فارسجادان چئویرن: میلاد بالسینی
عیسی کلانتری‌نین آلدیغی تحصیلات چوخ اومود وئریجی‌دیر. او آذربایجانین مرند شهرینده دوغولوب، 54-1350 آراسیندا اورمو اونیورسیته‌سینده اکینچیلیک اوزره لیسانس آلیب‌دیر. هابئله یوکسک لیسانس و دوکتورلوق درجه‌سی ایله آمریکانین نئبراسکا و آیووا اونیورسیته‌سی‌نین “بیتکی‌لرین فیزیولوگییا و بیوکیمیاسی بؤلومونده ماذون اولوب‌دور.
جناب کلانتری، اکبر هاشمی رفسنجانی‌نین پرزدئنت‌لییینین هر ایکی دؤورونده و محمد خاتمی‌نین پرزدئنت‌لییینین بیرینجی دؤورونده اکینچیلیک باخانی ایدی. رفسنجانی دؤنه‌مینده اؤلکه‌نین ایچ سیاستی اینشئات ایش‌لری و اؤزونو تامین ائتمه اوزه‌رینده قورولدوغو اوچون، اکینچیلیک ناظرلییی‌نین اساس آماجی دا آرپا، بوغدا، مکه کیمی کیمی استراتژیک محصوللاری اوچون اکین یئرلری‌نین آرتیریلماسی و داها چوخ باغین سالینماسی ایدی. بو آماجا چاتماق اوچون ده سدلر دوزه‌لیب، یئرلری سو ایله تامین ائتمه لازیم ایدی. سدلره تامین اولماسی مومکون اولمایان یئرلر اوچون ده راحاتجاسینا درین قویولارین قازیلماسینا ایذین وئریلیردی. بو قرار‌لار جناب کلانتری‌نین 12 ناظیرلیک دؤنه‌مینده داواملی شکیلده وئریلدی. اوندان سونرا احمدی نژادین داو دؤولتینده ده بو تصمیم‌لر آردی کسیلمه‌دن داوام ائتدی. بئله تدبیرسیز ایشلرین نتیجه‌سینده اؤلکه قوراقلیقلا اوزله‌شیب، نهایت‌ده سو بؤحرانی دا: اورمو، زاینده رود، کارون، گاوخونی، هورالعظیم و آیری-آیری گؤللرین قوروماسینا سبب اولدو.
عیسی کلانتری اورمو گؤلونون جانلاندیرما کومیته‌سی‌نین صدری و روحانی‌نین سو، اکینچیلیک و چئوره موعاونی
حسن روحانی 1392_جی ایلین پرزدئنت‌لیک سئچکی‌لرینده اورمو گؤلونون جانلاندیرماق و سو بؤحرانی‌نین حل اولونماسینی اوچون وعده وئرمیشدی، اصلینده میللت ده بو وعده‌لر اساسیندا اونو پرزدئنت سئچدی. جناب روحانی اورمو گؤلونون دولدورماغین، انرژی ناظیری اولان جناب چیت چییانا دستور وئردیلر. آنجاق اینانیلماز بیر حالدا، چیت چییان ایسه عیسی کلانتری‌نی اورمو گؤلونون دولدورما کومیته‌سی‌نین صدری سئچدی. یانی رفسنجانی ایله خاتمی‌نین دؤنه‌مینده اکینچیلیک ناطیری اولوب، بئله قونولارا خیانت‌له یاناشان عیسی کلانتری روحانی‌نین پرزدئنت‌لییینین بیرینجی دؤورونده اورمو گؤلونون جانلاندیرما کومیته‌سی‌نین صدری سئچیلدی. البته بوا قدر اورمو گؤلونون جانلاندیرما کومیته‌سی‌نین لاپ اؤنملی ایشی: یالنیز یاغینتی‌لار اساسیندا اورمو گؤلونون سویونون یوکسلمه‌سی‌نین راپورتونو یاییم‌لاماق اولموشدور. اونسوز دا بو حاقدادا هئچ بیر علمی آراشدیرما اولمامیش‌دیر. کومیته‌نین سایتینا باخدیق‌دا ساده مقاله‌لر و اؤتری راپورت‌لارلا اوزله‌شیریک.
روحانی‌نین پرزدئنت‌لییینین ایکینجی دؤورونده؛ عیسی کلانتری سو، اکینچیلیک وچئوره‌ده روحانی‌نین بیرینجی موعاونی سئچیلدی. اوچ دؤوره اکینچیلیک باخانی اولوب چئوره حاققیندا یانلیش تصمیم توتان بیریسی اورمو گؤلونون جانلاندیرما کومیته‌سی‌نین صدرلیییندن علاوه بو گون پرزدئنتین سو، اکینچیلیک و چئوره اوزره بیرینجی موعاونی سئچیلیب و 50 ایلدن سونرا ایرانین سویونون بیتمه‌سیندن سؤز آچیر. او سو بؤحرانی‌یلا قوراقلیغین ندنلرینی یالنیز یاغینتی‌لارین آزالماسینا باغلاماق‌لا بو قونونون تمل سبب‌لرینی اؤرت باسدیر ائتمه‌یه چالیشیری. بیر حالداکی میللی قوراقلیق مرکزی، شرقی-غربی آذربایجان‌لا کوردوستان ایالت‌لرینین بؤحران دیرئکتورلوغونون وئردییی معلوماتا گؤره؛ 13/05/1397-01/07/1396 تاریخینی اوزون موددتلی دؤورله موقایسه ائدنده سیرایلا 27/25، 8/2، 10/2 فاییز یاغینتی‌لار آرتیب‌دیر. بونونلا اورمو گؤلونون سو حؤوضه‌سی بو اوچ ایالت‌ده یئرلشدییی اوچون گؤلون سویونون آرتماسی دا گرکیرمیش آمما اصلینده بئله اولماییب‌دیر.
13/05/1397 01/07/1396 تاریخینده اولان یاغینتی‌لار اوزون موددتلی دؤورله موقایسه‌ده
بو ایل ده اؤلکه‌نین آرتمیا آراشدیرما مرکزی، گؤلون سویوندان گؤتوردویو نومونه‌لره گؤره بو برک دریلی مؤوجودون بوتونلوک‌له آرادان گئتمه‌سینی بیلدیریب‌دیر.
جناب کلانتری آمریکانین اعتبارلی اونیورسیته‌لریندن ماذون اولدوغو اوچون ایندی‌یه قدر اؤز رسمی مسئولیت‌لرینده ساوادیندان یارارلانیب، رفسنجانی دؤنه‌مینین سیاست‌لرینی جاهیلجه عمله کئچیرمه‌سه‌یدیی همی ده او دؤنه‌مین سیاست‌لرینین انگل‌لریندن باشقا سیاست‌چی‌لره سؤز آچسایدی بلکه ایندی اؤلکه‌ده قوراقلیقلا گؤللرین قوروماسینا شاهید دئییلدیک. هابئله جناب کلانتری ایندی پرزدئنتین سو، اکینچیلیک و چئوره موعاونی اولاراق دانیشدیق‌لاری یالانلاری ایله کئچمیشده‌کی ائتدییی جنایت‌لری ایندی اؤرت_باسدیر ائتمه‌یه چالیشمازدیلار.
