یونئسکونون گئنل مودورو، آوودری آزولئی‌یین اولوسلار آراسی دونیا آنادیلی گونو موناسیبتی ایله مئساژی
فئورال ۲۱ ، ۲۰۲۳
ترجمه: بهزاد جدی
آنادیلینده تحصیل آلماق، انسانلارین هریؤنلو گلیشمه‌سینه و دیل میراثینین گله‌جک نسیل‌لره اؤتورولمه‌سینه نه قدر گرکلی اولسا دا، تاسسوفله دونیا اؤیرنجیلرینین %۴۰-ی هله ده دانیشدیقلاری و ان یاخشی باشا دوشدوکلری دیلده تحصیل آلماقدان محرومدولار. بئله بیر دوروم، اؤیرتمه‌یی، کولتورل ایفاده‌نی، و ایجتیماعی ایلیشکیلرین قورولماسینی جیددی شکیلده پوزوب بالتالاماقلا اینسانلیغین دیل میراثینی اؤنملی اؤلچوده گوجسوزلشدیرمکده‌دیر.
ائله بونا گؤره ده درس اؤیرتیمینده آنادیلی مسئله‌سی داها جیددی شکیلده دیققته آلینمالیدیر. ۲۰۲۲- جی ایلده یونئسکو بومسئله‌نی ایل بویو دستکله‌‌دی و بو دستکله‌مه کئچن ایلین سئنتییابر آییندا بیرلشمیش میللتلر تشکیلاتینین باش کاتیبی آنتوتییو قوتئرئش طرفیندن قورلان «اؤیرتیمین دؤنوش زیروه‌سی» ایله ان یوکسک سوییه‌یه چاتدی.
بو اؤنملی مسئله هر شئی‌دن اؤنجه، بیلگی‌لرین داها یاخشی توپلانماسینی طلب ائدیر. بو بیلگیلر، بللی و خصوصیلشدیریلمیش ایشلر گؤرمه‌یی امکانلی قیلاجاقدیر. آنجاق هر شئی‌دن اؤنجه، دونیانین دیل و کولتور باخیمیندان چئشیدلی و یئری دولدورولماز آنجاق قیریلغان اولان دیرینه داها گئنیش شکیلده آییق اولماغا احتیاجلی‌دیر.
اینسانلار دانیشدیغی ۷۰۰۰ – دن آرتیق دیللرین هر بیریسی اؤز ایچینده دونیایا، شئی‌لره، و وارلیقلارا بنزرسیز بیر گؤروش، بیر دوشونمه و حیس ائتمه بیچیمی داشیییر. اوقدر کی هر بیر دیلین یوخ اولماسی گئری قایتاریلا بیلمه‌یه‌جک بیر ایتکی‌یه سبب اولور. بو قونودا یونئسکونون باشچیلیغی ایله میللتلر آراسی « یئرلی دیللر اون ایللیگی» (۲۰۲۲ – ۲۰۳۲)، دونیانین کولتور و دیل چئشیدلی‌لیگینین اؤنملی بیر بؤلومونو قوروماق اوچون دونیا توپلوملارینا بیر فورصت یارادیر.
بو هم ده اولوسلار آراسی دونیا آنادیلی گونونون هدفیدیر: دونیانی، چوخلولوغو ایچینده ایفاده ائتمه‌نین بو یوللارینی قوتلاماق، دیللرین چئشیدلی‌لیگینی اورتاق بیرمیراث کیمی قورویوب ساخلاماق وظیفه‌سینی بویون آلماق، و هامییا آنادیللرینده کئیفیتلی تحصیل آلماق اوچون چالیشماق.
