۱۴ فروردین تاریخینده تبریزده «سایپا آذربایجان» شیرکتی‌نین ایشچی‌لری اعتصاب ائدیبلر. ایشچی‌لر شیرکت سهم‌لرینین ساتیشینا اعتراض ائتمک اوچون ایشی دایاندیریبلار. بایرامدان قاباق دا زنجانین «خمسه» سیمان کارخاناسیندا ایشچی‌لر ایکی دفعه اعتصاب ائدیبلر. ۲۰۲۲-جی ایلده تبریزین «موتوژن» و «تراکتورسازی» شیرکت‌لرینین ده ایشچی‌لری اعتصابی ائدیبلر. کئچن ۳ آی عرضینده آذربایجانین گونئیینده ان آز ۵ ایشچی اعتصابی قئیده آلینیب.
سایپا شیرکتینده ایشچی‌لرین اعتصابی
«İrankargar.com» سایتینین وئردیگی معلوماتا اساساً ۱۴ فروردین تاریخینده تبریزده «سایپا آذربایجان» شیرکتی‌نین ایشچی‌لری ایستحصالی دایاندیراراق اعتصاب آکسییاسی کئچیریبلر. اونلار شیرکتین ساتیشینا اعتراض ائده‌‌رک دؤولت ارگان‌لارینین مسئله‌یه موداخیله‌سینی طلب ائدیبلر.
ایشچی‌لر بوتون بو اولانلاری «تهرانین اویونو» حساب ائده‌‌رک داها اؤنجه ده آیری‌سئچکیلییه معروض قالدیقلارینی دئییبلر. اونلار «سایپا» شیرکتی‌نین آذربایجانلی ایشچی‌لره آز معاش وئردیکلرینی بیلدیریبلر. دیگر نقلیات واسیطه‌لرینی ایستحصال ائد‌ن «ایران‌خودرو» شیرکتی‌نین ایشچی‌لری ده کئچن ایل آبانین ۱۵-ده اوخشار سبب‌لره گؤره اعتصابا باشلامیشدیلار.
شیرکتین ساتیلاجاغی تقدیرده «سپاه»-ین (ایران اینقیلاب کئشیکچی‌لری اوردوسو) الینه دوشه‌جه‌یی دئییلیر. «سایپا» شیرکتی‌نین آذربایجانداکی کارخاناسی دا گؤروندویو کیمی بو پلانا اساساً ساتیشا چیخاریلیر. ایشچی‌لر شیرکتین ساتیلاجاغی تقدیرده ۶۰۰-دن چوخ سایدا ایشچی‌نین ایشدن چیخاریلاجاغینی دئییرلر.
زنجاندا ایشچی‌لرین کوتله‌وی اعتصابی؛ اعتصابین لیدئرلری ایشدن چیخاریلیبلار
زنجان-بیجار یولونون ۴۵ کیلومترلیگینده یئرله‌شن «خمسه» سیمان ایستحصالی کارخاناسی‌نین ایشچی‌لری بایرامدان قاباق بعضی ایشچی‌لرین ایشدن چیخاریلدیقلاری اوچون اسفندین 23-ده اعتصاب اعلان ائدیبلر. کارخانانین سوروملو شخص‌لری ایسه ایشچی‌لرین ایش ساحه‌سینده ییغیشماقلارینا سببین اعتصاب یوخ الکتریک کسینتیسی اولدوغونو دئییبلر. لاکین سونرادان ویلایتین جاوابده شخص‌لری ایشچی‌لرین اعتصاب ائتدیکلرینی تصدیق ائدیبلر.
اعتصاب ائد‌نلرین بیری بو حاقدا «اتک‌یازی»-یا معلومات وئریب. او اعتصابین باش وئردیگینی تصدیق ائده‌‌رک اونون سبب‌لرینی ده ایضاح ائدیب. الده اولان معلوماتا اساساً بایرامدان قاباق بعضی ایشچی‌لرین ایشدن چیخاریلماسی سون اعتصابا سبب اولوب. ایشدن چیخاریلان شخص‌لر ایسه بوندان قاباق کارخانادا باش وئرمیش اعتصابین لیدئرلریدیرلر.
اعتصاب نتیجه‌سینده تهلوکه‌سیزلیک قوّه‌لری ده مسئله‌یه قاریشیبلار. لاکین اونلار کارخانا رهبرلیگی ایله عینی فیکیرده اولدوقلارینی بیلدیره‌رک اعتصاب آکسییاسینی داغیتماغا چالیشیبلار.
خمسه سیمان کارخاناسی‌نین ۱۷۵ ایشچیسی وار. و بو کارخانا دؤولتین مولکیتینده دئییل، اؤزل شیرکتدیر. ۱۳۹۲-جی ایلده ایشه باشلایان بو کارخانا حاضیردا هر گون ۶ مین تن سیمان ایستحصال ائدیر.
