گونئی آذربایجاندا اؤولادینا تورک آدی قویان بیر عائله اونون اوچون دؤولتدن شخصیت وثیقه‌سی آلا بیلمیر. آلپ‌ارسلان آبانین 20-ده آنادان اولسا دا قئیدیات ایداره‌سی هله ده اونا شخصیت وثیقه‌سی وئرمیر. اوشاغین آتاسی مصطفی عوض‌پور بیلدیریب کی قئیدیاتدا اولمایان اوشاغی واکسیناسیون ائتدیرمک مومکون دئییل. او هم ده رسمی قئیدیات‌لاری اولمادیغی اوچون اوشاغین بعضی خسته‌لیک‌لرینین ده معالیجه‌سینین ده دؤولت طرفیندن قارشیلانمادیغینی دئییب.
گونئیده تورکجه آدلارلا باغلی اولان موباحیثه‌لر ایل‌لردیر داوام ائدیر. بورادا ایش یالنیز اینسان آدلاری ایله بیتمیر. بوندان بیر نئچه مدت اول تهران پلیس قوه‌لرینین کوماندانی نادر مرادی تهراندا خیدمت ساحه‌لرینه عایید اولان اوبیئکت‌لره (دوکان، کافه رستوران) تورکجه آد قویولماسینین قاداغان اولدوغونو بیلدیرمیشدی. بو بیاناتی بؤیوک رئاکسییایا سبب اولدوغو اوچون نادر مرادی سونرادان بو فیکریندن گئری چکیله‌رک بئله بیر سؤز دئمه‌دیگینی ادعا ائتدی.
بوندان قاباق عمومی مدنیت شوراسی‌نین مودیری اولان مجید امامی ایرانلی اوشاق‌لارا قیرغیزجا و موغولجا آدلارین قویولماسینین تهلوکه اولدوغونو دئییب. او، اینسان‌لارین غیر ایرانی آد سئچیب سونرادان قئیدیات ایداره‌سیندن سند آلا بیلمه‌ییب محکمه‌یه گئتدیکلرینی دئییب. هله ده اؤلکه‌ده ایسلامی و ایرانی آدلارین اوستون اولدوغونو بیلدیره‌رک قیرغیزجا ، موغولجا و آوروپا آدلارینین چوخالماسینین تهلوکه اولدوغونو دئییب.
سون ایل‌لر ایراندا اؤولادینا تورکجه آد قویانلارین سایی آرتیب. بیر چوخ آذربایجانلی والدین قئیدیات ایداره‌سی‌نین تورکجه آدلارا قارشی موناسیبتینه باخمایاراق موباریزه آپاریر، محکمه یولو ایله ده اولسا، ایل‌لر کئچسه ده اؤولادلارینا سند آلا بیلیرلر. هر بیر حالدا چتینلیک‌لره باخمایاراق تورکجه آد قویانلارین سایی گونو گوندن آرتیر.
ایراندا تورک‌لرین سایی چوخ اولسا دا ایران بیر دؤولت کیمی تورک‌لری ایرانین بیر پارچاسی کیمی قبول ائتمه‌یه‌رک اونلاری ایرانلی کیمی تانیمیر. اونلار ایرانلی دئدیکده یالنیز فارس ائتنیک کیملیگینه منسوب اینسان‌لاری و فارس تاریخی و مدنیتینی نظرده توتورلار.
تورکجه آد سئچمک بیر مدنی دیره‌نیش یولو کیمی
گونئی آذربایجاندا والدین‌لرین اؤولادلارینا تورکجه آدلار سئچمه‌سی و قئیدیات ایداره‌سی‌نین بونا قارشی چیخماسی اوزون ایل‌لردیر تکرارلانیر. ایراندا قئیدیات ایداره‌سی‌نین حاضیرلادیغی آدلار لیستی وار. و والدین‌لر ده گرک اوشاق‌لارینا بو لیستدن آد سئچسینلر. بو لیستده بعضی تورکجه آدلار دا وار. لاکین اگر کیمسه بو آدلاردان باشقا تورکجه آد قویماق ایسته‌ییرسه اونون بو ایسته‌یگینی تهراندا اولان بیر هئیت دیرلندیرمه‌لیدیر. والدین‌لرین بو ایسته‌یی تامین ائدیلمه‌دیکده ایسه ایکی یول قالیر: دیره‌نمک و یا تسلیم اولماق.
بو لیستدن کنار تورکجه آد سئچن و موباریزه آپاران بیر چوخ عائله وار. اونلارین آراسینا ایل‌لرله سند آلا بیلمه‌ینلر ده وار. اونلاردان بیری ده ماکیدا یاشایان اوغوزدور.
