زنجان هاوا لیمانی ۲۰۰۰-جی ایلده ۴۰۰هئکتار اراضیده تیکیلدی. کئچن ۲۳ایل عرضینده بو هاوا لیمانی‌نین فعالییتی غیرمنتظم شکیلده داوام ائدیر. بو مدت عرضینده یالنیز مشهد، حج و عمره کیمی اوچوشلار بعضی فاصیله‌لرده حیاتا کئچیریلیر. ایلین قالان گونلرینده ایسه تعطیلدیر. حاضیردا زنجانین اینکیشافی اوچون بؤیوک پتانسیل ساییلا بیله‌جک بو هاوا لیمانی ایستیفاده ائدیلمیر. زنجان استانی‌نین پایتخته یاخینلیغی سببیندن تیکیلدیکدن سونرا ان ایشلک هاوا لیمانلاریندان بیری اولاجاغی گؤزله‌نیلسه ده، بوگون ان ساکت هاوا لیمانلاریندان بیرینه چئوریلمیشدیر.
زنجان هاوا لیمانی
زنجان اولوسلار آراسی هاوا لیمانی هاوا سرحدی اولان هاوا لیمانلاریندان بیریدیر. زنجان استانی‌نین احتیاجلارینا گؤره تیکیلن زنجان هاوا لیمانی‌نین تیکینتیسینه ۱۳۶۹-جو ایلده باشلانمیش و تخمینا ۱۰ایل سونرا، یعنی ۱۳۷۹-جو ایلده بو استاندا یئگانه هاوا لیمانی اولاراق ایستیفاده‌یه وئریلمیشدیر. حؤکومتین زنجان هاوا لیمانینی هاوا سرحدینه چئویرمک قرارینا اساسا، ۱۳۹۱-جی ایلده ایلک اولوسلار آراسی اوچوش عربستان سعودیه حیاتا کئچیریلمیشدیر. لاکین عربستان هاوا یوللاری‌نین خلبانی بو هاوا لیمانینا ایلک ائنیشدن سونرا اونو غیراستاندارد و اولوسلار آراسی اوچوشلار اوچون اویغونسوز کیمی قیمتلندیرمیشدیر. بونونلا بئله، هاوا لیمانی‌نین تانیتیم سایتی ادعا ائدیر کی، بو هاوا لیمانی ایرباس ۳۰۰کاتئقورییاسینا قدر بوتون نؤوع گئنیش گؤوده‌لی طيّاره‌‌لره، اورتا اؤلچولو طيّاره‌‌لره، دار گؤوده‌لی طيّاره‌‌لره، یونگول طيّاره‌‌لره و هلی کوپترلره اویغون تیکیلمیشدیر. بو هاوا لیمانی‌نین گونده‌لیک ۴۰اوچوش قابیلیتی اولسا دا، گونوموزه قدر بو ایمکاندان ثمره‌‌‌لی ایستیفاده ائدیلمه‌میشدیر. بئله کی، تیکیلمه‌سی‌نین اوزریندن ۲۳ایل کئچمه‌سینه باخمایاراق، بو هاوا لیمانی‌نین منتظم اوچوش قیفیلی هله ده آچیلمیش دئییلدیر.
