گونئیلی رئژیسسور اصغر یوسفی‌نژاد کئچیردیگی بئیین عملیاتیندان سونرا وفات ائدیب. تبریزلی رئژیسسور سون زامان‌لار بئیین قانسیزماسینا گؤره کومادا ایدی. شهریور آیی‌نین ۲۲-ده تانینمیش رئژیسسور تبریزده یئرله‌شن خسته‌خانادا وفات ائدیب. اونون جنازه‌سی شهریورین ۲۳-ده تبریزین وادی رحمت قبیریستانلیغیندا تورپاغا تاپشیریلاجاق.
اصغر یوسفی‌نژاد ۱۳۴۸-جی ایلده تبریزده دوغولوب. او، ایران رادیو و تلویزیون (صدا و سیما) اونیوئرسیته‌سی‌نین ماذونو ایدی. فعالیتی بویونجا بیر چوخ اثرلره ایمضا آتان یوسفی‌نژاد رئژیسسور، یازیچی و پرودوسئر کیمی فعالیت گؤستردیگی سینماتوقرافییا حیاتینا ۱۳۶۹-جو ایلده باشلاییب.
جمعی ۵۳ ایل یاشایان یوسفی‌نژاد سون زامان‌لار تورکجه چکیلمیش «ائو» و «قولچاق» فیلمی ایله گونده‌مه گلمیشدی. لاکین «قولچاق» فیلمی فجر فئستیوالینا قبول ائدیلمه‌دی. بوندان اوّل او، هم سئناری مؤلفی، هم ده رئژیسسورو اولدوغو «یاغیش رؤیالاری یومور» فیلیمینی چکمیشدی.
«ائو»
رئژیسسور اصغر یوسفی‌نژادین ۱۳۹۵-جی ایلده چکدیگی «ائو» آدلی بدیعی فیلمی ایران کینو تنقیدچی‌لرینین ده دیقّتینی چکیب. تبریزده آذربایجان تورکجه‌سینده فارسجا آلت‌یازی ایله ایستئحصال ائدیلن فیلم، عنعنوی بیر عائله‌دن بحث ائدیر. فیلمین قهرمان‌لاری اؤلن آتالارینی دفن ائتمک ایسته‌ییرلر، لاکین اؤیره‌نیرلر کی، آتالاری اؤز جسدینی طیببی آراشدیرمالار اوچون تدقیقات اینستیتوتونا باغیشلاماغی وصیت ائدیب.
«ائو» فیلمی «نت‌پک» (آسییا کینو اینکیشافی اوچون شبکه) موکافاتی ایله بیرلیکده، ایرانین ۳۵-جی فجر فیلم فئستیوالیندا ان یاخشی سئناری و ان یاخشی فیلم اوچون «سیمرغ زرین» و «سیمین» موکافات‌لارینی قازانمیشدیر. فیلمین اوغورو موستقیل گونئی آذربایجان کینوسوندا بؤیوک سس-کویه سبب اولدو.
«ائو» فیلمینی بورادان ایزله‌یین
«قولچاق»
یئنی چکیلمیش «قولچاق» فیلمی آذربایجان تورکجه‌سینده اولدوغو اوچون ایراندا کئچیریلن ۴۰-جی فجر بئین‌الخالق فیلم فئستیوالینا قبول ائدیلمه‌ییب. ایرانین مشهور کینورئژیسسورلاریندان اولان بهروز افخمی دئییب کی، «قولچاق» فیلمی حئیران‌ائدیجی بیر فیلم اولسا دا، تورکجه اولدوغو اوچون فجر فئستیوالیندا ایشتیراک ائتمه‌یه‌جک. فیلمین قبول ائدیلمه‌مه سببی کیمی ایسه، اونون تورکجه اولدوغونو گؤسترن رئژیسسور دئییب کی، – «فیلم تورکجه ایدی و مونصیف‌لر فارسجا آلت‌یازی تئز-تئز دییشدیگینه گؤره اونو اوخویا بیلمه‌ییب فئستیوالا قبول ائتمه‌دیلر.» «قولچاق» هله ده ائکرانلاشدیریلماییب.
«یاغیش رؤیالاری یومور»
رئژیسسورون بیرینجی پئشه‌کار اثری کیمی تانینان بو فیلم 1382-جو ایلده ایستئحصال ائدیلیب. فیلمده اوستاد شهریارین رولونو اوینایان محمد ناجی رئژیسسورون اؤلومونه گؤره «یاغیش» آدلی دیگر بیر فیلمده آکتیورلوغا باشلاییر. لاکین او اوّلکی رولوندان آیریلماقدا چتینلیک چکیر. بو فیلمین دیلی فارسجادیر.
آذربایجان موستقیل کینوسو و یوسفی‌نژاد
بعضی گونئیلی کینورئژیسسورلار گونئیده آذربایجان موستقیل کینوسونون یاراندیغینی دئییرلر. ایراندا فارس دیلی یئگانه رسمی دیلدیر. ایراندا کینو دا بو تک‌دیللی سیستئمین بیر پارچاسی اولاراق یارانسا دا، سون زامان‌لار گونئیده تورکجه اثرلرین سایی آرتماقدادیر. تورکجه اثرلره اینسان‌لارین ماراغی دا بو گئدیشاتا بؤیوک دستک کیمی قبول ائدیلیر.
بو گئدیشاتین قارشیسیندا اولان تک‌دیللیلیک سیاستی ایسه آذربایجان موستقیل کینوسونون آیاقلانماسینا انگل‌لر یاراتماقدادیر. اصغر یوسفی‌نژاد بو پروسئس ایچه‌ریسینده اؤزونه‌مخصوص یئر آلیب. گونئیلی بیر دیگر رئژیسسور اسماعیل منصف گونئیده اصغر یوسفی‌نژاددان دا اؤنجه تورکجه فیلم‌لرین چکیلدیگینی، لاکین یالنیز یوسفی‌نژادین اثرلریندن سونرا عمومی هیجانین یاراندیغینی یازیب.
یوسفی‌نژاد آذربایجان موستقیل کینوسوندا اوغورلار قازانماغین مومکون اولدوغونو گؤسترن رئژیسسور ایدی. «ائو» فیلمی آذربایجان موستقیل کینوسونون ان پارلاق اثرلری سیراسیندا یئر آلیر. «قولچاق» آدلی دیگر اثری ایسه تاسوف‌کی بحث ائدیلن تک‌دیللیلیک سددینی آشا بیلمه‌دی. یوسفی‌نژادین فعالیت‌لری آذربایجان موستقیل کینوسونون وضعیتینی آچیقجا نوماییش ائتدیرمکده‌دیر.