اوغوز ماکیدا یاشایان میللی فعال صادق فیض‌اله نژادین اوغلودور. اونون آدی معلوم لیستده اولمادیغی اوچون باخیلماسی اوچون هئیته گؤنده‌ریلیب. اونلار دا اؤز نؤوبه‌لرینده والدین‌لرین ایسته‌یینی تامین ائتمه‌ییبلر. لاکین صادق بی یولوندان دؤنمه‌ییب و ایل‌لرله اوغلونون سندینی آلماق اوچون چالیشیب. دوز ۶ ایل سونرا اوغوز اؤز آدی ایله رسمی قئیدیاتا دوشه‌رک سند آلا بیلیب. سندی آلانا قدر ایسه او، ۶ ایل سندسیز یاشاییب.
اوغوزون بالاجا قارداشی ماناس دا عینی طالعی بؤلوشور. اونا دا اؤز آدینا گؤره هله ده وثیقه وئریلمیر. ماناسین آرتیق 2 یاشی اولاجاق.
بیر باشقا نومونه اردبیلده یاشایان آییل‌ین حئکایه‌سیدیر. میللی فعال و موغنّی سجاد جولانی قیزی آییل‌ین شخصیت وثیقه‌سینی یالنیز ۹ آی سونرا آلا بیلیب. او اردبیل قئیدیات ایداره‌سی‌نین قاباغیندا چکدیگی بیر ویدئودا آییل آدینین تصدیقلنمه‌سی اوچون تهراندا ۳ ادبیاتچی‌نین قرار وئرمه‌سینین دیکتاتورلوغون و مرکزچیلیگین نتیجه‌سی اولدوغونو بیلدیرمیشدی. اونون چکدیگی اعتراض ویدئوسو گئنیش یاییلاراق بؤیوک اعتراض‌لارا سبب اولموشدو.
بو حادثه جمعیتده رئاکسییالارا سبب اولدو. اینسان‌لار سوسیال مئدیادا و کوچه‌لرده اعتراض‌لارینی دیله گتیردیلر. سوسیال مئدیادا باشلایان کامپانییادا اینسان‌لار والدینین اوشاغا آد سئچمه‌یینی اونلارین طبیعی حاقی اولدوغونو مودافیعه ائدیردیلر. سونرادان اردبیلده دیوارلاردا «اوشاق‌لارین کیملیگینی قورویون»، «حکومتین اؤولادیما آد سئچمک حاقی یوخدور» کیمی شوعارلار یازیلیب.
همین واخت معلوم اولدو کی عینی دؤورده آییل کیمی بیر نئچه اوشاق دا اؤز تورکجه آدینا گؤره وثیقه آلا بیلمیرلر. بو آدلارین ایچینده آنار، یاغیش، ماناس، سئوگی، آتاکان و هونتای آدلاری دا وار. بو ایسه بو مؤوضودا بیر چوخ والدینین موباریزه آپاردیغینی بیلدیریر.
گونئی آذربایجاندا یئنی دوغولان اوشاق‌لارا تورکجه آد سئچمک مدنی بیر دیره‌نیش کیمی داوام ائدیر.
دیره‌نیش نتیجه‌سینده
حاضیردا گونئی آذربایجاندا تورکجه آدلار ان چوخ سئویلن آدلارا چئوریلیب. ماکیلی صادیق فیض‌اله‌نژاد ایندی قوهوم‌لاریندا دا یئنی دوغولان اوشاق‌لارا تورکجه آدلار قویولدوغونو دئییب. آراز، آیتک، بابک، سئودا، سئویل و آیخان کیمی آدلار ان چوخ سئویلن تورکجه آدلاردیر.
شرقی آذربایجان قئیدیات ایداره‌سی‌نین مودیری احمد جودی دئییب کی، شرقی آذربایجان ویلایتینده آدلارین ۴۰ فایزی تورکجه‌دیر. داها سونرا علاوه ائدیب کی بیر چوخ آد قئیدیات ایداره‌سی‌نین لیستینده اوّلجه اولماییب، سونرادان آرتیریلیب. او هم ده دئییب کی هر ایل بو لیسته بیر نئچه یئنی آد دا علاوه ائدیلیر. لاکین بو علاوه‌لری ده آد کومیته‌سی تصدیقله‌ییر.
اوشاق‌لارا تورکجه آد سئچمک دیره‌نیشی گؤزله‌نیلن نتیجه‌یه چاتیب. حاضیردا رضا شاه دؤوروندن باشلانان و بو گونه‌دک داوام ائد‌ن ائکسکلوزیو(انحصاری) میللتچیلیک غیر-فارس‌لار طرفیندن قبول ائدیلمه‌مکده‌دیر. تورکجه یئر آدلارینا دؤزه بیلمه‌ین حکومت حاضیردا گئنیش شکیلده یاییلان تورکجه اینسان آدلارینی چتینلیکله ده اولسا قبول ائتمه‌لی اولوب.
عمومی مدنیت ایداره‌سی(شورای فرهنگ عمومی)-نین مودیرینین معناسیز گؤردویو «قیرغیزجا و موغولجا» اولان آدلار، اصلینده گونئی آذربایجان و باشقا تورک یوردلاریندا یئرلی و معنالی آدلاردیر و تورکجه اولان همین آدلارین سایی گونو گوندن آرتیر.