هاوا لیمانی‌نین فعالیتسیزلییی زنجانین گلیشمه‌سینه انگل اولور
زنجان هاوا لیمانی‌نین مودورو هاوا لیمانی‌نین اهالی‌نین بو اوچوشلاری یاخشی قارشیلامادیغینا گؤره باغلاندیغینی بیلدیریر. آما سیاحت آژانسلاری اینسانلارین مأیوسلوغونو هاوا لیمانی‌نین پلانسیزلیغی و ضعیفلیییندن آسیلی اولدوغونو بیلدیریرلر. خالق گوناهلاندیریلسا دا، زنجان سیاحت آژانسلاری هاوا لیمانی‌نین فعالیتینی چوخ تنقید ائتمکله یاناشی، ریفاهی‌نین اولماماسینی و سرنیشینلره خیدمتین دوزگون پلانلاشدیریلماماسینی اینسانلارین بو هاوا لیمانینی خوش قارشیلامامالارینا اساس سبب کیمی گؤستریرلر. کئچمیش ایللرده موقاویله باغلانان شرکتلرین منتظم اوچوش جدوه‌لی‌نین اولمادیغی دا بونا اؤرنک گتیریلیر. اوچوش پلانلاری‌نین غیرمنتظملیگیندن قایناقلانان گوونسیزلیک بیلت‌لرین آلینماماسینا دا نه‌دن اولور. دیگر طرفدن، هاوا لیمانیندا اوتوپارک و تاکسی دوراجاغی‌نین اولماماسی اینسانلارین ناراضیلیغینا سبب اولان بیر باشقا پروبلئم اولاراق قیمتلندیریلیر.
زنجان هاوا لیمانی‌نین تیکینتی یئری ایله باغلی دا چوخلو تنقیدلر واردیر. زنجان هاوا لیمانی زنجان استانی‌نین دیگر شهرلری‌نین اکثريتی‌نین بو هاوا لیمانیندان ایستیفاده ائده بیله‌جیی یئرده سالینمامیشدیر. مثلا، بو هاوا لیمانی ابهر و خرمدره یاخینلاریندا یئر آلسایدی قزوین و تاکیستان شهرلری ده ایستیفاده ائده بیلردی. دیگر طرفدن، زنجانین پایتخته یاخینلیغی بو هاوا لیمانی‌نین اینکیشافی اوچون پتانسیل اولا بیلردی. آنجاق زنجانین دیگر لاییحه‌‌لرینده ده دوزگون یئر سئچیمی‌نین اولمادیغی گؤرولور. یئرلی رسمیلرین سؤزلرینه گؤره، حؤکومت ده بو هاوا لیمانی‌نین اینکیشافینا دستک وئرمیر. اؤته یاندان، زنجانین خوصوصی اقتصادی بؤلگه اولماسی و هاوا لیمانی‌نین غیرمنتظم وضعيتی‌نین زنجانا قویولاجاق سرمایه‌یه انگل اولاجاغینی گؤستریر.
هاوا نقلياتی اقتصادی، سوسیال، حربی و توریزم احتیاجلاری‌نین قارشیلانماسیندا مهم رول اویناییر. گونوموزده، اقتصادی، سوسیال و توریزم مسئله‌‌لری‌نین اهميتلی حیصه‌‌‌سی‌نین هاوا نقلياتیندان آسیلی اولماسی هاوا لیمانلاری‌نین رولونو و اهميتینی ایکی‌قات آرتیرمیشدیر. اونا گؤره ده، بو سئکتورون اینکیشافی داها چوخ اؤنم قازانیر. لاکین زنجان هاوا لیمانی بو اینکیشافدان اوزاقدا قالمیش و اوچوشلاری‌نین گئنیشلندیریلمه‌سی پلانلاری بو گونه قدر باغلی قاپیلارلا اوزلشمیشدیر. بو هاوا لیمانی زنجانین اؤز ایش و بازار آداملاری‌نین احتیاجلارینی قارشیلاماق اوچون بئله آکتیو دئییلدیر. هاوا لیمانی‌نین فعالیتی ایل عرضینده بیر نئچه اؤزل اوچوشلا کیفایتله‌نیر، اولوسلار آراسی اوچوشلار ایسه یالنیز حج دؤنم‌ینده حیاتا کئچیریلیر. بورادان بیر نئچه قونشو اؤلکه‌یه بیرباشا اوچوشلار موذاکیره ائدیلسه ده هله باش توتمامیشدیر. زنجانین گلیشمه پتانسیلینه مالیک اولان بو هاوا لیمانی‌نین اوچوشلاری تخمینا ایگیرمی بئش ایلدیر کی قیفیللانمیشدیر.
