جمعیتده باش وئرن حادیثه‌لری او جمعیتین حقیقت‌لری کیمی گؤرمک لازیمدیر. بیزیم اجتماعی آنلاییشیمیز بیزه او جمعیتده نئجه یاشاماق اولار درسینی وئریر. اوشاق ایکن عایله، دوست، قونشو، مکتب، محله و شهرلریمیزدن اؤیرندیکلریمیز بؤیودوکجه موختلیف موضوع‌لارا هانسی بوجاقدان باخاجاغیمیزی تعیین ائدیر. قیساجا دئسک اؤزونو معین اینانج و آنلاییشا عایید گؤرن اینسان‌لار اصلینده ایجتیماعیتین محصول‌لاریدیرلار.
نئجه کی بیر کارخانادا دوزلدیلمیش محصول‌لار موختلیف مرحله‌لردن کئچیب بازارا بیر محصول کیمی چیخیر، اینسان‌لار دا بئله مرحله‌لری کئچیرلر.
جمعیته تحصیل وئرن سیستئم‌لر اونلاری یارادان ال‌لردیلر. سوسیال مئدیا، تلویزیون، اینترنت سایت‌لاری، مکتب‌لر و هر بیر اجتماعی آخاق‌لار اونلارین شخصیت و اینانج‌لارینی یارادیرلار. کئچن گون‌لرده سوسیال مئدیادا یاییلمیش بیر ویدئودا معلم مکتبین حیطینده اوشاق‌لاری سیرایا دوزه‌رک اونلارین ساچ‌لارینی کسیردی. او معلمین داورانیشینا قارشی موختلیف یازی‌لار و اجتماعی قیناق‌لار اولدو.
بعضیلری بونو اینسان دیرلری‌نین آشاغیلانماسی کیمی، دیگرلری ایسه خیانت کیمی قبول ائتدیلر. باشقالاری ایسه اورداکی طلبه‌لرین اؤزونه حؤرمتینی مدافعه ائتدیلر. هر کس فرقلی بیر بوجاقدان بو حادیثه‌نی ایضاح ائتمه‌یه چالیشدی آنجاق بو موضوعا باشقا بیر بوجاقدان دا باخماق گرکدیر.
او معلمین اؤزو ده بیر جمعیتین یاراتدیغی محصولدور. معلمه گؤره گؤردویو ایش، اؤیرندیگی ان دوغرو یولدور. او اوشاق ایکن اونون و صینیفداش‌لارینین ساچ‌لارینی بیر معلم کسنده اونا هئچ کیم بو عملین یانلیش اولدوغونو اؤیرتمه‌ییب. بلکه ده حتی اونون اطرافینداکی اینسان‌لار، عایله‌سی و دیگرلری ده اونا قارشی بو حرکتی ائد‌ن معلمین داورانیشینی تقدیر ائتمیشدیلر. معلمه تحصیل وئرن بو سیستئم اونو ایناندیریب کی بو امک اوشاغین یاخشی تحصیل آلماسی اوچون واجیبدیر.
اصلینده ایران کیمی اؤلکه‌لرده اولان بیر چوخ حادیثه‌لره ساده‌جه بو بوجاقدان باخاندا داها دوزگون تحلیل ائتمک ایمکانی اولور. بئله سیستئم‌لرده فردی قابیلیت‌لر و خصوصیت‌لر استثنا تشکیل ائدیر. مرکزیتچی بیر سیستئمین گئتدیگی یولدا مرکز خطّینده اولمایان هر کولتور و مدنیت گؤزه گؤرونمور. اونو آرادان قالدیریب مرکزین وئردیگی تعلیمات‌لارلا موحاصیره‌یه آلیرلار. محض بونا گؤره بو گون ایراندا فارسین کولتورو اؤلکه کولتورو کیمی گؤستریلیر. اونلارین یاشاییش طرزلری، اینانج‌لاری، دیرلی بیلدیکلری، دیرسیز گؤردوکلری ایراندا یاشایان بوتون دیگر فرقلی میللت‌لرین و کولتورلرین رسمی داورانیشی کیمی تبلیغ ائدیلیر. بئله سیستئم‌لرده بیر معلمین دوغرو اولمایان تحصیل مئتودونو سئچمه‌سی عمومی سیستئم اوچون چوخ کیچیک و واجیب اولمایان بیر حادیثه‌دیر. بو سیستئم اخلاقسیزلیق‌لاری نورماللاشدیریب و حتی بونو تئوریزه ائدیب جمعیتی اؤز ایستکلرینه اویغون فورمالاشدیریرلار. بیز بوتون تعقیب و چاتیشمازلیق‌لارا باخمایاراق آذربایجان سیویل جمعی اولاراق دوغرو تحلیل و دوزگون باخیش‌لاریمیزی خالقیمیزا وئرمکله موکللفیک.
من اینسانین دایما حرکتده و اینکیشافا دوغرو آددیملاماسینی بیلیرم، عینی حالدا قاپالی توپلوم‌لاردا قاپالی دوشونجه‌لی اینسان‌لارین اولماسینی دا بیلیرم. منه گؤره هر ایلکین حتی ساده موضوع‌لاری بئله اؤنجه اؤیردیب سونرا سورغولمالی‌ییق یوخسا نتیجه‌ده اصلاح دئییل، عینادکارلیقلا قارشی قارشییا گله‌جه‌ییک و یولوموز هر نه قدر دوغرو اولسا بئله اوزاناجاق و بیزه داها باها باشا گله‌جک.
