شرقی آذربایجان ایالتینده یئرله‌شن سونگون مس معدنی ایشچی‌لری آغیر و تهلوکه‌لی ایش دورومو ایله گلیر آزلیغی سببیندن معدن ایش یئری ساحه‌سینده اعتصاب ائدیبلر. بو اعتصاب سه‌شنبه گونو مهرین 13ندن اونلارجا ایشچی‌نین قاتیلیمی ایله باشلایاراق ایکی گون داوام ائتمیشدیر. اونلار سویوق گئجه‌نی ده چادیرلاردا کئچیریبلر. اعتصاب ائدنلر معدنین بیر نئچه سوروملوسونون استعفاسینی ایسته‌یه‌رک، یازیلی پارچالاردا عدالتسیزلیکدن شیکایت ائدیبلر. ایران‌کارگر سایتینین وئردیگی معلوماتا گوره سونگون معدن ایشچی‌لرین ایشه آلینماسی ۳ آیلیق سوزلشمه‌لرله اولور. آجین، ندا، مبین، نوآوران و زحل کیمی پیمانکار شیرکت‌لر واسیطه‌سی ایله ایشه آلینان ایشچی‌لر ایش تهلوکه‌سیزلیک‌لری تامین ائدیلمیر. ایشچی‌لر سوروملولارین ایسته‌دیگی زاماندا ایشه آلینیر، ایسته‌دیکلری زامان ایسه ایشدن آتیلیرلار. سونگون معدنی ایشچی‌لرینین اعتصاب ائتدیگی بؤلومده ۵۰۰ ایشچی ایشله‌ییر، ۱۵ ایلدن باشلایاراق ۲۰ ایله‌جن ایش تجروبه‌سی اولان بو ایشچی‌لرین گلیری ۵ میلیون ایله ۷ میلون تومن آراسیندا اولور. ان سون تیر آییندا سونگون معدن ایشچی‌لری اعتصابی یاشانمیشدی.
سونگون معدنی نییه اؤنملی‌دیر؟
ورزقان شهرینین یاخینلیغیندا اولان سونگون مس معدنی دونیا مس کمربندینده یئرله‌شه‌رک، اورتادوغونون ان بؤیوک مس معدنی کیمی تانینیر. او هم ده ایران مس چیخارتماسینین یوزده قیرخینی تامین ائدیر. ورزقان میللت وکیلی دهقانی‌نین بیلدیردیگینه گؤره سونگون معدنی ۴ میلیارد تن رزرو مسه صاحیبدیر . وار اولان گئدیشات ایله بو معدنین ۳۸۰ ایللیک مس چیخارتماق اوچون رزروی وار. دهقانی هم ده بیلدیریب کی بو معدن اؤلکه اوچون ایلده ۲۰ مین میلیارد تومنلیک گلیر ساغلاییر. سونگون مس معدنی کومپلکسی ۴۰۰۰ حدودوندا پرسنله مالیک‌دیر و ۲۵ ایلدیر کی گئجه-گوندوز اوندان میس چیخاردیلیر. سونگون مس معدنی یوکسک مالی پتانسیله صاحیب اولسا دا یئرلی اهالی بو وارلیغین اونلارین یاشامینا موثبت تاثیر بوراخمادیغیندان ناراضیلیق ائدیرلر. معدن گلیرینین آذربایجاندان چیخاردیلماسی، هم ده چئوره مسئله‌لری ناراضیلیق سبب‌لری کیمی تانینیر.
