.
تبریز میللت وکیلی متفکر آزاد نفت ناظیرلیگیندن میللی گاز شیرکتی‌نین امرینی لغو ائتمه‌سینی ایسته‌ییب. او هم ده تبریز اهالیسین آز گاز ایشلتمه‌سینه گؤره آلقیشا لاییق اولدوغو حالدا بئله جزالاندیریلماسینین حاقسیزلیق اولدوغونو دئییب.
میللی گاز شیرکتی هر ایل سویوق فصیلده گاز مصرفینی آزالتماق اوچون نیروگاه‌لارین سهمیه‌سینی کسیردی. لاکین بو ایل شیرکت گازی داها تئز کسیب و نیروگاهین مازوت یاندیرماسی دیگر ایل‌لره نیسبتا داها تئز باشلاییب.
مازوت کیمی ضررلی یاناجاق یالنیز تبریزده آزاددیر
تبریز جومعه ایمامی دا اعتراض ائد‌نلره قاتیلیب. او نئجه اولور کی تهران، کرج و اصفهان کیمی شهرلرده نیروگاه‌لارین مازوت یاندیرماسینا ایجازه وئریلمیر، آنجاق تبریزده بونا ایجازه وئریلیر دئییب. آیت‌الله آل-هاشم تبریز اهالیسی‌نین انرژی ناظیرلیگیندن(وزارت نیرو) ناراضی اولدوقلارینی، مسئله‌نین تئز حل اولونماسینین واجیبلیگینی بیلدیریب.
شرقی آذربایجان‌دا عالی رهبرین نماینده‌سی اولان آل-هاشم تبریزی تهران و اصفهان کیمی شهرلرله مقایسه ائدهرک آیری‌سئچکیلیگیه ایشاره ائدهرک چیخیش ائدیب.
۱۵ نویابر تاریخیندن بو گونه‌دک تخمینا هر گون تبریزین هاواسی یالنیز حسساس قوروپ‌لارا ضررلی ایدیسه، ۲۱ نویابر تاریخینده هاوانین کئیفیت ایندئکسی ۱۵۳ اولوب و بو گؤستریجی تکجه حسساس قروپ‌لار اوچون یوخ بوتون اینسان‌لار اوچون ضررلیدیر.
۲۳ نویابردا شرقی آذربایجان والیسی تبریز نیروگاهی اوچون گاز سهمیه‌سی آیریلدیغینی بیلدیریب. یئنی سهمیه هریس نیروگاهیندان تبریز نیروگاهینا چکیله‌جک. هاوا کئیفیتی گؤستریجی‌سی (آقی) ۰-دان ۵۰-دک یاخشی، ۵۱-دن ۱۰۰-دک اورتا، ۱۰۱-دن ۱۵۰-دک حسساس قروپا عایید اینسان‌لار اوچون تهلوکه‌لی، ۱۵۰-دن چوخ اولارسا هاوانین بوتون اینسان‌لارا ضررلی اولدوغونو گؤستریر.