داها اؤنجه‌کی اعتصاب‌لار
«اتک‌یازی»-نین آلدیغی معلوماتا اساساً سون اعتصاب اسفند آیی‌نین اوّل‌لرینده باش توتموش ایلک اعتصابین نتیجه‌لری ایله باغلیدیر. ۴ اسفندده حیاتا کئچیریلن ایلک اعتصابدا ایشچی‌لر آیلیق معاشین آرتیریلماسینی، ایش ساعتی‌نین آزالدیلماسینی و ناهار یئمکلرینین کارخانا طرفیندن پولسوز وئریلمه‌سینی طلب ائدیبلر.
اعتصابین ایکینجی گونونده مسئله‌یه موداخیله ائد‌ن تهلوکه‌سیزلیک قوّه‌لری ایشچی‌لرین گئری چکیلمه‌سینه سبب اولمور. نتیجه‌ده مودیرلر ایشچی‌لرین ایستکلرینی مودریته چاتدیرماق اوچون اونلاردان بیر هفته واخت ایسته‌ییبلر.
بیر هفته کئچندن سونرا ایشچی‌لر یئنیدن اعتصاب ائدیب اؤز طلب‌لرینین قبول ائتدیره بیلیبلر. اونلارا سؤز وئریلیب کی طلب‌لری ۱ آی عرضینده پیلله-پیلله حیاتا کئچیریله‌جک.
اوّلجه ایش نؤوبه‌سینی قایدایا سالان کارخانا رهبرلیگی بوندان سونرا اعتصابا رهبرلیک ائد‌ن ۴ نفری ایشدن چیخاریب. بو ایسه دیگر ایشچی‌لرین اعتراضینا سبب اولوب. و نتیجه‌ده حاضیردا دانیشدیغیمیز سون آکسییا باش توتوب.
ایشچی‌لرین تهلوکه‌سیزلیگی آچیق شکیلده پوزولور
اعتصاب ائد‌ن ایشچی‌لردن بیری تهلوکه‌سیزلیک قوّه‌لرینین اعتصابا موناسیبت‌لری حاقدا معلومات وئریب. او دئییب کی، سون آکسییادان سونرا زنجان «اطلاعات» ایداره‌سی ده مسئله‌یه قاریشیب. لاکین اونلار حاقسیز اولان کارخانا رهبرلیگینی دئییل، ایشچی‌لری گوناهلاندیراراق اعتصابا مانع اولماغا چالیشیبلار.
خمسه سیمان کارخاناسی اؤزل‌دیر. کارخانا ایشچی‌لری ۳ آیلیق موقاویله ایله ایشه گؤتورور. بعضی ایشچی‌لر اوزون ایل‌لر بورادا فعالیت گؤسترسه‌لر ده اونلارلا یئنه ده اوزون‌موددتلی موقاویله ایمضالانمیر. کارخانانین رهبری ایسته‌دیگی واخت ایشچی‌لری قوووب یئرلرینه باشقا ایشچی‌لری گؤتورور.
آز مدتی اولان امک موقاویله‌سی صاحیبکارلارین ایشچی‌لره قارشی حاقسیزلیق ائتمه‌سینه سبب اولور. اونلار بئله موقاویله‌لرین سایه‌سینده داواملی اولاراق یاشلی ایشچی‌لری ایشدن چیخاریر یئرینه یئنی ایشچی‌لر گؤتورورلر. بوندان باشقا بئله قیسا موددتلی موقاویله‌لر اونلارین ایشچی‌لر قارشیسیندا مسولیتینی ده آزالدیر. بو ایسه بین‌الخالق قوروم‌لارین و ایران آنایاساسی‌نین دا تصدیق ائتدیگی ایشچی حقوق‌لارینا و ایش تهلوکسیزلیگینه ضیددیر.
بوتون بونلارا باخمایاراق اعتصابا موداخیله ائد‌ن گوج ایستروکتورلاری اعتصابی یئرسیز حساب ائدیب قارشیسینی آلماغا چالیشیبلار. مسئله‌یه دیگر قوروم‌لار دا رئاکسییا وئریبلر. زنجان ایش ایداره‌سی‌نین مودیری علی کریمی ایشچی‌لرین قانون چرچیوه‌سینده داورانمالارینی طلب ائدیب.
الده اولان معلوماتا اساساً سون اعتصاب نتیجه‌سیز قالیب و طلب ائدیلن ایستک گئرچکلشمه‌ییب. زنجان ایشچی‌لر ائوینین صدری اصغر نجاری زنجان والیسی ایله ایشدن قووولان ۴ شخصین یئنیدن ایشه گؤتورولمه‌لری اوچون دانیشدیغینی دئسه ده بو هله باش توتماییب.
اولانلاری «اتک‌یازی»-یا دانیشان ایشچی ده ایشدن قووولان ۴ نفرین یئنیدن ایشه گؤتوروله‌جه‌یینه اینانمادیغینی و داوام ائد‌ن اعتصابین ایشچی‌لرین حقوق‌لارینین داها دا چوخ پوزولماسینا سبب اولاجاغینی دئییب.
تبریزین «موتوژن» کارخاناسی‌نین ۷۰۰ ایشچیسی ایشدن چیخاریلیب
تبریزین «موتوژن» شیرکتینده ۹ گونلوک اعتصاب آکسییاسی ۷۰۰ شخصین ایشدن چیخاریلماسی ایله نتیجه‌له‌نیب. ۲۰بهمن تاریخینده باشلایان بو آکسییا ۹ گون داوام ائدیب. لاکین بایراما بیر آی قالمیش یوزلرله ایشچی‌نین ایشدن چیخاریلماسی خبری یاییلیب.