سونگون میس معدنیندن الده ائدیلن گلیر هارا گئدیر؟
شرقی آذربایجان ایالتینین والیسی، خردادین 17ده فارس خبر آژانسینا هر گون ۵۰ میلیارد تومن مس کنسانتره‌سی‌نین ورزقاندان کرمانا گئتدیگینی دئمیشدی. ورزقان میلت وکیلی دهقانی شهریورین 28ده آناج خبر آژانسینا ورئدیگی رپورتاژدا بئله بیر سرمایه‌دن آذربایجانین سهمی هارداسا صیفر حددینده اولدوغونو بیلدیرمیشدی. تبریز میللت وکیلی بیگی ایسه بنزر ایدعالاردا هرگون آذربایجاندان ۲۰ میلیون دلار دیرینده میس کنسناتره‌سی چیخاریلدیغینی سؤیله‌میشدی. سونگون معدنینین گلیری ان سون تیراکتور فوتبال کلوبونون مالی چتینلیک‌لری ایله بیر داها گوندمه گلدی. تیراکتور فوتبال کلوبونون آسیا اوینلاریندان چیخماق ایسته‌مه‌سی بیر چوخ اعتراض‌لارا سبب اولدو و کلوبون سونگون مس معدنی طرفیندن آلینماسی گونده‌مه گلدی. بونا رئاکسیا وئرن ایلک کرمان میللت وکیلی محمدرضا پور ابراهیمی اولدو. کرمان میلت وکیلی مس چیخارما گلیرینین موفلیس بیر فوتبال کلوبونا خرجلنمه‌سی امکانسیزدیر دئمیشدی. بونا ایسه آذربایجان میللت وکیل‌لری تپکی گوستردی. تبریز میللت وکیلی پزشکیان سونگون مس معدنی گلیرینین کرماندا خرجلندیگینی، ایران مس صنایعی شیرکیتی اوردا ایکی فوتبال کلوبو بو گلیرله ایداره ائتدیگینی دئمیشدی. او هم ده بعضی‌لری اؤلکه قایناق‌لارینی آتالارینین میراثی حساب ائتدیگینی سؤیله‌یه‌رک سونگون مس معدنی گلیرینین کرمان میللت وکیلینه هئچ دخلی اولمادیغینی دئمیشدی. ان سون ایسه ورزقان میللت وکیلی خالق طرفین سورغو سوالا توتولدوغونو، الده ائدیلن قازانجین بولگه‌ده خرجلنمه‌مه‌سی اوچون ناراضلیق‌لار اولدوغونو بیلدیرمیشدی.
سونگون مس معدنی چئوره‌یه نئجه ائتکی بوراخیر؟
سونگون مس معدنی بیر چوخ چئوره پروبلم‌لری ده تؤرتمیشدیر. بو معدنین زیبیل‌لری علمی یوللارلا دفع ائدیلمه‌دیگی نتیجه‌سینده یئرآلتی و یئراوستو قایناقلاری زهرله‌ییر. 1399 ایلینین یاییندا سوسیال مئدیادا یاییلان ویدئولاردا معدن چیرکاب‌لارینین چئوره‌یه بوراخیلماسی نتیجه‌سینده ایلقینا چایی آخار سم ییغینینا چئوریلدیگی گؤرونوردو. ایلقینا چایی توللانتی‌لار نتیجه‌سینه مسموملاشیب، سویوندان ایچن مال-قارانین خستهلیگینه سبب اولوب، سویون ایچینده یاشایان بوتون جانلی‌لار اؤلدورموشدو. چینار تلگرام کانالی ورزیقانین که‌ور کندینیده مئشه و اوتلاق‌لارین محو ائدیلمه‌سی حاقدا بیر باشقا ویدئو یاییب. ورزقان شرقی آذربایجان ایالتینده ان چوخ سرطان خستهلیگینه یولوخان شهر کیمی تانینیر و بونون بیر باشا سونگون مس معدن یایله علاقه‌لی اولدوغو دوشونولور. ورزقانین میللت وکیلی دهقانی، سونگون میس معدنی گلیرینین یالنیز بیر فاییزینین چئوره‌نی قوروماق اوچون قیراغا قویولماسی پلانلاشیب، آنجاق بئش-آلتی ایلدیر کی آرتیق او بیر فاییز دا ورزقانا اودنمیر دئمیشدی.