ایشچی‌لر معاش‌لارین برابر شکیلده وئریلمه‌سی، شیرکتله بیرباشا موقاویله باغلاماق و چتین ایش شرایطینه گؤره ایش چتینلیگی(سختی کار) حقوق‌لارینی طلب ائدیبلر. «موتوژن» ده «خمسه» کارخاناسیندا اولدوغو کیمی ایشچی‌لری قیسسا موددتلی موقاویله‌لرله ایشه گؤتوره‌رک داها چوخ گلیر الده ائدیر و ایشچی‌لرین ایش تهلوکسیزلیگینی پوزور.
کارخانانین سوروملو شخص‌لری ۹ گون ایشچی‌لرین طلب‌لرینی قبول ائتمه‌ییبلر. داها سونرا ایسه اونلاری ایشدن چیخاریبلار.
موتوژن شیرکتی بو جراتی کیمدن آلیر
«موتوژن» شیرکتی اورتا آسیادا ان بؤیوک الکتروموتور ایستحصالی کارخاناسی کیمی تانینیر. کارخانا «غدیر هولدینگ»-ه عاییددیر. بو هولدینگین ایسه «سپاه»-لا علاقه‌لی اولدوغو بیلدیریلیر.
اونلار «سپاه»-آ آرخالاناراق ۹ گونلوک اعتصابدان سونرا ایشچی‌لرین حسابلاشما فورماسینی اونلارا وئره‌رک بایراما بیر آی قالمیش ۷۰۰ ایشچینی ایشدن چیخاریبلار.
بوندان بیر گون سونرا شرقی آذربایجان صنعت و معدن تشکیلاتی‌نین رئیسی پرنیان بونو یالانلاییب. او بیلدیریب کی سؤزو گئدن ۷۰۰ شخصین موقاویله موددتی بیتیب، بونون اوچون ده اونلار شیرکته چاغیریلیبلار.
نتیجه‌ده ۷۰۰ ایشچی‌نین یئنیدن ایشه گؤتوروله‌جه‌یی دئییلیب. لاکین بونو تصدیقله‌یه‌جک معلومات یوخدور. پرنیان سوروملو قوروم‌لارین ایشچی‌لرین طلب‌لرینین ده یئرینه یئتیریله‌جه‌یینی دئسه ده، بونو دا تصدیق ائد‌ن معلومات یوخدور.
تراکتورسازی شیرکتینده ایشچی‌لرین اعتصابی
۹بهمن تاریخینده تبریزین دیگر موتور ایستحصالی شیرکتی‌نین ایشچی‌لری ده ۴ گونلوک اعتصاب آکسییاسی کئچیریبلر. بوندان ۴ آی اوّل ده اعتصاب ائد‌ن ایشچی‌لر طلب‌لرینین یئرینه یئتیریلمه‌مه‌سینه اعتراض ائدیبلر.
تراکتورسازی شیرکتی‌نین رهبرلیگی مودیری دییشه‌رک ایشچی‌لرین طلب‌لریندن ایمتیناع ائتمه‌یه چالیشدیغی دئییلیر. سون اعتصابدا ایسه ایشچی‌لر هم ده یئنی مودیرین درحال ایشدن چیخاریلماسینی طلب ائدیبلر.
«İrankargar.com» سایتینین وئردیگی معلوماتا اساساً اونلار معاش‌لارینین چوخالماسی، ایشچی‌لر شوراسی‌نین قورولماسینی و ایش تصنیفاتی‌نین یارادیلماسینی طلب ائدیبلر.
«ایلنا» خبر آژانسینا دانیشان بیر ایشچی طلب‌لری باره‌ده شیرکت رهبرلیگی ایله دانیشیغا باشلاندیغینی بیلدیریب. سون آکسییا آبان آیینداکی طلب‌لرینین یئرینه یئتیریلمه‌دیگی اوچون باشلاییب. سون دانیشیق‌لارین دا ایسته‌نیلن نتیجه‌یه چاتماسی باره‌ده هر هانسی بیر معلومات یوخدور.
ایشچی‌لرین سسی نییه ائشیدیلمیر؟
۳ آی عرضینده آذربایجاندا باش توتموش ۵ بؤیوک اعتصاب آکسییاسی دقته لاییق مسئله کیمی گؤرونسه ده، تأسفلر اولسون کی، جمعیتین و سوسیال حرکات‌لرین دقتینی چکمه‌ییب.
سؤزو گئدن اعتصاب‌لارین هئچ بیری تام شکیلده اوغورلو اولماییب و اونلار یوکسک دایره‌لرده ائشیدیلمه‌ییبلر. بو سس‌سیزلییه گؤره آذربایجان ایشچی‌لرینین سسی بوغازیندا بوغولور و ایش صاحیب‌لری و بؤیوک سرمایه صاحیب‌لری ایشچی حقوقونو داها راحت شکیلده پوزورلار.
